Read Kalanga Isaya 7 Bible Online

Isaya 7 - Kalanga bible

Isaya 7

¹Kwakati mu mazhuba a Ahazi nkololo wa Jotamu, nkololo wa Uziya ali mambo we Juda kukabe ne ngwa. Rezini mambo we Siriya na Peka nkololo wa Remaliya mambo we Iziraela katathila ku Jerusalema kugwa koga bakasiyikunde.

²Kukati be nsha wa Dafite behwa kuti Siriya yabe ne nshanganyila na Ifureimi, moyo wa Mambo Ahazi ne moyo ye bathu babe ikatetema ikanga miti ye ishaka izunguziwa nge phepo.

³Ipapo Yahwe bakadwa Isaya bakati, “Yenda iwe ne nkololo uwo Sheari Jashubu unoshangamidza Ahazi panopelela ngolo inodwa mu dziba li pezhugwi, mu zila inoyenda kunosukigwa matyila,

⁴undwe uti, ‘Ibe ne njele, udzikame usitje. Usitongo timbamiswa moyo nge bushongola gunotjisa gwa Rezini ne Basiriya ne nge nkololo wa Remaliya gunonga zwisikalala zwibili zwinonyengela,

⁵ngekuti Siriya na Ifureimi ne nkololo wa Remaliya balangana nge kuko beti,

⁶“Ngatinginilileni Juda, tibalobese hana tibakunde, titole nkololo wa Tabeeli tinthame mambo wayo.”

⁷Koleba She Yahwe beti, “ ‘Akungabepo ikoku, akungashingikale.

⁸Ngoti nsholo we Aramu nzi nkulu Damasiko, nsholo we Damasiko ndi Rezini. Mu makole ali makumi matathatu ana ali mashanu (65) Ifureimi inowobe yapaladziwa kwaisingake ikabe ludzi.

⁹Nsholo we Ifureimi i Samariya, nsholo we Samariya nkololo wa Remaliya. Ha usinga galemoyo ha ungame wakasima.’ ”

¹⁰Yahwe bakalebeleka na Ahazi kakale beti,

¹¹“Kumbila tjilakidzo muna Yahwe Ndzimu uwo, kene tjili tjingabe tjidwa pasi pasi kene pezhugwizhugwi.”

¹²Koga Ahazi kadabila eti, “Andingakumbile tjilakidzo kakale andingalike Yahwe.”

¹³Ipapo Isaya kashandula eti, “Hwililani imwi be ng'umba ya Dafite. Apa mokutola kusi tjimwe kunyadza bathu kene? Ngono apa mowonyadzabo Ndzimu wangu kene?

¹⁴Ha kwakajalo She nge kwabo banowomupa tjilakidzo. Bonani, mwanadi unowozwisenga ngono kawana mwana we tjilisana ngono unontumila zina kati Imanuwele.

¹⁵Unowoja mashwe ne butji ha woziba kushalula pakati kwe tjibiibi ne tjakalulwama.

¹⁶Ngoti kowoti mbisana iwoyu asathu kaziba kulamba tjibiibi eshalula tjakalulwama, shango ya bomambo ibaba babili baunotja inowobe yasiyiwa.

¹⁷“Yahwe banowozhisa mukuli ne mu bathu babo ne mu nsha wa tate babo mazhuba asingafanane ne mamwe akatongo bepo kudwa mu zhuba Ifureimi laakamwawuka mu Juda, banowozhisa mambo we Asiriya.”

¹⁸Mu zhuba ilelo Yahwe banowoweba nge nlidzo thuzi kudwa kule mu hwobana dze Egipiti ne nyutji kudwa mu shango ye Asiriya.

¹⁹Dzowozha dzose dzikagala mu phili dze makorokoro ne mu phaswa dze shongwe ne mu matenjana wose e mihwa ne mu mafulilo.

²⁰Mu zhuba ilelo She banowoshingisa reza yatapiwa seli kwe gwizi Yufuratesi, iye mambo we Asiriya kutesela misholo yenyu ne mbethe mu makumbo enyu ne kudusa ndedu dzenyu.

²¹Mu zhuba ilelo nthu unowothuwa pholombe ing'ompela ne mbudzi dzili mbili.

²²Dzowobe ne nkaka njinji kabe ne mashwe aanoja. Bose banowosala mu shango banowoja mashwe bakaja ne butji.

²³Mu zhuba ilelo, mu magalo mamwe ne mamwe pakabe pana mizhambi ili tjiwulu ye themba ye shekele dze siliva dzili tjiwulu, kowobe ne madishwa ne matenjana e mihwa.

²⁴Bathu banowoyenda ko ne misebe ne matati, ngoti shango inowobe ili zhele madishwa ne matenjana e mihwa.

²⁵Matuthu wose akatongoling'wa nge bhadza awungayendeko, utja madishwa ne matenjana e mihwa. Anowobe abe mafulilo e ng'ombe ne pkhwizi kwadzinofula.