Read Kalanga Isaya 30 Bible Online

Isaya 30 - Kalanga bible

Isaya 30

¹“Yee mme wee mapalala imwi bapanduki be bana,” koleba Yahwe “imwi munotobela ndongoloso isi yangu, banothama nshanganyila unolambana ne Meya dzangu, kuti mupaphe tjibi nge tjimwe tjibi,

²banomilika bakayenda ku Egipiti, basatongo bhuzwa gumbuludzo langu, bethama Faro dizhilo labo, beshaka mbakililo mu Egipiti.

³Koga mbakililo ya Faro inowomubhatisa shoni, ne kutizhila mu ntutshi we Egipiti kowomulengudza.

⁴Ngoti nenguba makulukota awe ali ku Zoani, ne bamilili babe bali ku Hanesi,

⁵mmwe ne mmwe unowobhatisiwa shoni nge bathu basina nshingo, bathu basina bhatsho kene mbuzilo, koga bali bathu banozhisa shoni ne kulengudzika.”

⁶Dama le Ndzimu ngekwe phuka dze Negebu. Banopalama shango ina mbatsha ne kudziyidzika, ina shumbakadzi ne shumbalume inobomba, ina thumbi ne nyoka dzinowuluka, bakasenga fumwa dzabo nge madonki, ne thundu dzabo nge kamela, beyenda ku bathu basina nshingo.

⁷Bhatsho ye Egipiti madatha, ndizo ndakadana Egipiti nditi Rahabu, “Iye Rahabu unoshwa akafunya asina tjaanoshinga.”

⁸Yenda sakuno uswike ukwale mu tjileiti bakalinga, ube ukunyola mu bhuka, kube thawu dze misi inozha, guli butendeki gusingapele.

⁹Ngoti bathu ibaba bapanduki, bana banonyepa, bana basingake bakahwa ndayo dza Yahwe.

¹⁰Banodwa baboni beti, “Musitjabe ne mbono kakale,” bakadwa balebesambeli bakati, “Musitjatibudze ndulamo, mutibudze tjatinoda, mutibudze mazhambgwala.

¹¹Idwani mu zila, siyana nayo, tisitjahwe tjimwe ngekwe Wakayengemala we Iziraela.”

¹²Ndizo wali Wakayengemala we Iziraela kati, “Se malamba dama ileli, mukagalabgwe mu kutshambilidza ne kutjebela, mukabiga mu zwili,

¹³jinyo ileli kumuli lowonga guma lefulefu lina mikhwe linodzikunuka labe pejo ngowa, linowoti kuwa kwalo kukabe tjinyolotjo, mu tjibakana tjitukununu.

¹⁴Guma ileli lowopkhwanyika se hali ye ntapkhwi ya phkwanyiwa nge simba kukasheteka ne tjiyenga tjayo tjingawoka moto kene kutjelesiwa vula mu tshime.”

¹⁵Tjinolebgwa ndi She Yahwe, Bakayengemala we Iziraela ndietji, “Mukushandukila matjinyo ne kunyaluluka ndilo jidzo, kudzikama ne kugalabgwe zowobe matatabuko enyu.” Koga makalamba ikoku.

¹⁶Makalebeleka muti, “Atidi, iswi towotaswa mbizi tikatizha.” Ndizo wali mowotizha. Mukapapha mukati, “Towotaswa mbizi dzina lubilo.” Ndizo wali batatamili benyu banowobe ne lubilo.

¹⁷Bali tjiwulu banowotizha betja tjibombo tje ali ng'ompela, zwibombo zwe bali bashanu zowothama kuti mose mutizhe, kudzina musiyiwa munga bhangwana le fulege pezhugwi kwe dombo, munga tjilakidzo pezhugwi kwe duthu.

¹⁸Ndizo Yahwe bakalindila kumuhwila ngoni, ndizo wali banowomilika kumuhwila ngoni. Kana Yahwe Ndzimu we kutambunuka, bakakombolegwa ibabo bose banoulindila.

¹⁹Bathu be Ziyoni, imwi banogala mu Jerusalema, amutjawolila kakale. Yahwe banowomuhwila ngoni ha behwa mulila. Banowoti behwa tjililo tjenyu banowomudabila.

²⁰Nenguba She bangamuzhisila zojiwa zwe kuhwazogwadza ne zojiwa zwe kudziyila, koga ndibo N'diyi wenyu abanga zwisumbike kakale, koga mowobona N'diyi wenyu nge mesho enyu.

²¹Kene mopambukila ku luji kene ku lumeshwe zebe dzenyu dzohwa hwi shule kwenyu liti, “Zila eyeyi muitobele.”

²²Mowoshima midzimu yenyu yakabezhiwa ikadzulugwa nge siliva ne golide. Mowoyilasha se matyilana ana shambgwa, mube muti kuali, “Kutjena naswi.”

²³Banowomupila vula mbewu yenyu ya munodzwala. Mowovuna mathunde akakombola ali manjinji. Mu misi iyeyo ng'ombe dzenyu dzowofula mu mafulo akazhuka.

²⁴Mangabe ne madonki anolima anowoja zojiwa zubuyanana.

²⁵Pezhugwi kwe dombo limwe ne limwe lefu na pezhugwi kwe duthu limwe ne limwe lakakula kowowunga wobana dze vula mu zhuba le kubulawa kwe banjinji, thungamakole ha dziwa.

²⁶Tjedza tje mwedzi tjowonga tje zhuba, tje zhuba tjedza tjowopaphidzika katendeka tjikanga tjedza tje mazhuba ali kutendeka azhele, mu zhuba Yahwe labanosunga mabanga e bathu babo, bepodza mbonje dzabakabadusa.

²⁷Bonani, zina la Yahwe lodwa kule, kugwadza moyo kwabo konga moto unopisa mu busi gwakati tshirikiti, milomo yabo izhele bushongola, ne lulimi gwabo gonga moto unopisa.

²⁸Mafemo abo anonga lukoba guzhele gunotebuka gunomila nthu pa ntshibha. Banozhunga njudzi mu luselo gwe golomodzo, banolonga tomu mu shaya dze bathu kubalashisa zila.

²⁹Mowomba lumbo se gunombiwa busiku ha muna nzano wakayengemala, makashatha mu moyo. Kukanga ha nthu emilika nge nlidzo we nyele eyenda ku dombo la Yahwe, ku Shongwe ye Iziraela.

³⁰Yahwe banowothama kuti hwi labo le bumambo lihwike ne luboko gwabo gunodelukila kuloba gubong'we, ne nthuto we moto unopisa mu kugwadzamoyo kwabo, ne matutu ne tjivulamabgwe.

³¹Asiriya inowopkhwanyikana ha ihwa hwi la Yahwe, ha beloba nge lukombo gwabo.

³²Shamu imwe ne imwe yabanonloba inoyendidzana ne nsindo we dzithamborini ne matati. Yahwe banogwa beshingisa luboko gwabo.

³³Mapisilo akalulwamisiwa ntolo, akalulwamisigwa mambo, gomba lawo ibhabi kakale lakangina, lina moto ne hwuni njinji, meya inofemiwa ndi Yahwe inonga lukoba gwe sulifuri inowubhatidza.