Read Kalanga Isaya 49 Bible Online

Isaya 49 - Kalanga bible

Isaya 49

¹Mundihwilile imwi shango dzimu tjekelo dze gungwa, teedzani, imwi bathu banodwa kule. Yahwe bakandidana ndisathu azwagwa, ndakati nditji mu tjibumbilo tja mme bakanditumila zina.

²Bakathama nlomo wangu ukanga bukanu gunopitsha, banondisumbika mu ntutshi we tjiazha tjabo, bakandithama anga nsebe wakuswiwa, banondisumbika mu gobhodo labo.

³Ngono bakandidwa bakati, “Iwe u nlanda wangu, mukuli ndowolakidza gudzo langu.”

⁴Koga ndakati, “Ndakashingila masimbamalashe, ndakashingisila matatabuko angu suli ne madatha, koga nenguba kwakajalo tjandakashinga tjikuna Yahwe, mbhayilo wangu uku Ndzimu wangu.”

⁵Ngwenu Yahwe bakati, ibo bakandibumba kube nlanda wabo, kubgwiliza Jakubo ku bali, ne kukubunganyila Iziraela ku bali, ngoti ndakudziwa mu mesho a Yahwe, kakale Ndzimu babe matatabuko angu,

⁶bakati, “Kuthu kutukununu kuti ube nlanda wangu kubuzila njudzi dza Jakubo mu tjimo, ne kubuza bakatjila be Iziraela, ndowokuthama ukabe tjedza ku zwitjaba kuti jidzo langu linoswika ku ndzibo we shango.”

⁷Yahwe bakati, ibo Ndzutunuli we Iziraela ne N'yengemali wayo kuna iwoyu wakalengudziwa, kashimiwa nge zwitjaba, kabe nlanda we babusi bakati, “Bomambo banowokubona, bakamilika, makombgwa iwo banowokuthigamila ngekwa Yahwe ibo banogalika moyo, ibo Wakayengemala we Iziraela bakakushalula.”

⁸Yahwe banolebeleka bakati, “Ndowomudabila mu tjibaka tje kuda kwangu, mu zhuba le jidzo ndowomubhatsha, ndowomulondolodza amuthama tjidumano ku bathu, kubiga shango ne kukoba thaka dzayo dzakabe dzathukudziwa

⁹udwa basungwa uti, ‘Bhudani,’ kuna bamu zhalima uti, ‘Muzwilakidze.’ Banowoja bali mu dzizila, banowowana mafulilo pezhugwi kwe matuthu akathukudzika,

¹⁰abangabhakhwe nge zhala kene nge nyota, kene phepo inopisa ye tjilambanyika kene zhuba azwingabapise, ngoti iye unobahwila zogwadza unowobatungamila, unowobayisa ku misenya ye vula.

¹¹Pana matombo ndowothama zila, zila dzangu phabi dzowomilidzika.

¹²Bonani, banowodwa kulekule, bamwe banowodwa ku bunandzwa bamwe bedwa ku golombedzo, bamwe banowodwa ku ntuthu we Siyene.”

¹³Kudzimu ngakumbe nge kushatha, shango ipululudze nge kushatha, matombo naiwo ngaamilidze mahwi ambe. Ngoti Yahwe banyaladza bathu babo, kakale banowohwila ngoni bathu babo banodziyila.

¹⁴Koga Ziyoni yakati, “Yahwe bakandifupatila, She wangu wakandikangang'wa.”

¹⁵“Apa mme bangakangang'wa mwana wabo wabanomwisa kene, bangasahwila ngoni mwana we tjibumbilo tjabo kene? Ee, kene mme bangakangang'wa mwana wabo zwabo, imi andingamukangang'we!

¹⁶Bonani, ndakamukwala mukati kwe zwiazha zwangu, makuma enyu amu mesho angu tjibaka tjose.

¹⁷Bakololo babo baswika ngolibilidza, ngono ibabo bakakuthukudza banobhuda pa kuli.

¹⁸Milidza mesho awo ulinge kukupoteleka ubone, banokubungana bana babo banozha ku kuli. Nge malebeswa se nditjila, koleba Yahwe, banowonga maseka ku kuli awakaambala kuzwinakisa, kube kufanana ne nlongo akaambala maseka anon'nakisa.

¹⁹“Malebeswa shango iyo izhele matongo yakathukudzika yakashakala, ngwenu inowobe tukununu, inowozhala bagali bayo bakamanikana, ibabo bakabe bakukolomodza banobe bali kulekule.

²⁰Bana bakazwagwa mu tjibaka tje kutapiwa kuko banowolebeleka uhwa beti, ‘Ntuthu iwoyu ntukunusa patili, muutalabudze tiwane patingagala.’

²¹Ngono ipapo mu moyo uwo unowoti, ‘Ndiani wakandizwalila bana ibaba? Ndakabe ndabulayigwa bana kakale ndisitjina mbeleko, ndakabe ndatatiwa ndalambiwa, ngono ibaba bana bakadwa ngayi?’ ”

²²She Yahwe banolebeleka bakati, “Bonani tjinyolotjo ndowomilidza luboko gwangu aweba zwitjaba, ndowomilidzila njudzi dze bathu tjilakidzo tjangu, ngono banowozhisa bakololo benyu bakabafukata, bakololokadzi benyu banobazhisa bakabapika mu mathudzi abo.

²³Bomambo banowobe botate benyu banomulela, bafumakadzi babo bakabe bomme benyu banomumwisa. Banowothigama mbeli kwenyu bakakotamisa misholo bebe benazwa hwuluba imu makumbo enyu. Ipapo mowoziba kuti ndimi Yahwe, ibabo banogalabgwe mundili abatobhakhwa nge shoni.”

²⁴Apa ungatolela mbhayani wakasima thundu yaatapa kene? Batapiwa bangatjidziwa mu ntapi unotjisa kene?

²⁵Koga Yahwe banolebeleka bakati, “Ee, bakatapiwa banowotogwa mu babhayani bakasima, ne thundu yatapiwa inowotogwa mu ntapi unotjisa, ngoti imi ndowobhayana ne unobhayana namwi, ngono bana benyu ndowobatjidza.

²⁶Ndowothama kuti badziyidzi benyu baje nyama ye mibili yabo, banowolaladzisiwa nge malopa abo se nkumbi we zhambi. Ipapo bathu bose banowoziba kuti ndimi Yahwe Ntjidzi wenyu, Ndzutunuli wenyu, iye Wakasima wa Jakubo.”