Read Kalanga Isaya 60 Bible Online

Isaya 60 - Kalanga bible

Isaya 60

¹Milikani, penyani, ngoti tjedza tjenyu tjazha, ne gudzo la Yahwe lamuyedzela.

²Bonani, zhalima lakaambadza shango, zhalima gulu lakafukidza bathu, koga Yahwe bamuyedzela ne, gudzo labo lowoboneka mu muli.

³Zwitjaba zowozha ku tjedza tjenyu, na bomambo banowozha ku kupenya kwe kuyedza kwenyu.

⁴Milidzani mesho mulinge kumupoteleka, bose banokubungana bezha kumuli, bakololo benyu banowozha bedwa kule, ne bakololokadzi benyu banowogugiwa mu maboko.

⁵Ipapo mowobona ngono mowopenya, mimoyo yenyu inowotjuluka nge kushatha, fumwa dzinodwa ku makungwa dzowozhisiwa ku muli, ne fumwa dze zwitjaba dzowozhisiwa kumuli.

⁶Kamela njinji dzowozhala shango yenyu, kamela tjetjana dze Midiyani ne Efa. Dzose dzinodwa ku Sheba dzose dzowobuya, dzizhisa golide ne motsha, ne leba kukudziwa kwa Yahwe.

⁷Ngubi dzose dze Kedari dzowokubunganyigwa kumuli, nyundo dze Nebayoti dzowomushingila, dzowoamutjilika se zwibhayilo mu tjibeso tjangu tje tjinopisigwa zwibhayilo, ngono ndowokudza ng'umba yangu inokudzika.

⁸Ibaba ndiboani banowuluka se makole, banowuluka se njiba dziyenda ku mashaka adzo?

⁹Nge lebeswa, shango dzimu tjekelo dze gungwa dzowolinga kundili, kowotanga zwikepe zwe Tashishi, zwizhisa bakololo benyu kudwa kule, banowozha bana siliva ne golide, kukudza zina la Yahwe Ndzimu wenyu, Wakayengemala we Iziraela, ngoti bakamuambadza gudzo.

¹⁰Bataya banowomusa makuma enyu, bomambo babo ibo banowomushingila. Nenguba ndakati ndagwadzamoyo amuloba, koga nge ludo gwangu ndakamuhwila ngoni.

¹¹Mikoba yenyu inowogala yakazhuka, siku ne sikati ayitowozhaligwa, kuita kuti zwitjaba zwimuzhisile fumwa yazo na bomambo bazo bakalongoloka.

¹²Ngoti itjaba kene bumambo gusingawomushingila gowoloba, gowokolomodziwa tjose.

¹³Gudzo le Lebanoni lowozha kumuli, miti ye misipuri ne pulane ne phaine inowozha kunakisa pagele bugalo gwangu gwakayengemala, ngono ndowokudza pandinobiga makumbo angu.

¹⁴Bakololo be batshambilidzi benyu banowozha bemuthigamila, bose banomulingila pasi banowomuthigamila pa makumbo enyu, ngono banomudana beti Nzi nkulu wa Yahwe, Ziyoni we Wakayengemala we Iziraela.

¹⁵Nenguba makatongoti mukasiiwa mukabengiwa, kusina unopinda ne pamuli, ndowomukudza nge kusingapele, mukawana kushatha mu zwizekugwana zwenyu zose.

¹⁶Mowomwa nkaka we zwitjaba, mowomwisiwa mu mazhamu e bumambo. Ngono ipapo mowoziba kuti imi Yahwe, ndimi Ntjidzi wenyu, Ndzutunuli wenyu Wakasima wa Jakubo.

¹⁷Mubumo gwe phangula ndowomuzhisila golide, pana butale ndowozhisa siliva, mubumo gwe hwuni ndowozhisa phangula, mubumo gwe mabgwe ndowozhisa butale. Ndowothama kunyalala kukabe mbusi wenyu ne ndulamo ikabe nlauli wenyu.

¹⁸Phipiti ayitjowofa yahwika kakale mu shango yenyu, kene jinyo ne golomodzo azwitowohwika mu midzibo iyo, koga mowodana makuma enyu muti Jidzo, ne mikoba yenyu muti Kukudza.

¹⁹Zhuba alitjowobe tjedza tjenyu masikati, ne mwedzi awutjowomupenyela, koga Yahwe banowobe tjedza tjenyu nge kusingapele kose, Ndzimu wenyu unowobe gudzo lenyu.

²⁰Zhuba lenyu alitjawoshwa kakale, ne mwedzi awutjahwongina kakale, Yahwe banowobe tjedza tjenyu nge kusingapele kose, ne mazhuba enyu e buyendasi anowopela.

²¹Bose bathu benyu banowobe bathu bakalulwama, ngono banowothuwa shango nge kusingapele. Ba ndzi wandakadzikila imi unothinila, nshingo we maboko angu, kulakidza gudzo langu.

²²Ntukununu tjose wenyu unowobe itjaba, unowobe itjaba tjikulu. Ndimi Yahwe, ndowokushingikadza nge kulibilidza mu nsi wako.