Read Kalanga Isaya 65 Bible Online

Isaya 65 - Kalanga bible

Isaya 65

¹Ndakathama kuti ndizibgwe nge bathu bakabe basingandishake, ndakawang'wa ndi ibabo basakatongo bhuzwa nge kwangu. Ku itjaba tjisakatongo dana zina langu, ndakati, “Ndipano! Ndipano!”

²Ndakashwa ndakatambunudza maboko angu zhuba lose kuamutjila bapanduki, banoyenda mu zila dzisaka naka belawugwa nge mikumbulo yabo,

³bathu bakadwilila nge kunditanga bakalingisana nami, banodusa zwibhayilo mu minda, bepisa motsha mu zwibeso zwakathamiwa nge zwitina,

⁴banogala pakati kwe zwikumbu, bepitsha busiku bali mu magalo akasumbikala, banoja nyama ye hwotji ne ntubgwi we nyama dzakatemapala mu zwija zwabo.

⁵“Gala kutjena, usisedzele kundili, ngoti ndakayengemala kupinda iwe.” Ibaba bathu busi gunongina mu zwimilo zwangu, moto unotshwa zhuba lose.

⁶Bonani, kwakakwagwa mbeli kwangu kukayi, “Anditowoletja kwakajalo koga, ndowobgwilizila, e ndowobabgwilizila mu zwifuba zwabo,

⁷ngekwe zwibi zwabo ne zwabo tate babo, koleba Yahwe. Ngoti bakapisa zwibhayilo pezhugwi kwe matombo, ngono bakandituka pezhugwi kwe matuthu, ndowolizanyidzila mu zwifuba zwabo mbhayilo uzhele ngekwe mishingo yabo ye kutanga.”

⁸Yahwe bakati, “Nkumbi se uli mu mitjelo, ngono bathu beti, ‘Musiutjinye, ngoti kuna makombolelo muuli,’ nditjo tjandinowothamila balanda bangu, anditowobalobesa bose.

⁹Ndowowanisa Jakubo bana, na Juda ndowon'wanisa bana, banowothuwa matombo angu, bashalugwa bangu banowoathuwa, ibo balanda bangu banowogala ikoko.

¹⁰Sharoni inowobe mafulilo e ngubi, Nkuku wa Akhori unowobe mabuthilo e matanga e ng'ombe dze bathu bangu bakandishaka.

¹¹“Koga imwi munofupatila Yahwe, imwi munokangang'wa dombo langu lakayengemala, imwi munoteyela tafuli ndzimu wenyu we phazha, mukazhadza mapepe nge nkumbi wakashanganyiwa muuthamila ndzimu wenyu we bhelelo,

¹²ndowothama kuti bhelelo lenyu libe nge thumo, ngono mose mowokotamila mbulayi, ngoti ndakati ndidana mukasidabile, ati ndilebeleka mukasihwilile koga mukashinga zwakabipa mu mesho angu mukashalula tjisingandishathise.”

¹³Ndizo wali She Yahwe bakati, “Bonani, balanda bangu banowoja, koga imwi mowofa nge zhala, banowong'wa, koga imwi mowofa nge nyota, balanda bangu banowoshatha, koga imwi mowobhakhwa nge shoni.

¹⁴Balanda bangu banowomba nge kushatha kwe moyo, koga imwi mowolila nge kuhwa zogwadza mu moyo, mowokuwa nge zogwadza mu meya.

¹⁵Zina lenyu mowolisiyila bashalugwa bangu kulishingisa se bhiso, ngono She Yahwe banomubulaya, koga balanda babo banowobapa zina lipoga.

¹⁶Iye ungabe ekumbila makombolelo mu shango ngaakumbile ku Ndzimu we lebeswa, naiye unothama tjidumano mu shango ngaatune nge Ndzimu we lebeswa, ngoti zwakadziyidza mu misi yakapinda zowokanganika zwikasumbikigwa mesho angu.

¹⁷“Bonani, ndowobumba kudzimu kutshwa ne shango tshwa. Zwithu zwe kutanga azwitowokumbugwa, naiko azwingatongozha mu nkumbulo.

¹⁸Koga pululudzani mu shathe nge kusingapele muna tjandinobumba, ngoti ndowothama Jerusalema ikabe kushatha, ne bathu bayo bakabe kupembela.

¹⁹Ndowoshathila Jerusalema ngono ashathisiwa nge bathu bangu, zhoba ye kukuwa nekulila ayitowohwika kakale.

²⁰“Muuli akutjawobe ne lushabana gunowotjila mazhuba mashomanana, kene nthu nkulukulu akuna unowofa asawidza mazhuba awe e butjilo, iye unowofa ana makole ali zana kowotogwa afa ali ntjetjana, iye usatubula kutjila makole ali zana unowotogwa ana bhiso.

²¹Banowobaka ng'umba bakagala mudzili, banowolima minda ye mitjelo bakaja mitjelo yayo.

²²Abatowobaka ng'umba dzibe dzigagwa nge bamwe, abatowolima kube kuzha kuja upoga. Mazhuba e butjilo gwe bathu bangu anowolizana ne mazhuba e nti, bathu bangu banowoshathila mishingo ye maboko abo tjibaka tjilefu.

²³Abatowoshinga beshingila suli, bana babo abatowowigwa nge mbatsha, ngoti banowobe bathu bakakombolegwa ndi Yahwe, bose ne bana babo.

²⁴Ndowobadabila basathu bakandidana, banowoti batjalebeleka abe ndahwa kale.

²⁵Phele ne pkhwizana zowojila pathu pang'ompela, shumba iyo inowoja bushwa se ngabe, koga zojiwa zwe nyoka inowobe hwuluba. Azwitowokubadza tjimwe kene zwikatjinya tjimwe mu dombo langu lose lakayengemala.” Koleba Yahwe.