Read Kalanga Isaya 41 Bible Online

Isaya 41 - Kalanga bible

Isaya 41

¹Nyalalani munditeedze, imwi shango dzimu tjekelo dze gungwa, bathu ngabamusidzile matatabuko abo, ngabasedzele ngono balebeleke, ngatishanganeni pa lubazhe panosumikilisigwa.

²Ndiani wakaweba nkundi kudwa ku bhezhuba, endana nge ndulamo kuwoshinga nshingo uwe? Banolonga zwitjaba mu maboko awe, bakatebamisa bomambo pasi kukwe. Unobatemela pasi nge bukanu gugwe bakanga hwuluba, unobapaladza nge dati lile bakanga bunye guwulusiwa nge phepo.

³Unotatana nabo koga edwilila kusina tjinodziidza, ali mu zila yaasakatongo tshamba.

⁴Ndiani kene wakakuthama ikoku? Ndiani wakasika njudzi kudwa mu kutangisa? Imi Yahwe ndimi ndakabe ndilipo mu kutangisa, ne ku bupelo ndowobe we bupelo.

⁵Shango dzimu tjekelo dze gungwa dzakabona dzikatja, phelelo dze shango dzakatetema, dzakasedzela pejo dzikazha.

⁶Imwe ne imwe inobhatsha mbakidzani wayo, ikadwa ikamu tjayo ikati, “Sima.”

⁷Mbezhi unokulumbidza nthuli we golide, unobuyapidza nge hamuli unokulumbidza unokatshakatsha kupa mbumbiko eti, “Kwakanaka.” Banobhatshanya ifano nge zwipikiri kuti tjisitongo zunguzika.

⁸Koga iwe Iziraela, nlanda wangu, iwe Jakubo wandakashalula, ludzi gwa Abhurahama nzwalani wangu.

⁹Ndakakutola ku phelelo dze shango, ndakakudana kudwa mu midzibo ikule nditi, “Iwe unlanda wangu, ndakakushalula, andizokulashila kutjena.”

¹⁰Usitje ngoti imi ndinawe, usitemeke mafupa ngoti ndi Ndzimu uwo. Ndowokusimisa, ndowokubhatsha. Ndowokutabila nge luboko gwangu gwakalulwama gwe luji.

¹¹Bona, bose bakakugwadzila moyo banowobhakhwa nge shoni bakashushubala. Banogwa nawe, abatowobe tjimwe ngono banowoloba.

¹²Unowobashaka ibabo banogwisana nawe, koga awutowobawana, ibabo banogwa nawe abatowonga tjimwe.

¹³Ngoti imi Yahwe Ndzimu uwo ndakakubhata nge luboko gwe luji. Ndimi ndinokudwa nditi, “Usitje, ndowokubhatsha,”

¹⁴Usitje iwe gonye Jakubo, imwi balume be Iziraela, ngoti imi ndowomubhatsha. Koleba Yahwe. Ndzutunuli wenyu, Wakayengemala we Iziraela.

¹⁵Bonani, ndowomuthama tjileyi tjinoshokola, tjitshwa tjina meno anopitsha. Mowoshokola matombo mukaapkhwanya, matuthu iwo moasiya enga bunye.

¹⁶Mowobawulusa ngono phepo ikabasengela kutjena, dutu ilo lowobapaladza. Ngono ipapo mowoshatha muna Yahwe, muna Wakayengemala we Iziraela mowokudza.

¹⁷Bashayi ne banosheta ha beshaka vula, koga vula kusina, ngono bawoma nge nyota, imi Yahwe ndowobadabila. Imi Ndzimu we Iziraela andingabalashe.

¹⁸Ndowothama njizi pezhugwi kwe shongwe dzipa lubala, ne misenya ye vula mu mikuku. Ndowothama dziba le vula mu tjilambanyika ne mu shango yakawoma kowobe ne misenya ye vula.

¹⁹Mu tjilambanyika ndowomedza misida ne miwunga ne miritile ne mitoba, mu tjilambanyika ndowomedza misipuri, ne mitjetjeni ne miti ye payini,

²⁰kuti bathu babone bazibe, bakumbule bahwisise, kuti luboko gwa Yahwe gwakakuthama ikoku, kuti Wakayengemala we Iziraela wakakubumba.

²¹Yahwe bakati, “Bikani ndebo yenyu, lebani tjamunong'ong'ola ngekwatjo.” Kojalo mambo wa Jakubo.

²²Zhisani zwifano zwenyu zwitibudze tjinowoshingikala. Mutibudze kuti zwe kutanga kushingikala ndi zwipi, ndizo tizwikumbule, ngono tizibe bheledzo lazo, kene mutibudze zwinozha.

²³Mutibudze tjinowoshingikala kudwa ipapano, kuyita kuti tizibe kuti mu midzimu, thamani tjakanaka kene tjakabipa, kuyita kuti tipaluke moyo titje.

²⁴Bonani, nge malebeswa amutemuli tjimwe, ne tjamungashinga akuna, ha alipo ungamushalula unoshimika.

²⁵Ndakadzonga mmwe ku bunandzwa, ngono unozha edwa kunobhuda zhuba unowodana zina langu. Unotshamba babusi se unotshamba vu, se mbumbi esinyanga ntapkhwi.

²⁶Ndiani wakakuleba kudwa mu kutangisa, kuita kuti tizibe, ndiani wakakuleba kusathu kukabepo, kuita kuti titi, “Unolebesa.” Akuna wakakuleba, akuna wakakuzibisa, akuna wakahwa matama enyu.

²⁷Ndimi we kutanga kukuzibisa Ziyoni, ndakamilidza hwi abudza Jerusalema ndebo mbuya.

²⁸Koga ha ndilinga akuna ne ng'ompela, pakati kwabo akuna nkumbuludzi ungati ha ndibhuzwa kandidabila.

²⁹Bonani, bose koga abateli tjimwe, akuna tjabangathama. Midzimu yabo ye zwifano aiteli tjimwe.