Read Kalanga Isaya 47 Bible Online

Isaya 47 - Kalanga bible

Isaya 47

¹Deluka ugale mu hwuluba, iwe mwanadi we Bhabhiloni. Gala pasi pasina tjigalo tje bumambo, iwe nkololokadzi we Bakhaladiya. Nge kuti awungabe utjadang'wa kuyi nnyolo wakatebama.

²Tola gwiyilo ukwiye bgwisa, dusa tukwi iyo mu nsholo, ukanye thako iyo, makumbo awo abe patjena upalame vula utjuluke njizi.

³Unowobonegwa, ne kubhakhwa nge shoni kuko kowobe patjena. Ndowobgwilizila, akuna wandinowosiya.

⁴Ndzutunuli wedu zina lile ndi Yahwe Masimbawose, Wakayengemala we Iziraela.

⁵Gala unyalale, uyende mu zhalima, iwe nkololokadzi we Bakhaladiya. Ngoti awutjowodang'wa nfumakadzi we bumambo.

⁶Ndakabe ndagwadzila moyo bathu bangu, ndakalengudza thaka yangu, abalonga mu maboko awo, ngono ukasibahwile ngoni, ne bakwegula ukabatilika jokwi linolema.

⁷Wakazwidwa ukati, “Ndowobe nfumakadzi nge kusingapele.” Ndizo wali usakalonga zwithu izwezwi mu moyo kene kuli kukumbula kuti konopela kwakatini.

⁸Ndizo ngwenu wali ihwa woku iwe unoda kuzwishathisa nge mizipo, ugele uti wakabakililika, uzwidwa mu moyo uti, “Imi ndimi, akuna mmwe kuzhe kwangu, andingatongobe tjilikadzi kene kuli kulashikigwa nge bana.”

⁹Zose izwezwi zwibili zowokuwila pawakakangang'wa mu zhuba ling'ompela, kulashikigwa nge bana ne butjilikadzi zowokuwila nge buzhalo pakati kwe bung'anga gugo ne simba gulu le masalamusi awo.

¹⁰Wakazwiwana wakadzikama pakati kwe bubi gugo uti, “Akuna unondibona.” Butjenjedu gugo ne zibo iyo zwakakulasha, ngono ukazwidwa mu moyo uwo ukati, “Imi ndimi, akuna mmwe kuzhe kwangu.”

¹¹Mbatsha dzowokuwila, dzausingake ukadusa nge bung'anga gugo, zwibiibi zowokuwila zwausingake ukadusila kutjena nawe, golomodzo lausingazibe nge kwalo lowokuzhila tjinyolotjo.

¹²Dwilila wakasima mu masalamusi awo ne bung'anga gugo gwakawanda, igo gwetjinga gwawakashinga nago kudwila mu butjetjana gugo, pamwe unowowatshika, pamwe unozhisa kutja.

¹³Wanyadziwa nge zwikumbuludzo zwaunopiwa. Ngabazhe ibabo banazibo ngekwe zhuzhugwi bakutjidze, ibabo banozwidiya ngekwe nyenyedzi, banoti mwedzi mmwe ne mmwe ugala bakaleba zwinowokuzhila.

¹⁴Nge malebeswa banonga malala e bushwa, moto unowobapisa ukabapedza. Ibo nge kwabo abangazwitjidze mu nthuto we moto. Ipapa akuna masimbe e moto nthu aangazwidziyisa ndiwo, akuna moto ungadziiwa.

¹⁵Ikoku koga ndiko kwabangakuthamila, ibo ibaba bawakashinga nabo museenyelana kudwa mu butjetjana gugo. Bose banowokusiya, mmwe ne mmwe eyenda nge zila iye, akuna unowosala ungakutjidza.