Read Kalanga Zwipo 13 Bible Online

Zwipo 13 - Kalanga bible

Zwipo 13

²“Ha nthu angagagwa nge londa mu mbili kene kadzuka kene kabhudiwa nge ikulu, ngono ebe ebdzwila kube kube bugwele gwe mapele. Ipapo azhisiwe kuna Aroni mpirisiti kene ku mmwe we bakololo babe.

³Mpirisiti unowolingisisa bugwele gumu mbili uwe, ngono ha mbethe upa londa washanduka wabe ntjena ne londa lilingika lakatsha likapinda ganda labe ku nyama, gowobe guli bugwele gwe mapele. Ha mpirisiti anlingisisa kabona unowoleba kuti wakatemapala.

⁴Koga ha londa lili jena, ngono lisakatsha kunogina ku nyama ne mbethe usakashanduka ukabe ntjena, mpirisiti unowogadza n'gwele akanzhalilila asishangane ne bathu, mazhuba ali kutendeka.

⁵Ngono mpirisiti unonlingisisa kakale mu zhuba le butendeka, ngono mu kubona kukwe ha ebona bugwele gusakabdzwila nge mbili, mpirisiti unowon'gadza akanzhalilila kakale mazhuba ali kutendeka.

⁶Ngono mpirisiti unonlingisisa kakale mu zhuba le butendeka, ha londa lilingika litundubala lisakabdzwila nge ganda, ndizo mpirisiti unoleba kuti wakatjenapala, i londa koga. Ndizo n'gwele unowosuka zwiambalo zwizwe, ebe etjenapala.

⁷Koga shule kwe asinozwilakidza ku mpirisiti mu kutjenapadziwa kukwe, unowozwilakidza kakale mbeli kwe mpirisiti, ha kudzuka kubdzwila nge mbili.

⁸“Mpirisiti unowonligisisa kakale, ngono ha kudzuka kwakabdzwila nge ganda, ndizo mpirisiti unowoleba kuti wakatemapala, bugwele gwe mapele.

⁹“Ha nthu anging'wa nge bugwele gwe mapele, unowoyisiwa ku mpirisiti.

¹⁰Ngono mpirisiti unowolingisisa, ngono ha londa lili jena mu ganda, lakashandula mbethe uli ntjena, kuna nyama yakanyenama mu londa,

¹¹gowobe guli bugwele gwe mapele gusingapole mu ganda le n'gwele. Ngono mpirisiti unowoleba kuti n'gwele wakatemapala, kowobe kusingatjashinge kuti n'gwele ungazhaliligwa akathubukanyiwa nge bathu, ngobe akatemapala.

¹²Ngono ha bugwele gwe mapele gungabdzwila mbili wose, gwagugumuka mbili wose we n'gwele, kudwa ku nsholo kunoti ku gumbo, kuli sekwabona mpirisiti;

¹³mpirisiti unowonlingisisa, ngono mapele ha akagugumuka mbili uwe wose, mpirisiti unoleba kuti n'gwele wakatjenapala, gwakashanduka butjena; wakatjenapala.

¹⁴Koga ha nyama dzidze dzakanyenama dzili shaba, unowobe akatemapala.

¹⁵Mpirisiti unowolingisisa nyama shaba dzakanyenama kakale, ebe eleba kuti n'gwele wakatemapala. Nyama dzakanyenama dzodwa kuti wakatemapala; una bugwele gwe mapele.

¹⁶Koga ha nyama shaba dzakanyenama dzishanduka kakale dzibe tjena, ipapo n'gwele azhe ku mpirisiti,

¹⁷ngono mpirisiti unowonlingisisa. Ngono ha malonda ashanduka abe matjena, ndizo mpirisiti unowoleba kuti n'gwele wakatjenapala.

¹⁸“Ha kuna nthu una londa lakapola,

¹⁹ngono pakabe pana londa kube kudwa londa limwe jena kene kube bushaba gwakashanganyila ne butjena, kulakidziwe mpirisiti.

²⁰Mpirisiti alingisise, ngono ha kuboneka kwakangina kupinda ganda ne mbethe wakashanduka uli ntjena, ndizo mpirisiti alebe kuti nthu uwoyu wakatemapala. Bugwele gwe mapele gwakazha nge londa.

²¹Koga ha mpirisiti angalilingisisa, kawana mbethe mu lili usi ntjena na ilo lisakangina kupinda ganda, koga lakatundubala, mpirisiti anzhalilile asishangane ne bathu kwe mazhuba ali kutendeka.

²²Ngono ha labdzwila mu ganda, mpirisiti alebe kuti wakatemapala; bugwele gunoandama.

²³Koga ha londa lili pathu pang'ompela kakale lisingabdzwile, lili banga le londa, mpirisiti alebe kuti wakatjenapala.

²⁴“Kene nthu ana litshwa mu ganda, ngono nyama dzibe dzinyenama dzibe ne bushaba guna butjena kene dzibe tjena,

²⁵mpirisiti agulingisise, ngono ha mbethe umu litshwa washanduka wabe ntjena kakale ulingika wakangina kupinda ganda, kobe kwabe mapele, gwakazwagwa nge litshwa. Ngono mpirisiti alebe kuti nthu iwoyo wakatemapala; una bugwele gwe mapele.

²⁶Koga ha mpirisiti agulingisisa, kawana mbethe usi ntjena ne litshwa gusakangina kupinda ganda, ngono gwakatundubala, mpirisiti unowozhalilila nthu iwoyo kunthubukanya ne bathu kwe mazhuba ali kutendeka.

²⁷Ngono mpirisiti unowonlingisisa kakale mu zhuba le butendeka, kubona kene gobdzwila nge ganda, mpirisiti unowoleba kuti nthu iwoyo wakatemapala, una bugwele gwe mapele.

²⁸“Koga ha londa lili pathu pang'ompela lisingabdzwile nge ganda, koga lakatundubala, lowobe lili londa lakadwa mu litshwa, ngono mpirisiti unowoleba kuti nthu iwoyo wakatjenapala, ngobe lili banga le litshwa.

²⁹“Ha nlume kene nkadzi ana londa mu nsholo kene pa tjiledu,

³⁰mpirisiti unolilingisisa. Ngono ha liboneka lakangina kupinda ganda ne vudzi kene ndedu mulili kuna mbala we gwakwa kakale kuli kutetjanana, ndizo mpirisiti unoleba kuti wakatemapala, una ikulu, bugwele gwe mapele gwe nsholo kene gwe tjiledu.

³¹Ngono ha mpirisiti angalingisisa ikulu, ngono tjiboneka tjisakangina kupinda ganda, kakale kusina vudzi dema kene ndedu thema mutjili, ndizo mpirisiti unowozhalilila n'gwele kunthubukanya ne bathu kwe mazhuba ali kutendeka.

³²Ngono mpirisiti alingisise ikulu kakale mu zhuba le butendeka, ngono ha ikulu tjisakabdzwila, kakale kusina mbala we gwakwa mutjili, tjiboneka tjisakangina kupinda ganda,

³³nthu iwoyo atesegwe kutendenyedziwa ikulu. Ngono mpirisiti azhalilile n'gwele kunthubukanya ne bathu kwe mazhuba ali kutendeka.

³⁴Mu zhuba le butendeka mpirisiti alingisise ikulu kakale. Ngono ha ikulu tjisakabdzwila nge ganda kakale tjiboneka tjisakangina kupinda ganda, ndizo mpirisiti alebe kuti nthu iwoyo wakatjenapala, asuke zwiambalo zwizwe, ngono unowobe atjenapala.

³⁵Koga ha ikulu tjingabdzwila nge ganda shule kwe kutjenapadziwa kukwe,

³⁶mpirisiti anlingisise kakale. Ngono ha ikulu tjabdzwila nge ganda, mpirisiti aazotjafanila shaka vudzi le mbala we gwakwa kene ndedu ye mbala we gwakwa, n'gwele unowobe akatemapala.

³⁷Koga ha mpirisiti alinga ikulu kawana tjakamela mavudzi matema kene ndedu thema, kowobe kudwa kuti ikulu tjakapola, n'gwele wakatjenapala; ngono mpirisiti alebe kuti wakatjenapala.

³⁸“Ha nlume kene nkadzi ana mafusi mu mbili uwe,

³⁹mpirisiti aalingisise. Ngono ha mafusi mu ganda le mbili ali butjena gwakatundubala, kowobe kuli gwe dzuka koga; nthu iwoyo wakatjenapala.

⁴⁰“Ha nlume akasubuka mavudzi e nsholo, unobe ana bhalo koga wakatjenapala.

⁴¹Ha nlume akasubuka mavudzi e phazha unobe ana bhalo le phazha koga wakatjenapala.

⁴²Koga ha bhalo lili le nsholo kene le phazha lina ikulu tjina bushaba gwakashangana ne butjena, gowobe guli bugwele gwe mapele gwakambhuda mu bhalo le nsholo kene mu bhalo le phazha.

⁴³Mpirisiti unowonlingisisa, ngono ha kuna londa lina bushaba gwakashangana ne butjena mu bhalo lile kene mu phazha iye, guboneka gunga mapele e ganda le mbili,

⁴⁴kowobe kudwa kuti nthu unogwala mapele, wakatemapala. Ngono mpirisiti alebe kuti wakatemapala; bugwele gumu nsholo.

⁴⁵“Nthu unogwala bugwele gwe mapele wakafanila ambala zwiambalo zwakapaluka ebe eletja mavudzi awe asakakamiwa, ebe ezwibhata nlomo wa pezhugwi emimila eti, ‘Kutemapala, kutemapala!’

⁴⁶Unowogala akatemapala misi yose ye bugwele gugwe, wakatemapala, agale ega, mu bugalo gu kuzhe kwe nzi.

⁴⁷“Ha kuna madziba e bugwele gwe mapele mu tjiambalo, tjingabe tje bukuse gwe pkhwizi kene tjiambalo tjakalukwa nge wulu,

⁴⁸kene tjili tjiambalo tjakathumiwa nge wulu, kene jila, kene tjakalukigwa bukuse mu ganda kene tjakathamwa nge ganda,

⁴⁹ha bugwele gwathama dziba le mbala we bgwelele kene nshaba mu tjiambalo, tjingabe tjakalukwa kene lukigwa bukuse gwakalukigwa mu ganda, kene tjimwe tjakathamwa nge ganda, gobe guli bugwele gwe mapele, gwakafanila lakidziwa mpirisiti.

⁵⁰Ngono mpirisiti unowolingisisa bugwele, ngono tjithu tjinowobe tjina bugwele unotjizhalilila akatjibigila ntome kwe mazhuba ali kutendeka.

⁵¹Mpirisiti unotjilingisisa kakale mu zhuba le butendeka, ngono ha dziba le mapele lakabuwa tjiambalo, tjili tjakalukwa nge wulu kene tjakalukigwa mu ganda kene lili ganda linoshingisiwa tjimwe, bugwele igogu mapele, tjithu itjetjo tjakatemapala.

⁵²Mpirisiti unowopisa tjiambalo, dziba lingabe lili mu tjiambalo tjakalukwa nge wulu, kene tje jila kene tjimwe tje ganda, ngobe mapele, tjipisiwe mu moto.

⁵³“Ngono ha mpirisiti alingisisa, ngono kawana dziba le bugwele lisakabuwa tjiambalo tje jila lakalukwa kene tjili tjiambalo tjakathamiwa nge ganda,

⁵⁴mpirisiti unowolaula kuti tjiambalo tjina dziba le bugwele tjisukwe ebe etjibigila ntome akatjizhalilila kwe mazhuba ali kutendeka.

⁵⁵Mpirisiti unowotjilinga kakale shule kwe kusukwa kwatjo. Ngono ha dziba le bugwele lisashanduka mbala nenguba lisakabuwa tjiambalo, tjobe tjakatemapala, tjakafanila pisiwa mu moto nenguba dziba le mapele lili shule kene lili mbeli.

⁵⁶Koga ha mpirisiti angalingisisa, ngono kawana dziba le bugwele lakatundubala, shule kwe kusukiwa kwatjo, unowopalula edusa dziba mu tjiambalo tje jila kene tjakalukwa nge lunji kene tjakalukwa nge mutjini kene tje ganda.

⁵⁷Ha dziba lingaboneka kakale mu tjiambalo, tjakalukwa nge lunji kene tjakalukwa nge mutjini kene tjimwe tjakathamwa nge ganda tjisinobe tjasukwa, tjowobe tjibdzwila, mweni watjo atjipise nge moto.

⁵⁸Koga ha tjiambalo tjakalukwa nge wulu kene tjili tjiambalo tje jila kene tje ganda tjingasukwa dziba le bugwele tjikatjena, tjisukwe kakale gwe bubili, ndizo tjowobe tjatjenapala.”

⁵⁹Oyu ndiwo nlayo we bugwele gwe mapele mu tjiambalo tje wulu kene tje jila lakalukwa kene lakathung'wa kene tjili tjiambalo tjakathamiwa nge ganda, kubona kene tjakatjenapala kene tjakatemapala.