Read Kalanga Isaya 38 Bible Online

Isaya 38 - Kalanga bible

Isaya 38

¹Kwakati mu mazhuba iyawo Hezekiya kagwala kwaakabe pejo ngofa. Isaya nlebesambeli nkololo wa Amozi, kayenda kunli kan'dwa kati, “Yahwe bakati, ‘Lulwamisa zwe nsha uwo ngoti unowofa, autowopola.’ ”

²Ipapo Hezekiya kashanduka kalinga ku guma ngono katembezela Yahwe eti,

³“Yahwe ndomukumbila, alakanani sekwa ndakatjila mbeli kwenyu, ndigalikabgwe nge buzhalo, ndishinga nge moyo wangu wose kakale ndishinga zwakanaka mbeli kwenyu.” Ngono Hezekiya kalila zwinogwadza.

⁴Ipapo dama la Yahwe likazha kuna Isaya liti,

⁵“Yenda uswike udwe Hezekiya uti, ‘Yahwe Ndzimu wa Dafite tate babo bakati, Ndahwa ntembezelo uwo ne mishodzi iyo ndaibona, ngono bona, ndowopaphidza butjilo gugo nge makole ali gumi lina makole ali mashanu.

⁶Ndowokusunungula iwe ne nzi iwoyu nkulu akudusa mu simba la mambo we Asiriya, ndowogwila nzi nkulu iwoyu.

⁷“ ‘Tjilakidzo ku kuli yetji tjinodwa kuna Yahwe, tjinolakidza kuti Yahwe banowoshingikadza ikoku kwabagadzabgwe,

⁸Bona, ndowothama kuti ntutshi wathamiwa nge deluka kwe zhuba thambo dzili gumi mu datho la Ahazi ubgwilile shule thambo dzili gumi.’ ” Ndizo zhuba likabgwilila shule thambo dzili gumi dzalakabe ladeluka.

⁹Mambo Hezekiya wakati apola kakwala ekudza Ndzimu eti,

¹⁰Ndakati, “Mugaswa le mazhuba angu ndakafanila ndiyende, ndingine mu shango ye bafi, kwandinowopitshila mazhuba angu asalako.”

¹¹Ndakati, “Anditowobona Yahwe mu shango ye batjili, anditowotongobona bathu kakale, anditowotjazwibona ndili pakati kwe bagali be shango ino.

¹²Bugalo gwangu gwakadusiwa pandili se nshasha we nlisi, butjilo gwangu gwakapombiwa se jila le nluki, ngono bakandithubula mu bhangwana le nluki, siku ne sikati mukandisedzedza ku bhelelo,

¹³ndakalila busiku gose ndishaka bhatsho, ngono bakavuna mafupa angu se shumba, siku ne sikati mukandisedzedza ku bhelelo.

¹⁴Ndakalila se nyenganyenga ne twiyitwiyi, agomela se njiba. Mesho angu akanyala ngolinga pezhugwi. She wangu imi ndadziila, buyani mundibhatshe.”

¹⁵Koga ini tjandingaleba kene? Kana bakalebeleka nami, ngono ibo nge kwabo ndibo bakakuthama. Wope dzangu dzikandisiya nge kugwadzika kwangu.

¹⁶Yahwe, zwithu izwezwi bathu banotjila nazo, ngono butjilo gwangu gumu zwithu zose izwezwi. Mundipeni mamuko mu nditjidze.

¹⁷Dumbu kudziyila ikoku kwakandiwila kuti ndibuigwe, koga nge ludo gwenyu makanditjidza kuti ndisiwile mu gomba le golomodzo, ngoti makalashila zwibi zwangu shule kwenyu.

¹⁸Ikumbu atjinga muboke, lufu agunga mukudze, ibabo banodelukila mu gomba abangabe ne kugalabgwe mu kugalikamoyo kwenyu.

¹⁹Banotjila, banotjila, ndibo banomuboka, sekwandinothama mu zhuba lino, botate banozibisa bana kugalikamoyo kwenyu.

²⁰Yahwe banowonditjidza, ngono towomba tilidza zwilidzo zwe misungwana mazhuba wose e butjilo gwedu, mu Ng'umba ya Yahwe.

²¹Isaya wakabe ati, “Katshakatshani mazhani e mpaya, muanamatidze pa londa kuti ndizo apole.”

²²Hezekiya naiye wakabe ati, “Tjilakidzo ndi tjipi tje kuti ndowoyenda ku Ng'umba ya Yahwe?”