Read Kalanga Isaya 31 Bible Online

Isaya 31 - Kalanga bible

Isaya 31

¹Yee mme wee! Mapalala imwi banoyenda ku Egipiti beshaka bhatsho kakale begalabgwe mu mbizi, banogalamoyo mu koloyi dze ngwa ngoti dzili njinji kakale begalamoyo mu babhayani banotaswa mbizi ngoti bakasima, koga basingalinge kuna Wakayengemala we Iziraela kene kuli kushaka gumbuludzo muna Yahwe.

²Ipapa naibo bakatjenjela kakale bangazhisa mbatsha, kakale abatoshandukila tjabaleba, koga banowobhayana ne nsha we bashingi be mbipo ne banobhatsha ibabo banotjinya.

³Baegipiti bathu, ate bali Ndzimu, mbizi dzabo i nyama ate dzili meya. Yahwe abetambunudza luboko gwabo, mbhatshi unowodengayila, ngono unobhatshiwa unowowila pasi ngono bose banowolobesiwa.

⁴Yahwe tjabanondidwa etji, Kofanana ne shumba kene shumbana ibomba yakabhata tjayabhata, kene gupo le balisi likadang'wa likagwisana nayo, ayitotja mima dzabo kene kuli kutshonyongiwa nge zhoba yabo, saikoko Yahwe Masimbawose banowodelukila kugwa pezhugwi kwe Dombo le Ziyoni na pezhugwi kwe duthu lalo.

⁵Kofanana ne nyuni iwuluka pezhugwi, Yahwe Masimbawose banowobakilila Jerusalema, banoyibakilila bakayisunungula, banowoyitjidza bakayigwila.

⁶Imwi bathu be Iziraela bgwililani ku bali ibo bamakapandukila kwazo.

⁷Ngoti mu zhuba ilelo mose koga mowolasha midzimu yenyu ye siliva ne midzimu ye golide, yamakathama nge maboko enyu azhele tjibi.

⁸Ipapo Asiriya inowoligwa nge thumo, koga lisi le nthu, thumo lisi le bathu lowon'ja. Inowotizha thumo, bazhuzha bayo banowothamiwa balanda.

⁹Dizhilo layo lowokolomogwa, inowozhigwa ngotja ne makulukota ayo anowotizha ngwa ngotja. Koleba Yahwe bana moto wabo mu Ziyoni, bana bhuba mu Jerusalema.