Read Kalanga Isaya 27 Bible Online

Isaya 27 - Kalanga bible

Isaya 27

¹Mu zhuba ilelo, Yahwe nge thumo labo lakasima, lakabangalala, gulu banowoloba zhithu le gungwa linoyi Livatani nyoka inotizha ilibilidza, Livatani nyoka inonyongoleka, banowobulaya bhophona limu gungwa.

²Mu zhuba ilelo, “Mumbile lumbo nnda we nzhambi unozipa.

³Imi Yahwe, ndimi ntjengeti wawo, tjibaka tjimwe ne tjimwe ndowudilidzila. Kuita kuti kusibe ne unowukubadza, ndoulinda siku ne sikati.

⁴Andina kugwadzamoyo. Mihwa ne zwishosho ha zwingabhayana nami mu ngwa, ndabe ndinga zwipalama, azwipisa zose.

⁵Kene ha kuli tjimwe ngabatizhile kundili, ngababe ne mbakiso nami, ee ngabathame mbakiso nami.”

⁶Mu mazhuba anozha ndzi wa Jakubo unowothinila, Iziraela inowobe ne maluba, ikazwala ikazhadza shango yose nge mitjelo.

⁷Apa Yahwe bakabaphobola sekwa bakaphobola ibabo bakabaphobola kene? Apa bakababulaya nge zila yakabulawa ibabo babakabulaya kene?

⁸Kuyendidzana nge kukula kwayo, monyanyayidzana nayo nge kuitatila kule, mowoitata se tjampupudze mu nsi we phepo ye kubhezhuba itutudza.

⁹Ndizo wali, ndingekwa ikoko jinyo la Jakubo lowozwiibhatigwa, ngono ikoku kowobe kuli mbuyilo nge buzhalo kudusiwa kwe tjibi tjitje, paanowobe e thama mabgwe wose e zwibeso zwe zwibhayilo zwikanga mabgwe e suko akatshiwa kapkhwanyiwa, akuna bo Ashera kene zwibeso zwe motsha zwinowosala zwilimile.

¹⁰Nzi we matizhilo umile uliwoga, magalo asiyiwa asina n'gali, asala enga tjilambanyika, phulu dzowofula ikoko dzikalalako, dzowokwaula thabi.

¹¹Thabi dzowoti dzawoma, dzikavunika bakadzi banowozha bakabesa moto ndidzo. Ngoti ibaba bathu abana hwisiso, ndizo Nthami wabo aana ngoni nabo, Mbumbi wabo aatobalakidza lubu.

¹²Mu zhuba ilelo Yahwe banowoshokola mathunde kudwa pa Gwizi gwe Yufuratesi kunoti ku lukoba gwe Egipiti, namwibo Baiziraela Yahwe banowomukubunganya ng'ompela ne ng'ompela.

¹³Mu zhuba ilelo kowoshingikala kuti lunyanga lukulu gulidziwe, ngono bathu bangu babe bakalingisana nge kuloba mu Asiriya ne bakatizhila ku Egipiti babuye banamate Yahwe mu dombo lakayengemala mu Jerusalema.