Read Kalanga Isaya 28 Bible Online

Isaya 28 - Kalanga bible

Isaya 28

¹Yee mme wee tjapalala tjiala tje bushe tjinozwida, tje zwilaladzi zwe Ifureimi, ne luba linotimbama le naka kukwe kunopenyelela, liku misholo ye nkuku una mavu akakola wa ibabo banokuligwa nge nkumbi we zhambi!

²Bonani, she banaye iye wakasima una masimba, kufanana ne dutu lina tjivulamabgwe linokolomodza, kufanana ne vula ye nkubila, unowobaposela kutjena nge simba.

³Tjiala tje mazwikudzo tje zwilaladzi zwe Ifureimi tjowokanyangiwa nge makumbo

⁴ne luba linotimbama le naka kukwe kunopenyelela, liku misholo ye nkuku una mavu akakola lowofanana ne phaya ya bidwa kutangila tjilimo. Wayibona unoija tjinyolotjo koga edwa pa itjela.

⁵Mu zhuba ilelo Yahwe Masimbawose banowobe tjiala tje gudzo ne ngala dze kunaka ku malimbelimbe e bathu babo.

⁶Banowobe meya ye kutambunuka kuna unosumikilisa, ne kube simba kuna unodziba ngwa pa nkoba.

⁷Aba naibo banodzungugwa nge nkumbi we zhambi, be tshatsharikisiwa nge nkumbi wakabila. Bapirisiti ne balebesambeli banodzembeledziwa nge nkumbi wakabila, bakahwumanyiwa nge nkumbi, banotshatsharikisiwa nge nkumbi wakabila, bebe beleyanya mu mbono, bebe beleyanya mu kusumikilisa.

⁸Tafuli dzose dzizhele matho ne shambgwa, akuna pabuyanana.

⁹Ndiani wabangadiya kabe ne zibo, ndiani wabangatjenesela ndayidzo kene? Ndiibabo baletjedzisiwa kuthwisiwa zhamu, ibabo bathwisiwa zhamu?

¹⁰Ngoti ndayo inotobela ndayo, ndayo itobela ndayo, tjilizanyo tjotobela tjilizanyo, tjilizanyo tjitobela tjilizanyo, kutukununu pano, kutukununu apaje.

¹¹Banowolebeleka nge milomo inokakang'wa nge lulimi gupoga. Ndzimu unowolebeleka ne bathu ibaba,

¹²ibo wabakadwa ukati, “Ogu ndigo bugalo gwe kunyaluluka, nyalulusani bakanyala.” Kunyaluluka ndiko ikoko, ngono bakalamba kuteedza.

¹³Ndizo dama la Yahwe lowozha ku bali nge ndayo itobela ndayo, ndayo itobela ndayo, tjilizanyo tjitobela tjilizanyo, kutukununu pano, kutukununu apaje, kuti bayende ngono bawile shule bavunikane, babhatshigwe babhakhwe.

¹⁴Ndizo wali, ihwani dama la Yahwe imwi badadi, imwi munobusa bathu ibaba bamu Jerusalema.

¹⁵Ngoti imwi makati, “Iswi takathama tjidumano ne lufu ne ikumbu, iswi timu tjidumano. Kowoti shamu yakabangalala itipalama, aitowoti kutha ngoti takathama manyepkhwa dizhilo ledu, takabgwata kusi kwe manyepkhwa.”

¹⁶Ndizo wali She Yahwe bakati, “Bonani, ndobiga bgwe le thiwa mu Ziyoni, bgwe lakalikwa lakanaka, thiwa ye malebeswa ku ndzibo, ‘Iye unogalabgwe unobigamoyo.’

¹⁷Thambunuko inowobe nsungo unotambunudza, ndulamo ikabe nsungo unolizanyidza, ngono tjivulamabgwe tjowokuba dizhilo le manyepkhwa, ngono vula inowokulila mabgwatilo awo.”

¹⁸Tjidumano tjenyu ne lufu tjowotshumugwa ne kudumana kwenyu ne ikumbu akungabhatilile, shamu yakabangalala inowoti ipinda inomuloba.

¹⁹Tjibaka tjayapinda koga inowomuloba, inowopinda mangwanana ne mangwanana, siku ne sikati. Kuhwisisa ndayidzo iyeyi kowozhisa kutja.

²⁰Ngoti bulawo gufutshwanisa nthu aangatandabale mu guli, ngubo naiyo ithetjanisa nthu aangazwifukidze ndiyo.

²¹Ngoti Yahwe banowomilika sekwa bakamilika pezhugwi kwe Dombo le Perazimu, banogwadza moyo semu nkuku we Gibiyoni kuthama nshingo wabo, nshingo wabo unotjenamisa, banowothama kuti kushingikale n'ja wabo, n'ja wabo unotjenamisa.

²²Ndizo ngwenu musidade, misungo yenyu idwa isimisiwa, ngoti ndahwa nge kwe kulobeswa kudwa kuna She Yahwe Masimbawose, naiko kuli kulobeswa kwe shango yose.

²³Teyani zebe muhwe hwi langu, hwililani muhwe ndebeleko yangu.

²⁴Apa nlimi unolima edzwala, unolima zhuba lose kene? Apa unodwilila elima epkhwanya magwada kene?

²⁵Apa ha alizalizanya paanolima aatodzwala mbewu ye dili, ebe edzwala ye kumini kene? Ebe edzwala koroni nge dzizilana ebe edzwala bhali pakailingisana ne riye pakailingisana kene?

²⁶Wakadiyiwa zubuyanana, Ndzimu uwe unon'diya.

²⁷Dili ayitoshokogwa nge tjileyi tje kushokola, kene gundzwana le koloyi alinga kunguludziwe pezhugwi kwe kumini, koga dili inopugwa nge lukondzwana, kumini iyo inopugwa nge lukombo.

²⁸Mathunde e tjiwunga anogayiwa kuthama tjiwunga, ndizo nthu aatoapulila tjose. Nenguba epitsha makundzwana e koloyi iye pezhugwi kwayo, mbizi dzidze adzitoakwiya.

²⁹Ikoku naikobo kodwa muna Yahwe Masimbawose, ibo banotjenamisa mu butjenjedu gwabo, butjenjedu gwabo aguna tjilizanyo.