Read Kalanga Isaya 52 Bible Online

Isaya 52 - Kalanga bible

Isaya 52

¹Muka! Muka! Zwiambadze nge kusima iwe Ziyoni, Ambala zwiambalo zwizo zwakanaka, iwe Jerusalema, nzi nkulu wakayengemala. Ngoti basakathumbigwa ne bakatemapala abatjowongina mu kuli kakale.

²Zwishashamule hwuluba. Milika iwe ntapiwa Jerusalema. Sunungula misungo yakakusunga mu ntshibha, iwe nkololokadzi we Ziyoni.

³Ngoti Yahwe bakati, “Amuzotengesiwa nge tjimwe, ndizo mowodzutunugwa kusina mari.

⁴She Yahwe bakati, Bathu bangu bakatangisa beyenda ku Egipiti kunogalako, kukati shule Asiriya ikabatshambilidza ngono basina tjabatjinya.

⁵Yahwe bakati, ngono ngwenu ndobuyigwa ngeni ipapa, bathu bangu bakatapiwa basina nlandu? Ibabo banobabusa banokayikana zhuba lose, zina langu lolengudziwa. Koleba Yahwe.

⁶Ndizo wali bathu bangu banowoziba zina langu, ndizo wali mu zhuba ilelo banowoziba kuti ndimi ndinoleba nditi, ‘Imi ndipano.’ ”

⁷Akanaka seni pezhugwi kwe matombo makumbo eunozhisa ndebo mbuya, iye unozhisa kunyalala, unozhisa ndebo mbuya ndulamo, unolebeleka ngekwe jidzo, iye unodwa Ziyoni eti, “Ndzimu uwo unobusa.”

⁸Hwilila, balindili babo banomilidza mahwi kang'ompela bepululudza nge kushatha, ngoti nge mesho abo banobona kubuya kwa Yahwe ku Ziyoni.

⁹Phutukani mose nge mpululu imwi matongo e Jerusalema, ngoti Yahwe bakanyaladza bathu babo, bakadzutunula Jerusalema.

¹⁰Yahwe bakalakidza njudzi dzose luboko gwabo gwakayengemala, ngono midzibo yose ye shango inowobona jidzo le Ndzimu.

¹¹Bhuda, bhuda udwe ikoko. Usibhate tjakatemapala. Bhuda pakati kwawo uzwitjenapadze iwe wakasenga zwija zwa Yahwe.

¹²Ngono awutowobhuda upaparika, naiko awutowobhuda utizha, ngoti Yahwe banowokutungamila, Ndzimu we Iziraela unowokutjengeta shule kuko.

¹³Bona, nlanda wangu unowokunda, unowokudziwa kamilidzigwa pezhugwi, unowobe pezhugwizhugwi.

¹⁴Se banjinji bakakaabala bembona, akapela asingalingike ali nthu, mbumbiko iye isingange ye nthu.

¹⁵Ndizo unowokaabadza njudzi njinji, bomambo banowomuma nge kukwe. Ngoti tjabasaka budziwa, banowotjibona, ne tjabasakahwa, banowotjihwisisa.