Read Kalanga Isaya 3 Bible Online

Isaya 3 - Kalanga bible

Isaya 3

¹Ngono bonani, She, Yahwe Masimbawose bapejo ngodusa mu Jerusalema ne Juda zwinotjidza, zojiwa zose ne vula yose,

²nlume wakasima ne mbhayani, nsumikilisi ne nlebesambeli, nkandili ne nkulu,

³ntungamili we ngwa ye bali makumi mashanu ne una mamo, nkumbuludzi ne nyambi ye mishingo ye maboko ne ng'anga.

⁴Ndowothama bayisana bakabe makulukota abo, shabana dzowobabusa.

⁵Bathu banowotshambilidzana, nthu etshambilidza mmwe nthu, mbakidzani etshambilidza mbakidzani uwe. Batjetjana banowodeyelela bahwola, bathu basi betjimwe bakadeyelela bana mamo.

⁶Nthu unowotola hama iye, mmwe we ludzi gwa tate babe ebe eti, “Iwe una jasi, ibe ntungamili wedu, ube iwe unolaula matongo iyawa.”

⁷Koga mu zhuba ilelo unowomilidza hwi eti, “Anditowobe mpodzi. Andina zojiwa kene jasi mu ng'umba yangu, usindithame ntungamili we bathu.”

⁸Nge malebeswa Jerusalema inodzunguluka, Juda iyo yawa, ngobe ndebeleko dzabo ne mishingo yabo inobhayana na Yahwe, banolandula bukulu gwe kubeyapo kwabo.

⁹Ndingiko ye njiso dzabo dzoleba tjibi nge kwabo. Dzoleba tjibi tjabo se Sodoma, abatosumbika. Yee mme wee! Bapela! Ngoti bazwizhisila mbatsha nge kwabo.

¹⁰Budza balulwami kuti kowoyenda zubuyanana nge kwabo, ngekuti banowoshathila mbuyilo ye mishingo yabo.

¹¹Yee mme wee! Batjinyi! Mbatsha dzinabo. Ngoti tjakashingwa nge maboko abo nditjo tjabanowothamigwa.

¹²Bana batshambilidzi be bathu bangu, bakadzi banobabusa. Bathu bangu, batungamili benyu banomutungamilila ntome, banomudzimidza mu zilana dzenyu.

¹³Yahwe batola magalo abo mu lubazhe, bamilika kusumikilisa bathu.

¹⁴Yahwe bawosumikilisa bakulu ne makulukota e bathu babo belebeleka beti: “Ndimwi makathukudza nnda wangu we mizhambi, zwamakatapa mu bashayi zwizhele mu ng'umba dzenyu.

¹⁵Modwani kene nge kukhwa bathu bangu mugaya njiso dze bashayi?” Kolebeleka She Yahwe Masimbawose.

¹⁶Yahwe bakati, “Ngoti bakololokadzi be Ziyoni banozwida, bebe beyenda bakadongolodza mitshibha, belingalinganya nge mesho abo, betshamba nge thambo futshwanana benyezukila, bakaambala maseka anoyenda elonga zhoba mu makumbo.

¹⁷Ndizo wali She banowodusa malonda mu misholo ye bakololokadzi be Ziyoni, Yahwe banowothama misholo yabo kube ne mapalo.”

¹⁸Mu zhuba ilelo She banowodusa mubali minakiso yabo: inombagwa mu makumbo ne inombagwa mu misholo ne mu mitshibha,

¹⁹mang'ina ne ndalama ne masiri,

²⁰tukwi ne maseka ne ngumbgwana dzinobigwa mu mathudzi ne mabokisi emafuta anonuwisa zwinozipa ne zwitshweku,

²¹ring'i dzabanoambala mu zwinyala ne mu zwimilo,

²²zwiambalo zwe mizano ne kepesi ne hazu ne zwikwama;

²³ne zwiboni, zwiambalo zwe matyila ne hwutshe ne tyali.

²⁴Mu bumo gwe nnuhwo unozipa kowobe ne nnuhwo wakabipa, mu bumo gwe mwandabula, kowobe ne ntjili, mu bumo gwe mavudzi akakamiwa zwakanaka, kowobe ne bhalo, mu bumo gwe zwiambalo zwakanaka, kowobe ne tjiambalo tje saka, mu bumo gwe bubuya, kowonga kwababugwa nge tshipi ye lutjwayo.

²⁵Balume banowofa gwe thumo, babhayani banowofa mu ngwa.

²⁶Mikoba ye Ziyoni inowolila ikakuwa, asitjina waanaye, unowogala pasi.