Read Kalanga Isaya 53 Bible Online

Isaya 53 - Kalanga bible

Isaya 53

¹Ndiani wakagalamoyo tjatakahwa? Ne luboko gwa Yahwe gwakazumbunuligwa ani kene?

²Wakakulila mbeli kwabo se ntinyana ntshwa, se n'dzi unothinila udwa pasi pakawoma. Wakabe asina ndingiko kene bubuya kwatakabe tinganlinga, kusina bubuya kwatingan'yemula.

³Wakalengudziwa kalambiwa nge bathu, nlume we buyendasi wakawolobela kudziyila. Kusina unoda kunlinga, akalengudzika tisingantole ali tjimwe.

⁴Nge malebeswa wakasenga zogwadza zwedu, kasenga ne njigwele dzedu, koga tintola akalashiwa kalambiwa akalobgwa nge Ndzimu, kadziyidziwa.

⁵Koga wakakubadzigwa matjinyo edu kalobegwa matjinyo edu. Shamu yaakalobgwa ndiyo yakatitjidza, takapodziwa nge mbonje dzidze.

⁶Iswi tose tonga pkhwizi takalashika, mmwe ne mmwe wakatobela zila iye, ngono Yahwe bakampa nlandu we zwibi zwedu tose.

⁷ Wakadziyidziwa kahwisiwa zogwadza, ngono kasitongo zhula nlomo uwe, kanga pkhwizana inokwebegwa ku mbulayi, kafanana ne pkhwizi mu maboko eunoyikera, ndizo kasitongo zhula nlomo uwe.

⁸Ngotshambilidziwa ne sumikilisiwa bakantola bakayenda naye. Ndiani ungaleba ngekwe tjizekugwana tjitje, ndiani una hanya? Wakadusiwa mu shango ye batjili, wakakubadzigwa matjinyo e bathu bangu.

⁹Bakabiga ikumbu tjitje pana zwe babiibi, koga mu kufa kukwe kabe muna tje nfumi, nenguba akabe asina tjibi tjaakathama, kwakabe kusina kutjebela mu nlomo uwe.

¹⁰Nenguba kwakabe kuda kwa Yahwe kun'gwadzisa, bakan'gwadzisa paakazwidusa tjibhayilo tje nlandu, unowobona ludzi gugwe ngono kapaphidza mazhuba awe, kuda kwa Yahwe kowowatshika munli.

¹¹Unowobona mbhayilo we kudziila kukwe ngono kagutshika. Nge luzibo gugwe nlanda wangu wakalulwama unowothama banjinji bakalulwama ngono unowosenga zwibi zwabo.

¹²Ndizo wali ndowompa gobe pakati kwe bana mamo, ngono unowokobana thundu yatapiwa ne bakasima, ngekuti wakazwipa kufa, ngono kabaligwanyiwa ne batjinyi. Wakasenga tjibi tje banjinji, katembezelela bana matjinyo.