Read Kalanga Isaya 54 Bible Online

Isaya 54 - Kalanga bible

Isaya 54

¹“Pululudza iwe usina mbeleko, iwe usakatongowana bana, phutuka nge mpululu, ulakidze kushatha, iwe usakatobe mu zwibhayo zwe kutshibama. Ngoti bana be nkadzi wakalashiwa banowobe banji pana be nkadzi wakalobogwa.” Koleba Yahwe.

²Talabudza pawakabaka nshasha uwo, ube upaphidza nshasha uwo, usiletje kuthama uijalo, paphidza misungo iyo ube usimisa mbambo dzidzo.

³Ngoti unowowanda kuyenda ku luji ne ku lumeshwe, ludzi gugo gowothuwa njudzi gukamusa mizi yakathukudzika.

⁴Usitje ngoti awutowobhakhwa nge shoni, usinyale moyo ngoti awutolengudzika. Unowokangang'wa shoni dze butjetjana gugo, ne kulengudzika mu butjilikadzi gugo autowokukumbula.

⁵Ngoti mbumbi uwo ndiye nlume uwo, zina lile ndi Yahwe Masimbawose, Wakayengemala we Iziraela ndiye Ndzutunuli uwo, unodang'wa Ndzimu we shango yose.

⁶Yahwe bakakudana unga nkadzi wakafuba mu meya, unga nkadzi we butjetjana alambiwa. Koleba Ndzimu uwo.

⁷“Ndakakusiya tjibaka tjitukununu, koga nge shungu wulu ndowomukubunganya.

⁸Nge kugwadzamoyo tjibaka tjitukununu ndakakufupatila koga nge ludo gusingapele ndowokuhwila ngoni.” Koleba Yahwe, Ndzutunuli uwo.

⁹“Ngoti ikoku konga mazhuba a Nuwa kundili, konga sekwa ndakatuna kuti mikubila ya Nuwa isitjakube shango kakale, ndizo ndatuna kuti anditjawokugwadzila moyo kene kukutjemela.

¹⁰Nenguba matombo angapaladziwa, ne matuthu akadusiwa, koga ludo gwangu mu kuli agungapele, ne tjidumano tjangu tje kunyalala atjingadusiwe.” Koleba Yahwe ibo banokuhwila ngoni.

¹¹“Iwe wakadziyidzika, wakatutudziwa nge matutu ukasitongonyaladziwa, ndowokubaka nge mabgwe akanaka, thiwa dzidzo ndowodzibaka nge mabgwe mabuya e safire.

¹²Thungamakole dzidzo ndowodzinakisa nge mabgwe akanaka, mikoba iyo ndikaithama nge thakwala, guma lilo lose nge mabgwe akanaka.

¹³Bakololo babo bose banowodiyiwa ndi Yahwe, ngono banowobuyigwa kukulukulu ne kunyalala kowobe nabo.

¹⁴Unowosimisiwa mu ndulamo, kutshambilidziwa kowopela, ngoti awutowotja. Autowotja ngoti tjinotjisa atjitowosedzela pejo nawe.

¹⁵Ha mmwe angakutanga, kowobe kusingadwe mundili. Iye kene ali ani ungakumukila unowowa nge kuko.

¹⁶“Bonani, ndimi ndakabumba nthuli unothutidza masimbe kabe, ebe ethula tjibhayano kushinga nshingo watjo. Kakale ndimi ndakabumba nkolomodzi kutjinya.

¹⁷Akuna thumo linothamigwa kukubhaya linowowatshika, unowokunda ndebo imwe ne imwe inobhayana nawe mu kusumikilisiwa. Iyeyi ndiyo thaka ye balanda ba Yahwe ne kulandugwa nlandu ndimi.” Koleba Yahwe.