Read Kalanga Isaya 56 Bible Online

Isaya 56 - Kalanga bible

Isaya 56

¹Yahwe bakati, “Londolodzani kutambunuka, muthame ndulamo ngoti jidzo langu labe pejo ne kusunungula kwangu kowozumbunugwa.

²Kwakakombolegwa nthu unothama ikoku, nkololo we nthu unokubhatisisa, iye unowolondolodza Sabata asingaitshambe nge makumbo, ezwidziba kuthama bubi.”

³Ntaya wakazwibhatshanya na Yahwe asitongoti, “Nge malebeswa Yahwe banowondidusa mu bathu babo.” Ngomwa isitongoti, “Bona imi ndi nti wakawoma koga.”

⁴Ngoti tjinoleba Yahwe ndietji, “Ngomwa dzinolondolodza bo Sabata bangu, beshalula kuthama tjinondishathisa bebhatilila mu tjidumano tjangu.

⁵Mu Ng'umba yangu mukati kwe makuma angu ndowobapa ikumbuludzo tjinoyita pa bakololo ne bakololokadzi. Ndowobapa zina lisingapele, lisingake likadusiwa.

⁶Bataya banozwibhatshanya na Yahwe, kushingila Yahwe ne kuda zina la Yahwe, kube balanda babo, bose ibabo banolondolodza Sabata basingalitshambe nge makumbo bebhatilila mu tjidumano tjangu,

⁷ibaba ndowobazhisa kudombo langu lakayengemala, ndowobathama kuti bashathe mu Ng'umba yangu ye ntembezelo, zwibhayilo zwabo zwinopisiwa ne zwipo zwabo zowoamutjigwa mu tjibeso tjinopisigwa zwibhayilo, ngoti ng'umba yangu inowodang'wa ng'umba ye ntembezelo ku zwitjaba zose.

⁸She Yahwe ibo banokubunganya balashiwa be Iziraela bakati, Nditjawokubunganyila bamwe ku bali, kuzhe kwa ibaba bakakubungana kale.”

⁹Izhani mose imwi phuka dze shango, mose imwi zwibandana zwe shango zwimu ishaka, izhani muje.

¹⁰Balindili be Iziraela mapofu, bose koga abana zibo, bose i mbgwa dze mbebebe dzisingake dzikabukula, dzinowolota dzililele pasi dzinoda kuizela.

¹¹I mbgwa dzinopupa, adzitotongoguta. Balisi basingahwisise, bose bakapambukila mu zila dzabo, mmwe ne mmwe wakalinga mbuyilo iye.

¹²Banoti, “Izhani, tishake nkumbi we zhambi. Ngati ng'weni busukwa tigute. Mangwana kowofanana na nasi, kowobe kuli kukulu kupindisa.”