Read Kalanga Zwipo 11 Bible Online

Zwipo 11 - Kalanga bible

Zwipo 11

¹Yahwe bakadwa Mushe na Aroni bakati,

²Idwani bana be Iziraela muti, “Ezwi ndizo zwitjili zwamungaja mu phuka dzose dzimu shango.

³Phuka imwe ne imwe ina thozo dzakapalalana kakale izewula mungaija.

⁴Kuna dzimwe dzinozewula ngono thozo dzadzo dzisakapalalana, kukabe ne dzina thozo dzakapalalana, koga dzisingazewule musitongodzija: I kamela, ngobe inozewula, ngono thozo dzadzo adzizopalalana, dzakatemapala kumuli.

⁵Mbila, ngobe inozewula koga aina thozo dzakapalalana, yakatemapala kumuli.

⁶Shulo, ngobe inozewula ngono aina thozo dzakapalalana, yakatemapala kumuli.

⁷Hwotji, ngobe ina thozo dzakapalalana koga aitozewula, yakatemapala kumuli.

⁸“Musitongoja nyama yadzo ne mitumbu yadzo musitongoikutha, dzakatemapala kumuli.

⁹“Mungaja tjimwe ne tjimwe tjinogala mu vula dze gungwa kene mu njizi, tjina mapapilo ne makwapa.

¹⁰Koga tjimwe ne tjimwe tjinogala mu makungwa kene mu njizi tjisina mapapilo ne makwapa, zwili zwikonyana zwinonyewula mu vula zwigala mu vula, muzwitole zwili mayila mu muli.

¹¹Zwigale zwili mayila mu muli, musitongoja nyama yazo ne zwitumbu zwazo muzwiyile.

¹²Tjimwe ne tjimwe tjinogala mu vula tjisina mapapilo ne makwapa tji mayila mu muli.

¹³“Edzi ndidzo nyuni dzinoyila dzisingajiwe, dzu ne gola ne dzu le hwobe,

¹⁴ne njelele ne luphangu ne njudzi dzago,

¹⁵gungubo kuyenda nge ludzi gwalo;

¹⁶ne fukumudzi ne ikundamwenyu ne hwungwe ne luphangu gukulu kuyenda nge ludzi gwago;

¹⁷ishwiyo ne dada ne fukumudzi,

¹⁸gunda jena ne luphangwana ne ludzi gumwe gwe gola

¹⁹ne hanganlobe ne thame ne ludzi gwadzo ne tjibelu ne manlembe.

²⁰“Zwikonyana zose zwina mapapilo zwiyenda ne makumbo manna zoyila mu muli.

²¹Koga mu zwikonyana zwitukununu zwina mapapilo zwiyenda nge makumbo manna zwitjuluka mungazwija.

²²Muzwili mungaja phashu kuyenda nge ludzi gwayo, tjihwong'wane kuyenda nge ludzi gwatjo, bhombo kuyenda nge ludzi gwalo ne mantjese kuyenda nge ludzi gwatjo.

²³Koga zwikonyana zwitukununu zose zwina mapapilo zwiyenda nge makumbo manna zoyila mu muli.

²⁴“Zwithu zwingamutemapadza ndiyezwi, wabhata tjimwe tjazo tjakafa unowotemapala kunoswika zhuba lingina.

²⁵Unowobe asenga tjimwe tjazo tjakafa, asuke zwiambalo zwizwe, ngono unowobe akatemapala kuswikila zhuba lingina.

²⁶Phuka imwe ne imwe ina thozo dzakapalalana koga isingazewule yakatemapala mu muli. Mmwe ne mmwe waikutha unowobe atemapala.

²⁷Phuka dzose dzinotshamba nge matshimba, mu phuka dzose dzinoyenda nge makumbo manna, dzakatemapala mu muli. Mmwe ne mmwe ungakutha ntumbu we imwe yadzo, unowobe atemapala kuswikila zhuba lingina.

²⁸Ngono iye ungasenga ntumbu wayo asuke zwiambalo zwizwe, ngono unowobe atemapala kuswikila zhuba lingina. Zwithu izwezwi zwakatemapala mu muli.

²⁹“Ezwi ndizo zwitjili zwinokambayila zwakatemapala mu muli: I tjetje ne mbeba ne tabentabe ne ludzi gwatjo,

³⁰ne temaphulu ne mbulu ne tjibululu ne dotomosi ne zhayivi.

³¹Ezwi ndizo zwakatemapala mu muli muna zose zwinokambayila, iye unozwikutha zwakafa, unowotemapala kuswikila zhuba lingina.

³²Ha tjimwe tjazo tjakafa tjingawila mu tjimwe, tjithu itjetjo tjawigwa tjowotemapala, tjingabe tjija tje lukuni kene tjiambalo kene ganda kene saka kene tjija tjimwe ne tjimwe tjinoshingisiwa. Tjidubikwe mu vula ngono tjowotemapala kuswikila zhuba lingina, tjibe tjitjenapala.

³³Ha tjimwe tjazo tjingawila mu hali ye ntapkhwi, tjimwe ne tjimwe tjimuili tjowotemapala, ngono hali iyeyo ipkhwanyiwe.

³⁴Zojiwa zose zwimu tjija itjetjo, zwabe zwingajiwa, zwinganyadziwa nge vula zowobe zwatemapala ne tjinong'wiwa tjingabe tjili mu tjija itjetjo tjowobe tjatemapala.

³⁵Tjimwe ne tjimwe tjinowowigwa nge tjimwe tjazo tjakafa tjowotemapala, ingabe oveni kene itofo, tjipkhwanyiwe tjibe zwikwetjekwetje, ngobe zwatemapala, zwakatemapala mu muli.

³⁶Nenguba kwakajalo, nsenya kene tshime lina vula zwakatjenapala, koga tjimwe ne tjimwe tjingakutha tjimwe tjazo tjakafa tjowotemapala.

³⁷Ha tjimwe tjazo tjingawila mu mbewu inodzwagwa, mbewu yakatjenapala.

³⁸“Koga ha mbewu ingadubikwa mu vula, tjimwe tjazo tjibe tjiwila muili, mbewu inowotemapala.

³⁹“Ngono ha phuka inojiwa ingazwifila, mmwe ebe ekutha ntumbu wayo, unowotemapala kuswikila zhuba lingina.

⁴⁰Ngono iye ungaja nyama yayo asuke zwiambalo zwizwe, ngono unowobe akatemapala kuswikila zhuba lingina, kene ungasenga ntumbu wayo asuke zwiambalo zwizwe, ngono unotemapala kuswikila zhuba lingina.

⁴¹“Tjimwe ne tjimwe tjinokambayila pasi tjoyila; tjisitongojiwa.

⁴²Tjimwe ne tjimwe tjinosoba nge ntumbu, kene tjiyenda nge makumbo manna, kene tjina makumbo manjinji, zwithu zose zwinosoba na pasi, musitongozwija, ngobe zoyila.

⁴³Musitongo zwitemapadza nge tjimwe tje zwitjili zwinokambayila.

⁴⁴Ngobe imi ndi Yahwe Ndzimu wenyu, ndizo muzwiyengemadze, muyengemale, ngobe imi ndakayengemala. Musitongo zwitemapadza nge tjimwe tjinosoba na pasi.

⁴⁵Ngobe ndimi Yahwe, Ndzimu wenyu wakamudusa ku shango ye Egipiti, ndizo makafanila yengemala, ngobe imi ndakayengamala.”

⁴⁶Oyu ndiwo nlayo we phuka ne nyuni ne zwitjili zose zwinotjila zwiyendayenda mu vula ne zwinosoba na pasi mu shango,

⁴⁷kuti ndizo muthame n'gathu pakati kwe zwakatemapala ne zwakatjenapala na pakati kwe zwitjili zwingajiwa ne zwitjili zwisingake zwikajiwa.