Read Kalanga Isaya 57 Bible Online

Isaya 57 - Kalanga bible

Isaya 57

¹Balulwami banoloba, ngono akuna mmwe unokuyela njele, banogalamoyo banodusiwa, koga kusina unohwisisa, Balulwami banodusiwa, kutizhisiwa bubi gu mbeli.

²Ibabo banotjila butjilo gwakatambunuka banowana kunyalala, banonyaluluka mu malalo abo ibabo bakatambunuka.

³Koga imwi izhani ngeno, imwi bakololo be nloyikadzi, bana be phombgwe ne fukula.

⁴Ndiani wamunoseka kene? Apa ndiani wa munodadila kene? Wamunowhong'ola ndiani? Apa ate muli lutshinga gwe bapanduki kene bana be banyepi kene?

⁵Mopisika nge yemula mbi pakati kwe mioko na kusi kwe miti mimwe ne mimwe yakapasha ina mazhani matshwa, modusa bana benyu zwibhayilo mu mikuku ne mu phaswa dze shongwe.

⁶Motola mabgwe akakuyungika mu nkuku se gobe lenyu, i hakata dzenyu. Moatebulila tjipo tje tjing'o kuanamata, mukaadusila tjipo tje mathunde. Apa ndakafanila ndishathile izwezwi zwithu kene?

⁷Pezhugwi kwe dombo lefulefu makawala thobo dzenyu, ndiko kwamunotathila ikweno kunodusa zwibhayilo zwenyu.

⁸Makabiga zwifano zwenyu shule kwe matendele nekwe makwasayile e mikoba. Makati mundisiya mukapengula thobo dzenyu, mukati malala padzili mufumula kwazo, mukadumana naibabo bamunoda thobo dzabo, ngono mukalinga mbujo dzabo.

⁹Makayenda ku ndzimu Moleki ne mafuta mukapaphidza mafuta enyu anonuhwa zwinozipa, makatuma thumwa kulekule, mukadelukila mu ikumbu.

¹⁰Makanyadziwa ngothama zwithu zwenyu izwezwi, koga amuzotongoti, “Azwina nshingo.” Makamusidzila matatabuko enyu mukasitimbame.

¹¹Ndiani wakamupalusa moyo mukatja, mube musingabe ne malebeswa kundili, naiko mukasitongo ndikumbula kene kuli kundialakana mu mimoyo yenyu? Apa ate kuli kuti ndatola tjibaka ndilinyelele ndizo wali musinganditje kene?

¹²Ndowomubonyolola ndulamo yenyu ne mishingo yenyu ikaboneka, ngono akuna tjainga bhatsha natjo.

¹³Mowoti mulila, muletje mbunga we midzimu yenyu umubhatshe. Phepo inoyisengela kutjena, phetshwana koga inowoiwulusila kutjena. Koga unotizhila mundili unowothuwa shango, ngono kathuwa ne dombo langu lakayengemala.

¹⁴Kowolebelekwa kuyi, “Bakani, bakani mululwamise zila. Dusani zwidzibilidzi zose mu zila ye bathu bangu.”

¹⁵Ngoti woku ndiko kunoleba upezhugwizhugwi, iye unotjila kusingapele, we zina lakayengemala, “Ndogala mu bugalo gupezhugwi gwakayengemala, ndogala ne bathu bamu buyendasi banozwiisa pasi mu meya, kuti ndimuse meya ye unozwiisa pasi, ndinyaladze moyo we umu buyendasi.

¹⁶Ngoti anditowopila nthu nlandu tjose, naiko anditowogwadza moyo misi yose, ngoti meya ye nthu ingatimbama mbeli kwangu, meya ye butjilo yandakabumba.

¹⁷Ndakabe ndagwadzisiwa moyo nge tjibi tjabo nenge yemula dzabo mbi, ndakabaloba, asumbika tjiso tjangu mu kugwadza moyo, koga banodwilila bepanduka mu zila dze mimoyo yabo.

¹⁸Ndakabona zila dzabo koga ndowobapodza, ndowobatungamila abuza kunyaladza mubali. Balili babo ndowothama kuti banyaladzike bapululudze.

¹⁹Kunyalala ngakubepo, kunyalala kubepo kuna bakule ne bapejo, ngono ndowobapodza. Koleba Yahwe.”

²⁰Koga babiibi banonga gungwa linodzongeka lisikatongodzikama, vula yalo inokabhunganya matope ne misetje.

²¹“Akuna kunyalala mu babiibi.” Kojalo Ndzimu wangu.