Read Kalanga Isaya 34 Bible Online

Isaya 34 - Kalanga bible

Isaya 34

¹Sedzelani pejo imwi zwitjaba muhwe, imwi bathu, bhulutanani! Shango ngayihwilile na kose kumuili, lubumbo na kose kunodwa muguli.

²Ngoti Yahwe bakagwadzila moyo njudzi dzose, bazhelile bushongola babhayani badzo bose. Bapedza nge kwabo kuti babulawe.

³Babulawa babo banowolashigwa kutjena, nnuwo we zwitumbu zwabo unowosilinga, matombo anowowunga malopa abo.

⁴Mibunga ye zhuzhugwi inowonyawuka, zhuzhugwi kowopetana se lukwalo. Kose ku zhuzhugwi kowoshashamuka, kuwila pasi se mazhani e nzhambi awoma, kene phaya dzakaswaba.

⁵Thumo langu lakavunga malopa kudzimu, ngono bonani lowodelukila kusumikilisa Edomu, mu bathu bandakasumikilisila.

⁶Yahwe bana thumo lakavunga malopa, lakapushikana mafuta, lakazhola malopa e pkhwizana ne e mbudzi, lina mafuta e so dze nyundo. Yahwe bana tjibhayilo ku Bhozira, kowobulawa bathu banjinji mu shango ye Edomu.

⁷Nyati dzowofa nabo, mikong'wana yadzo ne mikono yadzo yakasima. Shango yabo inowozhala malopa, mavu pasi anowotshutshuma nge mafuta.

⁸Ngoti Yahwe bana zhuba le kubgwilizila, gole le kulakidza tjimo tje Ziyoni kuti tjakatambunuka.

⁹Hwoba dze Edomu dzowoshandugwa dzikabe ikontiri, mavu akabe sibabuli, shango iye inowobe ikontiri tjinopisa.

¹⁰Kowotshwa siku ne sikati kusingadzimiwe, busi gwayo gowomilikila pezhugwi gusingame. Shango inowogala yakashakala kuyenda nge zwizekugwana, akuna unowopinda eipalama kakale.

¹¹Kowobe magalo e mafukumudzi nabo shoni, zwikundamwenyu ne makungubo zowogala mukati. Banowozhisa kuhwumana muili ne kushangashangana kwe bakudziwa babo.

¹²Akutowobe ne mbuso wa bomambo ikweno, ne makombgwa ayo anowobe asitjimwe.

¹³Mihwa inomela mu matizhilo ayo, kowobe ne zwitambaphowu ne kungubo mu matizhilo ayo. Phungubgwe dzogala muili, ne mafukumudzi anowobaka ikoko.

¹⁴Thilili dzowoshangana ne phele ikoko, meya mibiibi inowodanana ikoko, ne phuka dze busiku dzowonyaluluka ikoko.

¹⁵Gunda lowobaka shaka lalo ikoko, likabigila mabumbulu likaphophonya likabubatila bana balo, maphangwana matema naiwo, limwe ne limwe ne nkwinya walo anowokubungana ikoko.

¹⁶Shakisisa ubale mu lukwalo gwa Yahwe. Akuna tjimwe tjaizwezwi tjinowobe tjisipo, akuna tjinowobe tjisina nkwinya watjo. Yahwe bakakuleba nge nlomo wabo, ne meya yabo yakazwikubunganya.

¹⁷Yahwe ndibo bakazwikobela magalo, ngono zowogala muili nge kusingapele, kudwa mu tjizekugwana kuyenda ku tjizekugwana, zowotjilila muili.