Read Kalanga Zwipo 14 Bible Online

Zwipo 14 - Kalanga bible

Zwipo 14

²“Oyu ndiwo nlayo we n'gwele we mapele, ha apola, mu zhuba le kutjenapadziwa kukwe. Azhisiwe ku mpirisiti.

³Mpirisiti unowobhudila kuzhe kwe bukotokelo kanonlingisisa. Ndizo ha bugwele gwe mapele gwakapola,

⁴mpirisiti unolaula kuti kutogwe nyuni mbili dzinotjila dzakatjenapala ne lukuni gwe nti we nsida ne nsungo nshaba kwakabondelela ne denjana le hisopi.

⁵Ngono mpirisiti unowolaula kuti imwe nyuni ibulayigwe mu ndilo ye ntapkhwi ina vula yatjegwa mu nsenya iwunga.

⁶Mpirisiti unowotola nyuni inotjila ne lukuni gwe nsida ne nsungo nshaba kwakabondelela ne denjana le hisopi, ebe ezwidubika mu malopa e nyuni yabulawa akashangana ne vula yatjegwa mu nsenya iwunga.

⁷Mpirisiti unowonyasa nthu wapola bugwele gwe mapele unotjenapadziwa nge malopa katendeka, ndizo ebe eleba kuti watjenapala. Ebe eletja nyuni inotjila iwulukila ku shango.

⁸Iwoyo unowotjenapadziwa unowosuka zwiambalo zwizwe, ebe ekera mavudzi awe wose, ebe engula mbili, ndiko kwaanowobe atjenapala, shule kwa ikoko unowobe wobgwilila ku bukotokelo, koga unowogala kuzhe kwe nshasha uwe mazhuba ali kutendeka.

⁹Mu zhuba le kutendeka unowotesela mavudzi wose mu nsholo kakale ne ndedu ne siye dze mesho ne mavudzi wose mu mbili uwe. Ebe esuka zwiambalo zwizwe ebuya engula mbili, ndiko kwaanowobe atjenapala nge buzhalo.

¹⁰“Mu zhuba le buzhanakadzi unotjenapadziwa azhise pkhwizana ndume dzili mbili dzisina bulema ne pkhwizana hadzi ina gole ling'ompela isina bulema ne tjipo tje mathunde tje tjilizanyo tje seme thatu ye bgwisa gwakashanganyiwa ne mafuta angapa kung'ompela kwe butatu gwe le lithara ye mafuta.

¹¹Ngono mpirisiti unontjenapadza aise nthu unotjenapadziwa ne zwipo izwezwi kuna Yahwe pa nkoba we nshasha we bushanganilo.

¹²Mpirisiti atole imwe ye pkhwizana ndume, aiyise ili tjibhayilo tje nlandu ne gaswa le lithara ye mafuta azwizunguze ili tjibhayilo tjinozunguziwa mbeli kwa Yahwe.

¹³Mpirisiti abhayile pkhwizana panobhayigwa tjibhayilo tje tjibi ne tjibhayilo tjinopisiwa, mu bugalo gwakayengemala, ngobe tjibhayilo tje nlandu tjonga tjibhayilo tje tjibi nge tje mpirisiti, tjakayengemala kwazo.

¹⁴Mpirisiti atole mamwe e malopa e tjibhayilo tje nlandu, ngono mpirisiti abhome pa theswi ye zebe ye luji ye unotjenapadziwa ne pa tjinyala tjikulu tje luboko gwe luji ne pa tjinyala tjikulu tje gumbo le luji.

¹⁵Mpirisiti atole mamwe e mafuta mu gaswa le lithara aadile mu tjiazha tjitje tje luboko gwe lumeshwe,

¹⁶abe edubika tjinyala tjitje tje luboko gwe luji mu mafuta amu tjiazha tjitje tje luboko gwe luji, abe enyasa mamwe mafuta nge tjinyala tjitje tjinotendeka katendeka mbeli kwa Yahwe.

¹⁷Ngono mafuta asala mu tjiazha tje mpirisiti aabhome pa theswi ye zebe ye luji ye unotjenapadziwa ne mu tjinyala tjikulu tje luboko gwe luji ne mu tjinyala tjikulu tje gumbo le luji, pezhugwi kwe malopa e tjibhayilo tje nlandu.

¹⁸Ngono mafuta asala mu tjiazha tje mpirisiti aadile mu nsholo we unotjenapadziwa. Ndizo mpirisiti unowon'gadzanya na Yahwe.

¹⁹“Ndizo mpirisiti unowobhaya tjibhayilo tje tjibi kugadzanya iwoyo unowotjenapadziwa kutemapala kukwe. Ngono shule kwa ikoku abhaye tjibhayilo tjinopisiwa,

²⁰ngono mpirisiti unowopisa tjibhayilo tjinopisiwa ne tjipo tje mathunde pa tjibeso tjinopisigwa zwibhayilo. Ndizo mpirisiti unowogadzanya n'yengemadziwa na Yahwe, ndiko kwaanowobe atjenapala.

²¹“Koga ha ali nshayi usingake katubula kungapo, atole pkhwizana ing'ompela ye tjibhayilo tje nlandu kube tjipo tjinozunguziwa kuti agadzanyiwe na Yahwe ne kung'ompela mu gumi kwe eifa kwe bgwisa gwakanathiwa gwakashanganyiwa ne mafuta kube tjipo tje mathunde ne gaswa le lithara ye mafuta,

²²ne njiba mbili kene ngurukukwana mbili, sekwa angatubula, ing'ompela inowobe ye tjibhayilo tje tjibi imwe ikabe tjibhayilo tjinopisiwa.

²³Mu zhuba le buzhanakadzi unowozwiyisa ku mpirisiti kutjenapadziwa, pa nkoba we nshasha we bushanganilo mbeli kwa Yahwe.

²⁴Ngono mpirisiti unowotola pkhwizana ye tjibhayilo tje nlandu ne gaswa le lithara ye mafuta, mpirisiti unozwitola zwili tjipo tjinozunguziwa mbeli kwa Yahwe.

²⁵Mpirisiti unowobhaya pkhwizana ye tjibhayilo tje nlandu, ngono ebe etola mamwe e malopa e tjibhayilo tje nlandu eabhoma pa theswi ye zebe ye luji ya iwoyo unotjenapadziwa ne mu tjinyala tjikulu tje luboko gwe luji ne mu tjinyala tjikulu tje gumbo lile le luji.

²⁶Ngono mpirisiti unowodila mamwe e mafuta mu tjiazha tje luboko gugwe gwe lumeshwe,

²⁷ebe enyasa nge tjinyala tjitje tjinotendeka katendeka mamwe e mafuta amu tjiazha tjitje tje luboko gwe lumeshwe mbeli kwa Yahwe.

²⁸Ngono mpirisiti unowobhoma mamwe mafuta pa theswi ye zebe ye luji ya iwoyo unotjenapadziwa ne mu tjinyala tjikulu tje luboko gwe luji ne mu tjinyala tjikulu tje gumbo le luji, ipo zwapo pabhong'wa malopa e tjibhayilo tje nlandu.

²⁹Ngono mafuta asala amu tjiazha tje mpirisiti unowoadila mu nsholo we ntjenapadziwa kun'gadzanya na Yahwe mbeli kwa Yahwe.

³⁰Ndizo unoyisa, njiba kene ngurukukwana sekwa angatubula,

³¹imwe ili tjibhayilo tje tjibi imwe ili tjibhayilo tjinopisiwa ne tjipo tje mathunde. Mpirisiti unowobe egadzanya unotjenapadziwa na Yahwe ngothama saikoku.

³²Oyu ndiwo nlayo we nthu unogwala mapele, asingatubule zwibhayilo zwe kutjenapadziwa kukwe.”

³³Yahwe bakadwa Mushe na Aroni bakati,

³⁴“Ha mungina mu shango ye Kanana, yandakamupa kuti ibe yenyu, ndibe ndilonga mapele mu ng'umba mu shango yandakamupa,

³⁵mweni we ng'umba wakafanila yenda ku mpirisiti kunombudza nge kwago eti, ‘Ndabona madziba anonga e bugwele mu ng'umba yangu.’

³⁶Mpirisiti unowolaula kuti kudusiwe zwija zose mu ng'umba kutanga asathu kanolinga bugwele mukati kwayo, kuti kusidwe kutogwa kuti tjimwe ne tjimwe tjimu ng'umba tjakatemapala, kukoti kwadusiwa zwija ndiko mpirisiti kwaanowongina mu ng'umba kuyibona.

³⁷Ngono unowonolinga bugwele, ngono ha bugwele guli mu guma le ng'umba nge mbala we bgwelele kene nge madziba mashaba, kakale ha guboneka gwakangina kwazo mu guma,

³⁸ndizo mpirisiti unowobhudila kuzhe kwe ng'umba kaizhalila kwe mazhuba ali kutendeka.

³⁹Ngono mpirisiti unowozha kakale mu zhuba le butendeka kuwolinga, ngono ha bugwele gwakabdzwila mu guma le ng'umba,

⁴⁰mpirisiti unolaula kuti kudusiwe mabgwe akanging'wa nge bugwele aposegwe ku bugalo gwakatemapala kuzhe kwe nzi.

⁴¹Ngono unowothama kuti ng'umba ikukugwe mpharelo mukati kose, mpharelo wose wakukugwa ube unotebuligwa ku bugalo gwakatemapala kuzhe kwe nzi.

⁴²Ndizo kube kunotogwa mabgwe apoga kunomisa akadusiwa, kuko kopharegwa guma butshwa.

⁴³“Ha bugwele gungabgwililila ng'umba kakale, shule kwe mabgwe ne mpharelo zwadusiwa, kubuya kupharegwa,

⁴⁴mpirisiti unowonolinga kakale, ngono ha bugwele gwabdzwila mu ng'umba, gowobe guli mapele anobulaya, ndizo ng'umba inowobe yakatemapala.

⁴⁵Ng'umba iligiwe, mabgwe ayo ne mapango ne mpharelo wose zwinolashigwa kuzhe kwe nzi ku bugalo gwakatemapala.

⁴⁶Ha kuna ungangina mu ng'umba iyeyi itjakazhaligwa, unowotemapala kuswikila zhuba lingina.

⁴⁷Ha kuna ungayizela kene kajila mu ng'umba yakazhaliligwa bugwele asuke zwiambalo zwizwe.

⁴⁸“Koga ha mpirisiti angazha kuwolinga ng'umba, kawana bugwele gusakabdzwila mu ng'umba, shule kwe kupharegwa kwe ng'umba, mpirisiti unowoleba kuti ng'umba yakatjenapala, ngobe bugwele gwakadusiwa.

⁴⁹Kutjenapadza ng'umba iyeyi, ngaatole nyuni mbili ne lukuni gwe nsida ne nsungo nshaba ne denjana le hisopi.

⁵⁰Ngono abulayile nyuni ing'ompela mu ndilo ye ntapkhwi ina vula yakatjegwa mu nsenya iwunga.

⁵¹Abe etola lukuni gwe nsida ne denjana le hisopi ne nsungo nshaba ne nyuni inotjila azwidubike mu malopa e nyuni yabulawa ne mu vula yakatjegwa mu nsenya iwunga, abe enyasa ng'umba katendeka.

⁵²Ndizo atjenapadze ng'umba nge malopa e nyuni ne vula yakatjegwa iwunga mu nsenya ne nyuni inotjila ne lukuni gwe nsida ne denjana le hisopi ne nsungo nshaba.

⁵³Abe eletja nyuni inotjila iwuluka ibhuda mu nzi iyenda ku shango, ndizo abe ethama ng'umba kuti iamutjilike, ngono inowobe yatjenapala.”

⁵⁴Oyu ndiwo nlayo we bugwele gumwe ne gumwe gwe mapele, we ikulu,

⁵⁵dziba le bugwele gwe mapele mu tjiambalo kene mu ng'umba

⁵⁶ne londa kene kudzuka kene tjibadzi

⁵⁷kulakidza ha kwakatemapala ne kwakatjenapala. Oyu ndiwo nlayo we bugwele gwe mapele.