Read Kalanga Isaya 50 Bible Online

Isaya 50 - Kalanga bible

Isaya 50

¹Yahwe bakati, “Gungayi lukwalo gwa mmeyabo gunolakidza kuti ndakathubukana nabo mu ndobolo? Kene ndiupi ntengi mu ndili wandakamutengesa kunli? Bonani, makatengesiwa nge zwibi zwenyu, mme benyu bakalambiwa ngekwe matjinyo enyu.

²Ini ndakabe ndizha ndiwana kusina uyapo? Ini ndakati ndidana kukasibe ne wadabila kene? Apa andina matatabuko ekuti ndingamudzutunula kene? Andina masimba ekumusunungula? Ngotjemela koga gungwa gopkhwa, njizi ndingadzishandula dzikabe tjilambanyika, hwobe dzadzo dzowonuwa ngosheta vula, dzikafa nge nyota.

³Ndoambadza zhuzhugwi nge zhalima, athama saka likabe tjiambalo tjako.”

⁴She Yahwe bakandipa lulimi gwe bakadiyika, kuti ndizibe dama landingasimisa bakanyala ndilo. Mangwanana mamwe ne mamwe banondimusa kuteedza, banozhula zebe yangu kuhwa se banodiyiwa.

⁵She Yahwe bakandizhula zebe ngono andizotongopanduka, andizotongo fupatila.

⁶Ndakapa nshongoshongo wangu balobi, shaya dzangu adzipa banondisimula ndedu. Andizotongosumbikila buso gwangu banondisapula bendithwila mate.

⁷Ngoti She Yahwe banondibhatsha, ndizo andingabhakhwe nge shoni. Ndizo ndathama buso gwangu gukanga bgwe, ngono ndoziba kuti andingabhakhwe nge shoni.

⁸Iye unolakidza kuti andina nlandu upejo. Ndiani ngono unganyanyayidzana nami? Ngaabuye tilingisane.

⁹Bonani, She Yahwe ndibo banondibhatsha, ngono ndiani ungati ndi nlandu? Bose koga banowoshakala se tjiambalo, sole dzowobaja.

¹⁰Ndiupi pakati kwenyu unotja Yahwe ngono kahwa dama le nlanda wabo? Ndiani unoyenda mu zhalima asina tjedza kene, koga egalabgwe mu zina la Yahwe, egalabgwe Ndzimu uwe?

¹¹Bonani, mose imwi banobhatidza moto, imwi munothutidza zwisikalala. Yendani mu tjedza tje moto wenyu ne tje zwisikalala zwenyu zwamakabhatidza. Tjamunowowana mu luboko gwangu ndi yetji, mowobumbuluka pasi muli mu zogwadza zwikulu.