Read Kalanga Isaya 6 Bible Online

Isaya 6 - Kalanga bible

Isaya 6

¹Mu gole lakafa Mambo Uziya, ndakabona She bali gele pa tjigalo tje bumambo, tjilefu tjakamilidzika, ndzibo we hazu yabo uli zhele mu Ng'umba ye Ndzimu.

²Pezhugwi kwabo kwakabe kuna zwibumbiwa zwe kudzimu zwinoyi Serafu. Mmwe ne mmwe wabo ana mapapilo ali kutathatu. Mapapilo mabili ali aanozwimba buso nawo, mabili ezwimba makumbo nawo, mabili ewuluka ndiwo.

³Ngono bakabe belebesana beti: “Bakayengemala, bakayengemala, bakayengemala, Yahwe Masimbawose Shango yose izhele tjedza tjabo.”

⁴Nsindo we hwi le walebeleka likazunguza makwasayile e mikoba, ng'umba ye Ndzimu ikazhala busi.

⁵Ngono alebeleka nditi, “Yee mme wee! Imi ndapela ngoti ndi nthu una milomo isingalebe tjibuyanana, ndogala pakati kwe bathu basina milomo inoleba tjibuyanana ngono mesho angu abona Mambo, Yahwe Masimbawose.”

⁶Ipapo mmwe we dziserafu kawulukila kundili akabhata simbe le moto linopisa laakadusa mu moto umu tjibeso tjinopisigwa zwibhayilo.

⁷Kakutha milomo yangu ndilo ngono kabe eti, “Bona, simbe ileli lakutha milomo iyo, nlandu uwo wadusiwa ngono wazwiibhatigwa zwibi zwizo.”

⁸Ipapo ahwa hwi la She beti, “Ndiyani wandinowotuma? Ndiyani unowotiyendila kene?” Ngono ashandula nditi, “Ndipano. Munditume!”

⁹She bakabe beti, Yenda unodwa bathu ibaba uti: Kene mukahwilila kungapani, amungahwisise. Kene mukalingisisa kungapani, amungapedzisise.

¹⁰“Kukutadza moyo ye bathu ibaba, uthame zebe dzabo dzisihwisise, upofupadze mesho abo. Bangadwa bebona nge mesho abo, behwa nge zebe dzabo, behwisisa nge moyo yabo bebe beshanduka bepodziwa.”

¹¹Ipapo abhuzwa nditi, “She, kowotola tjibaka tjingapani kwakajali?” Ngono bakadabila beti, “Kuswikila mizi mikulu yakolomodziwa isitjina bagali, kuswikila ng'umba dzasiyiwa dzisitjina bagali, ne minda yathukudziwa yashakadziwa.

¹²Yahwe banowopaladzila mmwe ne mmwe kulekule shango ikasala yakadongola isina tjimwe.

¹³Kene kungasala bung'ompela muna bali gumi muuli naigo gowopisiwa gwe bubili, kowofanana ne tjitsha tje nti unoyi nterebinti kene oko tjinosala tjili mile iwo watemiwa, ndizo mbewu yakayengemala inowobe tjitsha mu shango.”