Read Kalanga Isaya 4 Bible Online

Isaya 4 - Kalanga bible

Isaya 4

¹Muzhuba ilelo bakadzi bali kutendeka banowobhata nlume ng'ompela bebe beti, “Iswi towoja zojiwa zwedu, tikaambala zwiambalo zwedu, koga utiletje tidang'we nge zina lilo kutidusa shoni.”

²Mu zhuba ilelo lutabi gwa Yahwe gowopasula gukanaka, mitjelo ye shango inowobe gudzo ne dendo ku malimbelimbe e Iziraela.

³Mmwe ne mmwe wakasala mu Ziyoni, ngono ali mu Jerusalema, unowodang'wa wakayengemala, mmwe ne mmwe wakakwagwa ali unotjila mu Jerusalema.

⁴Kowoti She bengudza bakololokadzi be Ziyoni bakadusa shambgwa yabo, banowosuka misilizi ye malopa mu Jerusalema nge meya ye kusumikilisa ne meya ye moto.

⁵Ipapo Yahwe banowozhisa gole ne busi pezhugwi kwe Dombo le Ziyoni na pezhugwi kwabo bose banokubungana, gole ne busi masikati ne tjedza tje moto unothuta busiku, pezhugwi kwe tjedza tjose kowobe ne mbakililo.

⁶Kowobe nshasha, ntutshi mu masikati, kukabe dizhilo ne mbakililo mu matutu ne mu vula inona.