Read Kalanga Isaya 46 Bible Online

Isaya 46 - Kalanga bible

Isaya 46

¹Bheli wakakotama, Nebo wakalembeleka, midzimu yabo yakabezhiwa bakaisenga nge ng'ombe nenge zwimwe zwithuwo, zwifano izwezwi zwamakasenga mitolo inonyadza zwithuwo izwezwi.

²Inolembeleka ikathigama, aingatjidze ntolo, iyo nge kwayo inotapiwa.

³Mundihwilile imwi ludzi gwa Jakubo, imwi malimbelimbe wose e ludzi gwa Iziraela, ibo bandakabhabha kudwa mu kuzwagwa ngono amuguga kudwa mu tjibumbilo.

⁴Ne makwegula imi nditji iye, misholo yenyu ibe mitjena nge vi ndowomuguga koga. Ndakamuthama, ndowomuguga, abuya amutjidza.

⁵Ndiani wamungandifananya naye mukandilizanya naye? Ndiani wamungandibapisa naye kuti tilizane kene?

⁶Ibabo banotebulila golide pasi kudwa mu hwobhodo dzabo, bebe beyela siliva nge zwiyelo, bebe betapa nthuli kuti athame ndzimu, ipapo bebe bethigama beunamata.

⁷Banomilidza iwoyu ndzimu beupika pa thudzi, beusenga, benougadzika mu gumwe bugalo, ube uma ipapo usingatubule kuyenda udwa ipapo pawabigwa. Kene nthu angamilidza hwi ewutembezela, awutodabila kene kunbhatsha muna zwinondziyidza.

⁸Alakanani ikoku mukumbule, mukulonge mu mimoyo yenyu imwi bapanduki.

⁹Kumbulani zwithu zwantolo zwe kutanga. Imi ndi Ndzimu akuna mmwe kakale. Imi ndi Ndzimu akuna mmwe unonga imi.

¹⁰Ndozibisa zwinowoshingikala kubupelo iko kutji mu kutangisa, kudwa mu misi ya ntolo ndakaleba zwitjawoshingikala nditi, Ndongoloso yangu inowoyenda sekwa ndakabiga, ndowoshingikadza mazwimisilo angu.

¹¹Ndodana dzu kudwa ku bhezhuba, kudwa kushango ikule kusipano, ndoweba nlume kuzha kuwoshingikadza mazwimisilo angu. Tjandakaleba nditjo tjandinowoshingikadza, tjandakalongolosa nditjo tjandinowothama.

¹²“Mundihwilile imwi bana moyo mikukutu, imwi bakule ne ndulamo.

¹³Ndosedzedza ndulamo yangu pejo, ate ili kulekule, ne jidzo langu alitowononoka, ndowozhisa jidzo mu Ziyoni, gudzo langu ndolizhisa ku Iziraela.”