Read Kalanga Isaya 33 Bible Online

Isaya 33 - Kalanga bible

Isaya 33

¹Yee mme wee, wapalala iwe nkolomodzi, koga iwe usathu ukakolomodziwa, iwe unowonga, koga iwe kusina unokuwonga. Unowoti umisa kukolomodza, iwe ukakolomodziwa, ha umisa kuwonga iwe unowowongiwa.

²Yahwe mutihwile ngoni, takalinga kumuli. Ibeni masimba edu mangwanana mamwe ne mamwe, mube jidzo ledu mu nsi we manikano.

³Nsindo we kudzongeka ha uhwika, bathu banotizha, ha mumilika, zwitjaba zopalala.

⁴Thundu yenyu inowokubulugwa itapiwa, kukanga papinda mashonja eja asingasiye tjimwe, kukafanana ne papinda phashu.

⁵Yahwe ngabakudziwe, banogala pezhugwizhugwi, banowowatsha kutambunuka ne ndulamo mu Ziyoni.

⁶Ndibo kudzikama kwe misi yenyu, jidzo ne butjenjedu ne zibo, kutjika kwa Yahwe ndiko fumwa ye Ziyoni.

⁷Bonani, ngamula dzabo dzolila mu dzizila, thumwa dze mbakiso dzolila kunogwadza.

⁸Zila hwulu dzatizhiwa, bayendi akuna wabo umu zila. Tjidumano tjatjinyika, batendeki batjo banolengudziwa, akuna unotetiwa.

⁹Shango inolila inotimbama, Lebanoni yakahwumana inowoma, Sharoni iyo yanga tjilambanyika, ku Bhashani ne Karimeli mazhani anoshashamuka.

¹⁰“Ndowomilika ngwenu, ndowokudziwa ngwenu, Koleba Yahwe. Ndowolakidza bukulu gwangu.

¹¹Mowozwisenga bunye, mukatshibama malala, meya yenyu moto unowomupisa.

¹²Bathu banowotshwa bakasala benga suko, benga mihwa yatemegwa pasi ibe ipisiwa nge moto.”

¹³Imwi bakulekule, ihwani tjandakashinga, namwi bapejo dumani masimba angu.

¹⁴Batjinyi mu Ziyoni banolobgwa nge hana, basina Ndzimu banotetema. “Ndiani mu tili ungatjila ne moto unopisa kene? Ndiani mu tili ungatjila ne mithuto isingapele?”

¹⁵Ibabo banotjila zwakalulwama beleba tjakatambunuka, ibabo banolambana ne kutshambilidza, be wuzwila kutjena tjizwimbanlomo basingatjiamutjile, bezwina zebe dzabo kuti dzisihwe ngekwe kutebula malopa ne mesho abo be avululwata kuti asibone tjakabipa,

¹⁶ndibo banowogala mu magalo apezhugwi. Matizhilo abo anowobe matombo akasima. Banowopiwa zojiwa zwabo ne vula abangaishete.

¹⁷Mesho enyu anowobona mambo mu bubuya gwabo, mowobona shango yakatalabudzika.

¹⁸Mowokumbula ngekwe kutja kwakatongobepo. Mowozwibhuzwa muti, “Ungayi wakatongobe ana simba, iye wakabe elipisa lukhetho? Ungayi wakabe ebala dzithungamakole?”

¹⁹Akuna sada dzamutjawobona, bathu be lulimi gusingahwike gwausingake uka guziba, lulimi gunonga nthu ekakang'wa, gusingahwike.

²⁰Linga Ziyoni, nzi nkulu we mizano yedu yabigwa. Mesho enyu anowobona Jerusalema, magalo ana kunyalala, nshasha ugele usina tjingaazunguza, una phanda dzisingasimuke, ne misungo yakawusunga ayingathubuke.

²¹Ngono ikweno Yahwe banowobe bali ibo Bakasima, magalo ana njizi phabi ne woba, kusina migoro ye zwita ingayenda mu dzili, kene zwikepe zwakasima zwingapinda po.

²²Ngoti Yahwe ndibo nsumikilisi wedu, Yahwe ndibo mbusi wedu, Yahwe ndibo mambo wedu ngono banowotitjidza.

²³Misungo ye ikepe tjenyu yakanyeba, ingatubule kumisa bhangwana le ikepe mu magadziko alo, ingatubule ne kutambunudza saile le ikepe. Ngono ipapo towotapa thundu njinji tikaikobana, ne tjilema tjowotapabo thundu.

²⁴Bagali be Ziyoni akuna unowotongoti, “Imi ndogwala.” Bathu banogala ikoko banowozwiibhatigwa matjinyo abo.