Read Kalanga Isaya 5 Bible Online

Isaya 5 - Kalanga bible

Isaya 5

¹Ngwenu ndowombila n'diwa wangu ngekwe nnda uwe we mizhambi: N'diwa wangu wakabe ana nnda we mizhambi pezhugwi kwe duthu pana mavu akanaka.

²Wakawutsha kadusa mabgwe; kadzwala mizhambi yakanaka muuli. Kabaka ngadzi pakati kwawo, kabaka ne panoswinigwa nkumbi we zhambi muuli. Kaumilila kuzwala zhambi koga kukazwagwa zhambi dzinoshababa.

³Ndizo wali imwi bagali be Jerusalema namwi bathu be Juda, sumikilisani pakati kwangu ne nnda wangu we mizhambi.

⁴Ini tjimwe tjingabe tjakathamigwa nnda wangu we mizhambi tjandisakathama kene? Ndabe ndakalinga kuwana zhambi dzakanaka koga ini wakazwala zhambi dzinoshababa?

⁵Ndizo wali ndowomubudza tjandinowothamila nnda wangu we mizhambi. Ndowodusa lukuta gwawo ngono unowobe mafulilo, ndowoliga guma lawo ngono unowotshambatshambiwa.

⁶Ndowouletjedza ukabe gula, autowosunuligwa kene kuli kuushakulila, unowozhala kungubo ne mihwa. Ndowodziba makole kasinise vula muuli.

⁷Ngoti nnda we mizhambi wa Yahwe Masimbawose ing'umba ye Iziraela, bathu be Juda tjidzwalo tjabo tjinobashathisa. Yahwe bakabe beda kubona malebeswa koga bakabona kutebuka kwe lopa. Be yemula kubona ndulamo koga bakabona tjililo tje buyendasi.

⁸Yee mme wee! Ibabo banopaphidza ng'umba dzabo nge dzimwe ng'umba bepaphidza minda nge mimwe minda kuswikila kusala kusina bugalo gwe mmwe, mube mugala mulimoga mu shango.

⁹Yahwe Masimbawose bakalebeleka beti, “Nge malebeswa ng'umba idzedzi hwuluhwulu dzowobe matongo, dzose ng'umba idzedzi whuluwhulu dzowosala dzisina bagali.

¹⁰Ndima dzili gumi dze mizhambi dzowobuza galoni dzili tathatu, saka le mbewu likabuza sakana le mathunde.”

¹¹Yee mme wee! Bapalala ibabo banobindukila zwing'o, ibabo banoyedzisa kuswikila pakati kwe busiku, kuswikila balaladza.

¹²Mu mizano yabo bana dende ne tjilidzo tje misungo ili gumi ne thamborini nyele ne nkumbi we zhambi, koga abana hanya nge mishingo ya Yahwe, kene kubona mishingo ye maboko abo.

¹³Ndizo wali bathu bangu banotapiwa ngekusawisisa. Bana mamo mu bali banowofa nge zhala, banjinji banowoma nge nyota.

¹⁴Ndizo wali ikumbu tjomidza mate tjitalabudzika kusingapele. Bakudziwa be Jerusalema ne bunjinji gumuili banodelukila mutjili kang'ompela ne bakashatha muili.

¹⁵Nthu unoisiwa pasi, ne banozwikudza banoyisiwa pasi.

¹⁶Koga Yahwe Masimbawose banokudziwa ngo sumikilisa kwabo kwakatambunuka, Ndzimu Wakayengemala unolakidza kuyengemala kwawo nge ndulamo yawo.

¹⁷Ipapo pkhwizana dzowofula sedzimu mafulo adzo, zwakakodziwa ne mbudzana dzowofula mu matongo e bafumi.

¹⁸Yee mme wee! Bapalala ibabo banokweba zwibi zwabo nge misungo ye manyepkhwa, bekweba bubi gwabo se bakakweba koloyi nge mitjili.

¹⁹Ibabo banoti, “Ndzimu ngaulibilidze, ngaulibilidze kuthama nshingo wawo kuti tiubone. Ngaizhe, ndongoloso ye Wakayengemala we Iziraela ngaizhe, kuti tiizibe.”

²⁰Yee mme wee! Bapalala ibabo banodana tjakabipa beti tjakanaka, bedana tjakanaka beti tjakabipa, banotola zhalima bakalithama tjedza bakatola tjedza bakatjithama zhalima, banobiga tjinobaba mu bumo gwe tjinozipa, tjinozipa mu bumo gwe tjinobaba.

²¹Yee mme wee! Bapalala ibabo bakatjenjela mu mesho abo, beti batjenjedu nge kubona kwabo.

²²Yee mme wee! Bapalala ibabo banozibika nge kung'wa nkumbi we zhambi, nyambi mu kushanganya mikumbi.

²³Mosunungula nthu una nlandu nge tjizwimba nlomo, usina nlandu kalashikigwa nge fanilo dzidze.

²⁴Ndizo wali se moto upisa mashanga ne bushwa gulota mu nthuto, saikoko midzi yabo inowobola ne maluba abo anowuluka se hwuluba, nge kuti bakalamba nlayo wa Yahwe Masimbawose, bakalengudza dama le Wakayengemala we Iziraela.

²⁵Ndizo wali Yahwe bakagwadzila moyo bathu babo, ngono bamilidza luboko gwabo bakabaloba. Matombo akazunguzika, ne zwitumbu zwabo zonga malala mu dzizila. Nenguba kwakajalo kugwadza moyo kwabo akuzopela, luboko gwabo gutjakamilika.

²⁶Yahwe banowomilidzila zwitjaba zwikule tjilakidzo, banoweba nge nlidzo ibabo baku phelelo dze shango. Ibile ababa baswika tjinyolotjo, baswika belibilidza.

²⁷Akuna wabo unonyala kene unotshatsharika. Akuna wabo unotshumwayila kene unoyizela. Mimwandabula yabo akuna wakademba mu thunji ne shangu dzabo akuna ina ntjili wakathubuka.

²⁸Misebe yabo inopitsha ne matati abo akalulwamila kuposa. Thozo dze mbizi dzabo dzakasima se bgwe ne makumbgwana e koloyi dzabo dze ngwa anopoteleka se tjampupudze.

²⁹Tjibombo tjabo tjonga tje shumba, banobomba se shumba tjetjana, dzobomba ha dzibhata tjadzinovima, dzotjisenga kusina tjingadzitolela.

³⁰Mu zhuba ilelo, dzowoubombela kukanga kuwona kwe gungwa. Ngono kowoti nthu elinga shango, unowobona zhalima ne buyendasi, tjedza tjowomidziwa nge zhalima le makole.