Read Kalanga Isaya 43 Bible Online

Isaya 43 - Kalanga bible

Isaya 43

¹Ngono ngwenu yetji nditjo tjinolebgwa ndi Yahwe, ibo bakakubumba iwe Jakubo, ibo bakakuthama iwe Iziraela bakati, “Usitje, ngoti ndakakudzutunula, ndakakudana nge zina, iwe uwangu.

²Unowoti upalama vula, ndowobe nawe, kene utjuluka njizi adzitowokusenga. Ha upalama moto awutowokupisa, mithuto yawo ayitowokupisa.

³Ngoti ndimi Yahwe, Ndzimu uwo, ndi Wakayengemala we Iziraela, Ntjidzi uwo. Ndodusa Egipiti se tjidzutunulo tjitjo, ne Etopiya ne Seba ndobatenganya nawe.

⁴Se udika kundili kakale ukudziwa, kakale ndikuda, ndodusa bathu mu tjimo tjitjo, ndokutenganya ne zwitjaba kuti utjile.

⁵Usitje, ngoti ndinawe, ndowodusa bana babo kudwa ku bhezhuba, ndowobakubunganya ne kudwa ku golombedzo.

⁶Ku bunandzwa ndowoti, ‘Ubazhise.’ Burwa ndowogudwa ati, Usibabhatilile. Zhisani bakololo bangu kudwa kule, ne bakololokadzi kudwa ku ndzibo we shango.

⁷Mmwe ne mmwe wandakadana nge zina, wandakabumbila gudzo langu, wandakabumba kakale athama.”

⁸Zhisani bathu ibaba bana mesho basingabone, bana zebe koga abatohwa.

⁹Kubunganyani zwitjaba zose, bathu ngabakubungane. Ndiupi mu bali wakaleba ikoku, katibudza kutji kale zwithu zwe kutanga? Ngabazhise batendeki babo kutendeka kuti banolebesa, kuti bamwe bahwe bati, “Ku malebeswa.”

¹⁰Imwi mu batendeki bangu, kojalo Yahwe ne nlanda wangu wandakashalula, kuti muzibe mugalemoyo mu ndili ne kuhwisisa kuti ndi iye. Akuna ndzimu mmwe wakatongo bepo mbeli kwangu, naiko akuna unowobepo shule kwangu.

¹¹Imi, ndimi Yahwe, kuzhe kwangu imi akuna ntjidzi.

¹²Ndakakuleba kusathu kukabepo atjidza azibisa pakabe kusina ndzimu we butaya pakati kwenyu, kakale mu batendeki bangu, koleba Yahwe.

¹³Ndi Ndzimu ne kuyenda mbeli ndowogala ndili iwo. Akuna ungasunungula umu maboko angu, tjandinothama akuna ungatjibgwiliza shule.

¹⁴Yahwe banolebeleka, ibo Ndzutunuli wenyu, ibo Wakayengemala we Iziraela bakati, “Ndowotuma ngwa kunobhayana ne Bhabhiloni nge kwenyu, ndowovuna panda dze mikoba, Bakhaladiya mima yabo inowobe ye tjililo.

¹⁵Ndimi Yahwe, ndi wenyu Wakayengemala, mbumbi we Iziraela, mambo wenyu.”

¹⁶Yahwe banolebeleka, ibo banozhula zila mu gungwa, banozhula zijana mu vula dzina masimba,

¹⁷ibo banokunda koloyi dze ngwa ne mbizi, ngwa ne babhayani, banowila pasi, bakasitongo muka kakale, kobe kwapela ku bali, bakanga luvone gwadzimiwa.

¹⁸“Musialakane zwithu zwe kutanga, kene kukumbula zwithu zwa ntolo.

¹⁹Bonani, ndabe pejo ngothama tjithu tjitshwa, ngono tjoshingikala kale, amutotjibona kene? Ndowozhula zila mu tjilambanyika ne njizi mu shango yakawoma.

²⁰Phuka dze shango dzowondikudza, phungubgwe ne fukumudzi, ngoti ndodzipa vula mu tjilambanyika, ne njizi mu shango yakawoma, kupa bathu bangu, bashalugwa bangu, vula kungwa.

²¹Bathu bandakazwibumbigwa, kuita kuti bandikudze.

²²“Koga amuzondidana, iwe Jakubo, koga ndakamunyadza, iwe Iziraela.

²³Amuzondizhisila pkhwizi dze zwibhayilo zwinopisiwa, kene kuli kundikudza nge zwipo zwenyu. Andizomulemesela nge zwipo zwe mathunde, kene kumunyadza nge motsha.

²⁴Amuzotongo nditengela pkhwe inozipa nge mari, kene mukandigutsha nge mafuta e zwipo zwenyu. Koga makandikhiga ntolo we zwibi zwenyu, makandinyadza nge milandu yenyu.

²⁵Imi, ndimi tshumula matjinyo enyu nge kwangu, kakale andingakumbule zwibi zwenyu.

²⁶Ngati yendeni ku lubazhe, munondilakidza nlandu wangu. Bikani ndebo yenyu, ndizo mutendekegwe kuti makatambunuka.

²⁷Tate benyu be kutanga bakatjinya, balebelekeli benyu bakandipandukila.

²⁸Ndizo wali ndolingila pasi batungamili be bugalo gwakayengemala, ngono ndowothama kuti Jakubo akolomodziwe, Iziraela unowosapugwa.