Read Kalanga Isaya 29 Bible Online

Isaya 29 - Kalanga bible

Isaya 29

¹Yee mme wee wapalala iwe Ariele, Ariele nzi nkulu kwakabe kugala Dafite! Paphidzani gole nge limwe gole, mizano ngaidwilile ngotebeledzana kwayo.

²Ndowolonga Ariele mu buyendasi, kowobepo tjililo ne makuwo, ngono kundili unowosalaunga Ariele.

³Ndowokukomba nge ngwa kukupoteleka, ndowobaka thungamakole kukupoteleka ngono ndowolingisana nawe nge ngwa.

⁴Unowolashigwa pasi ngono unowolebeleka kudwa mu mavu, matama awo anowohwika edwa pasi mu hwuluba, hwi lilo lowohwika lidwa pasi linga le ipuku lidwa mu mavu linyebezela kudwa mu hwuluba.

⁵Koga mibunga ye zwita zwizo inowonga hwulubana koga, ne mibunga ye bakabangalala ikanga bunye gunowuluka gupinda, ee kowoshingikala kulibilidza mu tjibakana.

⁶Yahwe Masimbawose banowokukumba nge misindo ye vula nenge kutengenyeka kwe shango ne zhoba hwulu ne matutu ne phepo yakabangalala ne nthuto we moto unolobesa.

⁷Ngono mibunga ye njudzi dzose idzedzi dzinogwa ne Ariele, idzedzi dzinonginilila ne mu matizhilo ayo dziukomba, dzowonga mawoloto kene mbono busiku.

⁸Naiko kowonga nthu una zhala ewolota eja, koga eti emuka ewana kusina tjimu ntumbu kene se nthu una nyota ewolota engwa vula, koga emuka ewana etimbama nge nyota, ana nyota, kowojalo mu mibunga yose ye njudzi dzinogwa ne Dombo le Ziyoni.

⁹Kaabalani kakale mutjename, muzwithame mapofu kuti musibone. Laladzani koga musingalaladzisiwe nge nkumbi we zhambi, tshatsharikani koga musinga ikhwe nge busukwa.

¹⁰Yahwe bazhisa mu muli hwope dzinolema, bazhalila mesho enyu imwi balebesambeli bakwididza misholo yenyu imwi munobona zwimbeli.

¹¹Mbono ya ikoku kose kumuli yanga matama e lukwalo gwakazhaligwa. Ha begupa mmwe ungabala bebe beti, “Bala ikoku,” unowoti, “Andingabale ngoti gwakazhaligwa.”

¹²Kakale ha begupa usingake kabala beti, “Bala ikoku,” unowoti, “Anditoziba bala.”

¹³She bakati, “Ngoti bathu ibaba banosedzela kundili nge milomo yabo, banondilumbidza nge milomo yabo, koga mimoyo yabo ikule nami, kundithigamila kwabo kwakabakigwa mu milayo yabanodiyiwa nge bathu.

¹⁴Ndizo ndowopapha ashinga zwinotjenamisa nge bathu ibaba, zwinodzidzimusa zwikakaabadza. Butjenjedu gwe batjenjedu babo gowopela, mano ebana mano anowopela.”

¹⁵Yee mme wee mapalala imwi munonginila mukatikati kwe pakasumbikala musumbikila Yahwe ndongoloso dzenyu, moshinga nshingo wenyu mu zhalima mube muti, “Ndiani unotibona? Ndiani unoziba ngekwedu?”

¹⁶Mopitulanya zwithu. Apa mbumbi unobumba nge ntapkhwi ungabhakhwa se ntapkhwi kene? Tjabumbiwa apa tjingadwa mbumbi watjo tjiti, “Aazondibumba,” kene tjabumbiwa tjingati ngekwe wakatjibumba, “Akuna tjaanoziba kene?”

¹⁷Mu tjibakana tjitukununu, apa Lebanoni aingabe nnda una mavu akakola, nnda iwoyu we mavu akakola ube utogwa se ishaka kene?

¹⁸Mu zhuba ilelo bhubuzebe lowohwa matama amu lukwalo, mesho e bhofu anowodwa mu ludandi ne mu zhalima kabona.

¹⁹Bana moyo minyolo banowowana kushatha kakale muna Yahwe, bashayi banowoshatha muna Wakayengemala we Iziraela.

²⁰Ntshambilidzi unowobe asitjipo, n'dadili kowobe kwapela nge kukwe, bose bakazwimisila kutjinya banowobulawa,

²¹banoti ngoleba bakathama kuti nthu mmwe abong'we nlandu pa lubazhe koga iye asina nlandu, banolalila ntendeki be nteya nge matama, bepa butendeki gwe manyepkhwa betjebela nthu wakalulwama, Ndzimu unowobalobesa.

²²Ndizo wali Yahwe ibo bakadzutunula Abhurahama bakati ku nsha wa Jakubo, “Jakubo aangatjabhakhwe nge shoni kakale, buso gugwe agungashobe kakale.

²³Banowoti be bona bana babo iyo mishingo ye maboko angu pakati kwabo, banowoyengemadza zina langu, banowoyengemadza Wakayengemala wa Jakubo, ngono banowoteta Ndzimu we Iziraela.

²⁴Ibabo bakabhuda mu zila mu meya, banowowana hwisiso, banong'ong'ola banowoamutjila ndayo.”