Read Kalanga Isaya 42 Bible Online

Isaya 42 - Kalanga bible

Isaya 42

¹ Bonani nlanda wangu wandinotabila, nshalugwa wangu, iye unondishathisa, ndalonga meya yangu mu nli, unowozhisa kutambunuka mu zwitjaba.

²Aatowohwika emimila kene elebeleka nge hwi lipezhugwi mu zila.

³Lushanga gwakazaruka aatowoguvuna, ne luvone gunobonyabonya aatowogudzima, nge kugalikamoyo unowozhisa kutambunuka.

⁴Haangatimbame kene kanyala moyo kuswikila a zhisa kutambunuka mu shango, ne shango dzimu tjekelo dze gungwa dzimilile nlayo uwe.

⁵Ndzimu, Yahwe, ibo bakabumba kudzimu bakakutambunudza, ibo bakawala shango ne tjimwe ne tjimwe tjinodwa muili, ibo banopa bathu bamu ili meya ye kufema ne butjilo kuna ibabo banoyendayenda muili bakati,

⁶“Imi ndimi Yahwe, ndakakudana mu ndulamo, ndakakubhata nge luboko akulondolodza, ndakakupa bathu se tjidumano, uli tjedza ku zwitjaba,

⁷kuzhula mesho akapofupala, kudusa basungwa mu ng'umba ye busungwa, kubadusa mu zhalima ibabo bagele mu lili.

⁸“Ndimi Yahwe, ndilo zina langu ileli, gudzo langu andina wandinolipa kene dendo langu andingalipe zwifano.

⁹Bona, zwithu zwandakaleba zwakabepo, ngono ngwenu ndoleba zwithu zwitshwa zwisathu zwikashingikala, ndomubudza ngekwazo.”

¹⁰Mbilani Yahwe lumbo lutshwa, dendo labo ngalidwe ku bhelelo le shango, imwi banodelukila ku gungwa na zose zwimu lili, ne shango dzimu tjekelo dze gungwa ne bagali badzo.

¹¹Tjilambanyika ne mizi yatjo ngazwimilidze hwi lazo, ne mizana kwakabaka Kedari, bagali be Sela ngabambe nge kushatha, ngabambe nge mahwi apezhugwi kudwa pezhugwi kwe matombo.

¹²Ngabakudze Yahwe, ne dendo labo ngalihwike mu shango dzimu tjekelo dze gungwa.

¹³Yahwe banobhuda betshamba se nlume wakasima, betshamba se mbhayani bezhala bushongola, banomilidza hwi, bemimila mima ye ngwa, belakidza simba linokunda zwita zwabo.

¹⁴Ndakanyalala kwe tjibaka tjilefu, ndakati adzikama azwidziba, koga ngwenu ndowolila se nkadzi ali mu zwibhayo, ndowogomela afemeleka.

¹⁵Ndowokolomodza matombo ne matuthu, ndowomesa zose zwinomela pezhugwi kwawo, ndowoshandula njizi dzikabe zwigwizi ne madziba ndowopkhwisa.

¹⁶Ndowotungamilila mapofu mu zila dzabasakatongo ziba, mu zijana dzabasakatongo ziba ndowobakweba. Ndowoshandula zhalima li mbeli kwabo likabe tjedza, pasi pasakalizalizana ndowopalizalizanya. Ndizo zwithu zwandinowothama izwezwi, ngono anditowobasiya boga.

¹⁷Ibabo banogalabgwe mu midzimu yakabezhiwa, banodwa zwifano zwakabezhiwa beti, “Imwi mu midzimu yedu.” Banowoshandusigwa shule bakabhakhwa nge shoni kwazo.

¹⁸Hwililani imwi mabhubuzebe, namwi mapofu lingani mubone.

¹⁹Bhofu ndiani ha asi nlanda wangu, kene ndiani ubhofu se ntumwa wangu wandinotuma kene? Ndiani ubhofu saiwoyu wakazwipa mu ndili kene, kene ubhofu se nlanda wa Yahwe kene?

²⁰Wakabona zwinjinji, koga ukazwishaila hanya, zebe dzidzo dzakazhuka, koga akuna tjaunohwa.

²¹Kwakashathisa Yahwe ngekwe ndulamo yabo kuti bakudze nlayo wabo baumilidze.

²²Koga aba bathu bakatapigwa bakatolegwa, bakateyiwa nge mapuzhu bakawila muali bakasumbikiwa mu ng'umba dze busungwa, babe batapiwa basina ungati, “Ngababgwiliziwe.”

²³Ndiani wenyu ungateedza ikoku, kene unoyela njele tjinozha?

²⁴Ndiani wakalonga Jakubo mu kutapiwa, ndiani wakalonga Iziraela mu maboko e batoleli? Apa ate bali Yahwe, ibo batakatjinyila kene? Ibo batakalamba kuyenda mu zila dzabo, ne nlayo wabo tilamba kuulondolodza kene?

²⁵Ndizo wali Yahwe bakabagwadzila moyo, nge bushongola gwe ngwa. Bushongola gukathuta mu bali se moto, nenguba kwakajalo abazohwisisa, gukabapisa se moto, koga bakasibe ne hanya nako.