Read Kalanga Isaya 8 Bible Online

Isaya 8 - Kalanga bible

Isaya 8

¹Yahwe bakati kundili, “Tola tjikwalilo tjikulu ukwale nge peni uti, ‘Kulibilidza kutapa, Kutolela tjinyolotjo.’

²Ngono atola batendeki bangu banogalikamoyo Uriya mpirisiti na Zekariya nkololo wa Jeberekiya.”

³Ngono angina ku nkadzi wangu we nlebesambeli ngono kazwisenga katshibama mwana we tjiyisana. Yahwe bakandidwa bakati, “Untumile zina uti Maheri Shalali Hashi Bhazi.

⁴Ngoti kowoti mbisana ihwoyu asathu kaziba kuti, ‘Tate bangu’ kene ‘Mme bangu,’ fumwa ye Damasiko ne thundu yatapiwa ye Samariya ikasengwa ndi mambo we Asiriya.”

⁵Yahwe bakalebeleka nami kakale ngono bakati,

⁶“Ngoti bathu ibaba bakalamba vula ye Shiloa inowunga ngotebama, ngono bakashathila Rezini ne nkololo wa Remaliya,

⁷ndizo bona, Yahwe banozhisa mikubila yakasima ye Gwizi gwe Yufuratesi. Mambo we Asiriya ne simba lile lose. Gowozhadza hwobana dzago dzose vula ikabuya ikatebukila kuzhe kwe phili dzadzo.

⁸Gowowunga gutebukila mu Juda vula ikula kwayinomila nthu pa ntshibha. Gowowunga gukafukidza bupabi gwe shango iyo, iwe Imanuwele.”

⁹Ibeni ne nshanganyila imwi bathu, koga mowopaladziwa! Hwililani imwi be shango dzikule. Muzwilulwamisileni ngwa, mutemeke mafupa. Lulwamisilani ngwa mutemeke mafupa!

¹⁰Thamani ndongoloso dzenyu, koga adzingamudwile tjimwe. Thamani ndongoloso dzenyu, koga akutowomudwila nge tjimwe, ngoti Ndzimu unaswi.

¹¹Ngoti Yahwe bakalebeleka nami nge masimba benditjemela beti ndisitongoyenda mu zila ye bathu ibaba, bakati,

¹²“Usitongotola tjimwe ne tjimwe bathu ibaba tjabanoti nshanganyila we bupanduki uti nshanganyila, ne tjabanotja usitongolobgwa nge ana.

¹³Yahwe Masimbawose ndibo bawakafanila tola bakayengemala, ndibo bawakafanila utje, babe ibo bauna ana nabo.

¹⁴Banowobe bugalo gwakayengemala, ku ng'umba idzedzi mbili dze Iziraela bakabe bgwe linokutha bathu, shongwe inothama kuti bawe. Ku bathu be Jerusalema banowobe silaha ne bhuzhu.

¹⁵Bunji gwabo gowokuthiwa gukawa gukavunika, banoteyiwa bakabhatshigwa.”

¹⁶Sungila butendeki utjwayile nlayo mu badiyiwana bangu.

¹⁷Ndowolindila Yahwe, ibo bakasumbikila nsha wa Jakubo buso gwabo, ngono ndowobagalabgwe.

¹⁸Imi ndipano ne bana bandakapiwa ndi Yahwe. Ti zwilakidzo ne batjenesi mu Iziraela kudwa kuna Yahwe Masimbawose, ibo banogala mu Dombo le Ziyoni.

¹⁹Ha bathu beti bhuzwani ng'anga ne baloyi banonyebezela be mbumburudza, apa bathu abangabhuzwe Ndzimu wabo kene? Apa kungabhuzwiwa bafi ngekwe banotjila kene?

²⁰Ngakuyendiwe ku nlayo ne ku butendeki. Ha basingalebe tjinoyendidzana ne dama ileli abana tjedza.

²¹Banowoyendayenda mu shango bali mu buyendasi bukulu bana zhala, banowoti bafa ne zhala bakagwadza moyo bakalinga pezhugwi bakatuka mambo wabo ne Ndzimu wabo.

²²Banowolinga pasi bakabona buyendasi koga ne zhalima ne tjimo tjinotjisa, ngono banowolashigwa mu zhalima lakati zwititi.