Read Kalanga Zwipo 1 Bible Online

Zwipo 1 - Kalanga bible

Zwipo 1

¹Yahwe bakadana Mushe bali mu nshasha we bushanganilo beti,

²“Lebeleka ne bathu be Iziraela ubadwe uti, ‘Ha mmwe wenyu ezhisa tjipo tjinodwa mu zwithuwo kuna Yahwe, azhise tjipo tjinodwa mu danga le ng'ombe lile kene tjinodwa mu ngubi iye.

³Ha tjipo tjitje tjili tjibhayilo tjinopisiwa tjidwa mu zwithuwo zwizwe, atjizhise tjili tjilume tjisina bulema, atjiyise pa nkoba we nshasha we bushanganilo, kuti aamutjilike mbeli kwa Yahwe.

⁴Abige luboko gugwe pezhugwi kwe nsholo we tjibhayilo tjinopisiwa, ngono tjowoamutjigwa mu bumo gugwe kunthamila kugadzana.

⁵Abhaye nkono ihwoyo mbeli kwa Yahwe, ngono bapirisiti, bakololo ba Aroni, bazhise malopa banyase tjibeso tjinopisigwa zwibhayilo tjipa nkoba we nshasha we bushanganilo nge malopa betjipoteleka.

⁶Ngono aviye tjibhayilo tjinopisiwa atjithubukanye nge mitezho,

⁷bapirisiti, bakololo ba Aroni banowoyilikanya hwuni pa tjibeso tjinopisigwa zwibhayilo

⁸Bapirisiti, bakololo ba Aroni banowobiga mitezho ye tjibhayilo ne nsholo ne lizwizwi zubuyanana pezhugwi kwe hwuni dzimu moto pa tjibeso tjinopisigwa zwibhayilo,

⁹koga zwamukati kwatjo ne thozo dzatjo unowozwisuka nge vula. Ngono mpirisiti azwipise zose mu tjibeso tjinopisigwa zwibhayilo zwili tjibhayilo tjinopisiwa, tjili tjipo tjinopisiwa mu moto kube nnuhwo unonuhwa zwinozipa kuna Yahwe.

¹⁰“ ‘Ha nthu edusa tjipo tje tjibhayilo tjinopisiwa tjidwa mu ngubi, tjingabe mbudzi kene pkhwizi, aizhise ili ndume isina bulema.

¹¹Aibhayile ku lubizho gwe bunandzwa gwe tjibeso tjinopisigwa zwibhayilo mbeli kwa Yahwe, ngono bapirisiti, bakololo ba Aroni batole malopa ayo banyase tjibeso tjinopisigwa zwibhayilo betjipoteleka.

¹²Aithubukanye nge mitezho, aduse nsholo ne lizwizwi, ngono mpirisiti unowobiga mitezho ne nsholo wayo ne lizwizwi gwayo zubuyanana pezhugwi kwe hwuni dzimu moto mu tjibeso tjinopisigwa zwibhayilo.

¹³Koga zwamukati ne thozo azwisuke nge vula. Ngono mpirisiti unoyisa tjibhayilo kuna Yahwe, unowotjipisa tjose mu tjibeso tjinopisigwa zwibhayilo tjili tjibhayilo tjinopisiwa, tjipo tjinopisiwa mu moto, uli nnuhwo unozipa kuna Yahwe.

¹⁴“ ‘Ha tjipo tjinopiwa Yahwe tjili tjibhayilo tjinopisiwa tje nyuni, ndizo azhise tjipo tjitje ili njiba kene ngurukuku.

¹⁵Ngono mpirisiti unowoiyisa pa tjibeso tjinopisigwa zwibhayilo ebe eimona ntshibha eithubula nsholo, eupisila mu tjibeso tjinopisigwa zwibhayilo, ngono malopa ayo anowobhizhisigwa kuzhe mu lubadu gwe tjibeso.

¹⁶Aduse jelelo layo ne misiba azwilashile mu hwunde ye tjibeso tjinopisigwa zwibhayilo ku bhezhuba, mu tjizhalanlota.

¹⁷Aipalule na pakati, koga asingathubukanye mapapilo ayo. Ngono mpirisiti aipisile mu tjibeso tjinopisigwa zwibhayilo, pezhugwi kwe hwuni dzimu moto, tjibhayilo tjinopisiwa, tjili tjipo tjinopisiwa mu moto kube nnuhwo unozipa kuna Yahwe.’ ”