Read Kalanga Isaya 55 Bible Online

Isaya 55 - Kalanga bible

Isaya 55

¹Izhani, imwi mose muna nyota, izhani ku vula, imwi musina mari, izhani mutenge muje. Izhani mutenge nkumbi we zhambi ne nkaka, tengani musina mari kene themba.

²Ini mushingisa mari kusi mu tjiwunga kene? Ini mushingisa matatabuko muna tjisingagutshe kene? Munditeedze nge njele, ijani tjakalulwama, mushathile zwakanaka zwinoshathisa meya.

³Zhulani zebe, muzhe kundili, ihwani ndizo mutjile. Ndowothama tjidumano tjisingapele namwi, ndowomulakidza ludo gusingapele gwandakagadzabgwe Dafite.

⁴Bonani, ndakanthama ntendeki ku bathu ntungamili ne nlauli we bathu.

⁵Bonani, mowodana njudzi dzamusingazibe, njudzi dzisingamuzibe dzowolabukila kumuli, dziyikhwa ndi Yahwe Ndzimu wenyu, ibo Wakayengemala we Iziraela, ngoti bakamukudza.

⁶Shakani Yahwe batjawanika, mubadane batji pejo.

⁷Mbimbi ngaasiye zila iye, ne usakalulwama asiye mikumbulo iye. Ngaashandukile kuna Yahwe kuti banhwile ngoni, ashandukile ku Ndzimu wedu, ngoti unowon'zwiibhatigwa.

⁸“Ngoti njalakang'wa dzangu ate dzili dzenyu, ne zila dzenyu ate dzilidzangu,” koleba Yahwe.

⁹Se kudzimu kuli kule kudwa mu shango, zila dzangu dzakajalo dzikule ne dzenyu ne mikumbulo yangu ikule ne yenyu.

¹⁰Se vula ne kapuku zwideluka zwidwa ku zhuzhugwi, ngono zwibe zwisingabgwilile ko koga zwibe zwidilidzila shango, zwiyithama kuti ithinile iduse zwizwalo, ndizo n'dzwali awane mbewu ne unoja awane zojiwa,

¹¹saikokubo, dama langu lowobhuda mu nlomo wangu, ngono alingabuye lisina tjalinatjo, koga lowowidza tjandakazwimisila kuti litjishinge, ngono likakunda muna tjandakalitumila kutjishinga.

¹²Dumbu mowobhuda nge kushatha, ngono mukatungamigwa nge kunyalala, matombo ne matuthu a mbeli kwenyu, anowopululudza nge kushatha, ne miti yose ye shango inowoloba phande.

¹³Mu bumo gwe mihwa kowomela nsipuri, mu bumo gwe zwikungubo kukamela nshangule, ngono kowobe ikumbuludzo tja Yahwe, kukabe tjilakidzo tjigelile tjose tjisingawo kolomogwa.