Read Kalanga Isaya 32 Bible Online

Isaya 32 - Kalanga bible

Isaya 32

¹Bonani, mambo unowobusa nge ndulamo, ne makulukota anowolaula nge kutambunuka.

²Mmwe ne mmwe wabo unowonga matizhilo e phepo, banowonga mabgwatilo e dutu, banowonga hwoba dze vula mu tjilambanyika, bakanga ntutshi we shongwe hwulu mu shango yakawoma inopisa.

³Ipapo mesho ebanobona aanga zhalilike, ne zebe dze banohwa dzowohwilila.

⁴Mikumbulo ye banopaparika inowohwisisa, ne ndimi dze banokakang'wa dzolebeleka zubuyanana dzihwika.

⁵Tjilengwe atjitowobe tjitjadang'wa mpezha, ne nthu mbiimbi angabe atjakudziwa.

⁶Ngoti zwilengwe zoleba bulengwe, ne mikumbulo yazo inokumbula kutjinya. Zothama kusakalulwama, zwileba kusiiko ngekwa Yahwe. Bana zhala zosiya basina tjinobagutsha, bana nyota zobanyima vula.

⁷Babiibi banoshingisa mbipo se tjibhayano, banothama ndongoloso dzakabipa kulobesa bashayi nge matama e manyepkhwa, nenguba kukumbila kwe nsheti kwakatambunuka.

⁸Koga bathu bapezha banothama ndongoloso dzakalulwama, ngono nge zwakalulwama banoma bakasima muna tjabanoshinga.

⁹Imwi bakadzi bagedzikane milikani muhwe tjandinoleba, imwi bakololokadzi banogutshika, teedzani ndebeleko yangu.

¹⁰Mu mazhuba mashomanana shule kwe gole, mowotetema imwi bagedzikane, ngoti mizhambi aitowozwala, akutowobe ne nsi we kutjela mitjelo.

¹¹Dziidzikani imwi bakadzi bagedzikane, muteteme imwi banogutshika. Mbulani zwiambalo zwenyu, muzwipombe nge saka mu thunji.

¹²Lililani ngekwe minda dzakanaka, ne ngekwe mitjelo ye mizhambi,

¹³ngekwe shango ye bathu bangu yakamela mihwa ne mitinyana inobhaya, ee lililani ng'umba dzose dze kushatha, ne nzi nkulu uzhele kushatha.

¹⁴Ng'umba ye bumambo inowosiiwa, nzi nkulu unazhoba unotizhiwa, matizhilo ne ngadzi zowobe matongo tjatjose, kowobe panoshathisa madonki e shango, mafulilo e ngubi

¹⁵kuswikila meya inodwa zhuzhugwi idigwa mutili, tjilambanyika tjibe nnda una mavu akakola, nnda una mavu akakola ube unga ishaka.

¹⁶Ipapo kutambunuka kowogala mu tjilambanyika, ne ndulamo ikagala mu nnda una mavu akakola.

¹⁷Zwizwalo zwe ndulamo inowobe mbakiso, ne mbuzilo ye ndulamo ikabe kunyalala ne kugalabgwe nge kusingapele.

¹⁸Bathu bangu banowogala mu magalo ana mbakiso, mu magalo akabakililika, mu magalo ana kunyaluluka kusina tjingabatshonyonga.

¹⁹Ishaka tjowothukudziwa nge buzhalo nge tjivulamabgwe, nzi nkulu ukakolomogwa kukasisale tjimwe tjawo.

²⁰Mowoshatha kukulukulu seni, mudzwala mbewu mu hwunde dze lukoba, ng'ombe dzenyu ne madonki enyu zwifula nge kusununguka.