Read Kalanga Isaya 35 Bible Online

Isaya 35 - Kalanga bible

Isaya 35

¹Tjilambanyika ne shango yakawoma zowoshatha, tjilambanyika tjowothinila tjikashatha, tjowofanana ne luba.

²Tjowothinila tjikathinila nge kushatha tjikamba. Tjowopiwa gudzo le Lebanoni, bubuya gwe Karimeli ne Sharoni. Zowobona gudzo la Yahwe, bubuya gwe Ndzimu wedu.

³Simisani maboko asakasima, musimise ne zwidwi zwinotedukana.

⁴Idwa ibabo bana moyo ina kutja uti, “Simani, musitje. Ndzimu wenyu uyapo. Unowozha kubgwilizila nge shamu yakabangalala. Unowozha ukamutjidza.”

⁵Ipapo mesho e mapofu anowobona, ne zebe dze mabhubuzebe dzowohwa,

⁶ipapo zwilema zowotamba se phembgwe, ne ndimi dze mbebebe dzowomba nge kushatha. Vula dzowodwilila mu tjilambanyika, hwobana dzikawunga mu tjilambanyika.

⁷Nsetje unopisa unowoshanduka ukabe dziba, pasi pakawomelela panowobe nsenya, panogala phungubgwe kowomela bushwa ne shanga ne sengezi.

⁸Kowobe ne zila hwulo ikweno, ngono inowodang'wa Zila yakayengemala. Bakatemapala abatowoyenda muili, koga inowobe zila ye bathu be Ndzimu. Akuna n'yendi muili ungalashika kene tjilengwe atjingalashike.

⁹Akuna shumba ingabe po muili, kene tjibandana tjinozandabula akuna tjingatshamba muili, azwitowowanika ikweno, koga bakadzutunugwa banowoyenda muili.

¹⁰Ibabo bakadzutunugwa ba Yahwe banowobuya ku Ziyoni bakashatha nge njimbo. Kushatha kusingapele kowobe mubali. Banowowana kushatha ne kupululudza, buyendasi ne tjililo zowopela mu bali.