Read Kalanga Isaya 62 Bible Online

Isaya 62 - Kalanga bible

Isaya 62

¹Ngekwe Ziyoni andinganyalale, ngekwe Jerusalema, ndowolebeleka, kuswikila ndulamo yayo ipenya se tjedza tje kuyedza, jidzo layo liboneka se luvone.

²Zwitjaba zowobona ndulamo yenyu, na bomambo bose banowobona gudzo lenyu. Mowodang'wa nge zina dzwa lamunopiwa ndi Yahwe.

³Mowobe tjiala tje bubuya mu luboko gwa Yahwe, hwutshe ye bushe mu luboko gwe Ndzimu wenyu.

⁴Amungabe mutjadang'wa Balambiwa, kene mudana shango yenyu Dukuthuku. Koga unowodang'wa kuyi Hefitsiba,[1] shango yenyu iyo inowodang'wa Bheula,[2] ngoti Yahwe banowomushathila, shango yenyu inowolobogwa,

⁵se nzhuzha elobola mwanadi, saikoko bakololo babo banowokulobola, se nloboli eshathila nlongo uwe, saikoko Ndzimu wenyu unowomushathila.

⁶Jerusalema, ndabiga balindi pezhugwi kwe guma lilo, abanganyalale siku ne sikati. Imwi banokumbula Yahwe musinyalale,

⁷musitongoletja bakanyaluluka kuswikila bebuzila Jerusalema mu tjimo babuye baithame kukudziwa kwe shango.

⁸Yahwe bakatuna nge tjiazha tjabo tje luji nenge luboko gwabo gwakasima beti, “Anditjawopapha kakale apa zwita zwenyu mathunde enyu kube zojiwa zwabo, naiko bataya abatjawong'wa kakale nkumbi we zhambi wamakashingila,

⁹koga ibabo banotjela zhambi banodzija bakakudza Yahwe, banotjela zhambi banowong'wa nkumbi wadzo, mu misha ye bugalo gwangu gwakayengemala.”

¹⁰Bhudani nge mikoba, bhudani nge mikoba! Lulwamisilani bathu zila. Zhulani zila! Muzhule zila phabi muduse mabgwe. Milidzilani zwitjaba tjilakidzo.

¹¹Yahwe bakazibisa midzibo yose ye shango beti, “Budzani nkololokadzi we Ziyoni muti, ‘Bona, Ntjidzi uwo unozha. Mbhayilo uwe unawo, ne mbuzilo iye wakaisenga.’ ”

¹²Banowodang'wa Bathu Bakayengemala, Bakadzutunugwa ba Yahwe, mowodang'wa Bakashakwa, Nzi Nkulu Usinga Tjawolambiwa.