Read Kalanga Isaya 40 Bible Online

Isaya 40 - Kalanga bible

Isaya 40

¹Nyaladzani, nyaladzani bathu bangu, koleba Ndzimu.

²Lebelekani ne Jerusalema nge matama anotebamisa, milidzani hwi mu babudze kuti tjibaka tje bulanda gwabo tjapinda, shamu ye zwibi zwabo yadusiwa, shamu yabakabe balobgwa ndi Yahwe bepaphulula ngekwe zwibi zwabo.

³ Mima yahwika iti, “Lulwamisani zila ya Yahwe mu tjilambanyika, temelani Ndzimu wedu zila yakatambunuka mu tjilambanyika.

⁴Nkuku mmwe ne mmwe uvukidziwe, dombo limwe ne limwe ne duthu limwe ne limwe lidusiwe, pasi pasakalizalizana panowolizalizana, pana makombakomba kowolulwamisiwa.

⁵Ipapo gudzo la Yahwe lowozumbunugwa, ngono bathu bose banowolibona bose ngoti Yahwe balebeleka.”

⁶Hwi lohwika liti, “Mimila.” Ngono ashandula nditi, “Ndowomimila ndilebani?” Bathu bose banonga bushwa, gudzo labo longa le maluba e shango.

⁷Bushwa gowoma, maluba anotimbama, ha meya ya Yahwe iya fula, bathu malebeswa banonga bushwa.

⁸Bushwa gowoma, maluba anotimbama, koga dama la Yahwe liyapo nge kusingapele.

⁹Tathila pezhugwi kwe dombo lefu, iwe Ziyoni nzibisi we ndebo mbuya, milidza hwi lilo wakasima, iwe Jerusalema, nzibisi we ndebo mbuya, ulimilidze, usitje, leba etji ku mizi mikulu ye Juda, “Bonani, Ndzimu wenyu woyoyu.”

¹⁰Bonani, She Yahwe banozha nge simba, banowobusa nge masimba abo, bonani mbhayilo wabo banawo ne mbuzilo yabo bakayisenga.

¹¹Banowofudza ngubi yabo se nlisi, banowokubunganyila pkhwizana pabali, bakadzisenga nge maboko abo, bomayi bakabatungamila be dzinanayidza.

¹²Ndiani wakayela vula nge mukati kwe tjiazha tjitje ngono kalizanya kudzimu nge bupabi gwe tjiazha tjitje Ndiani wakalizanya hwuluba ye shango kabuya kakala matombo mu tjilizanyo ne matuthu kaalizanya kene?

¹³Ndiani wakahwisisa meya ya Yahwe, kene kabadiya se nlayi wabo?

¹⁴Ndiani wabakakumbila kubapa tjedza ne kubadiya tambunuko kene? Ndiani wakabapa zibo, kabuya kabapa hwisiso kene?

¹⁵Bonani, zwitjaba kuna Yahwe zonga dokhwe le vula mu ali, zotogwa se hwuluba ipezhugwi kwe tjilizanyo, bonani, banotola zwigwizi se hwuluba yakanathika.

¹⁶Lebanoni ayingabe ne hwuni dzakalizana, kene phuka dzayo adzingathame tjibhayilo tjinopisiwa tjakalizana.

¹⁷Zwitjaba zose zonga kusina tjimwe mbeli kwabo, ku bali zotogwa se kusina tjimwe.

¹⁸Ndiani kene wamungafananya ne Ndzimu? Nditjipi ifano tjinga fanana nawo?

¹⁹Ifano tjakabezhiwa, mbezhi wakatjibezha, nthuli we golide katjidzulula nge golide, katjithamila milipo ye siliva.

²⁰Usingatubule siliva kene golide, unoshalula nti wakasima usingabole, ebe eshaka nyambi mu kubezha, ebe ethama ifano ebe etjigadzika kwatjisingake tjikatenyenguka tjikawa.

²¹Apa amutoziba kene? Kene amuzohwa? Apa amuzotongohwisisa kene kudwila mu kubambiwa kwe shango?

²²Iye ugele pezhugwi kwe denga le shango, bagali mu shango kunli banolingika se zwipombobushwa, unotambunudza kudzimu se jila, unokutambunudza se nshasha ungagagwa muuli.

²³Unothama makombgwa kasibe tjimwe, babusi be shango bakasinge tjimwe.

²⁴Konga mbewu inoti itjalimigwa koga, itjadzwagwa koga mu mavu, itjati inokula, bebe beifula ibe iwoma, tjampupudze tjibe tjiiwulusila kutjena se bunye.

²⁵Ndiani ngono wamungandifanidzanya naye? Kene ndiani unolizana nami? Koleba Wakayengemala.

²⁶Milidza mesho awo ulinge pezhugwi ngono ubone, Ndiani wakabumba kose ikoku? Ndiye unozhisa nyenyedzi dzose edzidana, imwe ne imwe nge zina. Ngoti una masimba makulu ne matatabuko akuna ne ing'ompela isipo.

²⁷Ini ulebeleka saikoku iwe Jakubo? Ini ulebeleka iwe Iziraela uti, “Zila yangu yakasumbikika, Yahwe abatoibona ne fanilo dzangu Ndzimu abana hanya nadzo?”

²⁸Apa amuzobona? Kene amuzohwa? Yahwe Ndzimu kusingapele, Mbumbi we phelelo dze shango. Abatotimbama kene kuli kunyala, kuhwisisa kwabo akungashakisiswe kukahwisisika.

²⁹Banopa simba banotimbama, bakasimisa basina matatabuko.

³⁰Bazhuzha naibo banowotimbama bakanyala, batjetjana banowotshatsharika bakawa.

³¹Koga ibabo banobhatilila muna Yahwe banowomusidzila matatabuko abo. Banowowuluka nge mapapilo se madzu. Banowolabuka ngono bakasinyale, banowoyenda ngono bakasitimbame.