Read Kalanga Isaya 51 Bible Online

Isaya 51 - Kalanga bible

Isaya 51

¹“Mundihwilile imwi banotatamila ndulamo, imwi munoshaka Yahwe. Lingani ku shongwe yamakwamugwa mu yili, ne ku gomba lamakatshiwa mu lili.

²Lingani kuna Abhurahama tate benyu ne kuna Sara wakamuzwala. Pandakan'dana wakabe ali nng'ompela koga ngono ankombolela an'wanisa bana banjinji.

³Zwakwako Yahwe banowonyaladza Ziyoni, banowonyaladza matongo ayo wose, ngono banowothama tjilambanyika tjayo tjikanga Edeni, tjilambanyika tjayo tjikanga nnda wa Yahwe. Kushatha ne mpululu zowowang'wa muili, mboko ne njimbo kowohwika muili.

⁴“Mundihwilile bathu bangu, munditeedze itjaba tjangu, ngoti nlayo unowobhuda mundili, ne kutambunuka kwangu kube tjedza tje bathu.

⁵Kusunungula kwangu kosedzela pejo kulibilidza, jidzo langu limu zila laswika, ngono ndowobusa njudzi. Shango dze tjekelo dze gungwa dzakandilindila, nge kugalabgwe mu simba langu.

⁶Milidzani mesho mulinge kudzimu zhuzhugwi, kakale mulinge mu shango pasi, kudzimu kowopela se busi, shango inowoshakala se tjiambalo bagali bayo banowofa se thuzi, koga jidzo langu lowogala nge kusingapele, ndulamo yangu ayingapele.

⁷“Mundihwilile imwi banoziba ndulamo, imwi bathu bana nlayo wangu mu mimoyo yenyu, musitje kutukwa nge bathu, musipaluke moyo ha bemugongobola.

⁸Ngoti sole dzowobaja se dzinoja tjiambalo, zwithusi zowobabhatsha se zwinothusa hwuni, koga kusunungula kwangu kowogalila tjose, ne jidzo langu loyenda nge zwizekugwana zose.”

⁹Milikani, milikani muzwiambadze kusima, imwi luboko gwa Yahwe, milikani se mu mazhuba akapinda, se mu zwizekugwana zwantolo. Apa ate imwi makathubulila Rahabi zwitibhutibhu, ate imwi makabhaya bhophona kene?

¹⁰Apa ate imwi makapkhwisa gungwa, mupkhwisa vula dzakangina, muthama kuti gungwa gwakangina gube ne zila kuti bakadzutunugwa batjuluke kene?

¹¹Badzutunugwa ba Yahwe banowoshanduka bakabuya ku Ziyoni nge njimbo dze kushatha, kushatha kusingame kowobe mubali, banowobe ne kupembela ne kushatha, buyendasi ne tjililo zowotizhila kutjena.

¹²Imi, ndimi iye unomunyaladza. Iwe ndiwe ani unotja nthu iye unofa, nkololo we nthu unotjila bufutshwanana se bushwa?

¹³Makakangang'wa Yahwe Mbumbi wenyu, iye wakatambunudza kudzimu, kateya thiwa dze shango. Modwilila mutja zhuba lose, muikhwa nge bushongola gwe ntshambilidzi, ha ezwilulwamisila kukolomodza. Koga gungayi bushongola gwe ntshambilidzi?

¹⁴Nsungwa unowosunungugwa tjinyolotjo, aangafe kangina mu gomba ne zojiwa aangazwishete.

¹⁵Kana ndimi Yahwe Ndzimu wenyu, imi ndinoti adzonga gungwa kuti mapundu e vula yalo awone, zina Yahwe Masimbawose ndilo zina lawo.

¹⁶Ndakalonga dama langu mu nlomo uwo, akusumbika mu nthutshi we tjiazha tjangu, atambunudza kudzimu ateya thiwa dze shango, ngono ndoti ku Ziyoni, “Imwi mu bathu bangu.”

¹⁷Muka! Muka! Ima nge makumbo iwe Jerusalema, iwe wakang'wa mu luboko gwa Yahwe mu bhepe le bushongola gwabo, wakang'wa ukakunika madzongwe anotshatsharikisa mu bhepe.

¹⁸Akuna unontungamila, pakati kwe bakololo bose baakazwala, akuna ungankweba nge luboko pakati kwe bakololo bose baakalela.

¹⁹Zwithu izwezwi zwibili zwakakuwila, ndiani unowolila nawe? Kuthukudzika ne golomodzo, bhamba ne thumo, ndiani unowokunyaladza?

²⁰Bana babo bakatimbama, balele mu n'dzibo mmwe ne mmwe we zila, banonga ngolomu yabhakhwa nge dati, bushongola gwa Yahwe gumu bali, ne kutjemela kwe Ndzimu uwo.

²¹Ndizo wali hwilila woku, iwe wakakubadziwa, iwe wakalaladza, koga kusi nge nkumbi we zhambi.

²²Yahwe Ndzimu uwo ibo banogwila bathu bawo bakati, “Bona, ndadusa mu luboko gugo bhepe lina tjinotshatsharikisa, amutjowong'wa kakale mu bhepe le bushongola gwangu.

²³Ngono ndowoyilonga mu maboko e badziyidzi babo ibaba bakakudwa bakati, ‘Lala pasi ndizo tiyende pezhugwi kuko,’ ngono ukathama nshongoshongo uwo ukanga pasi, ukanga zila kuti bayende pezhugwi.”