Read Kalanga Zwipo 16 Bible Online

Zwipo 16 - Kalanga bible

Zwipo 16

¹Yahwe bakalebeleka na Mushe shule kwe lufu gwe bakololo ba Aroni babili, pabakasedzela mbeli kwa Yahwe bebe befa.

²Ngono Yahwe bakadwa Mushe bakati, “Budza Aroni nkulu uwo kuti asingine tjibaka tjimwe ne tjimwe mu bugalo gwakayengemala mukati kwe tjisitilo, mbeli kwe tjigalo tje ngoni tji pezhugwi kwe Bhokisi le Tjidumano, kuzhe kwa ikoko unowofa, ngobe ndowozwilakidza ndili mu gole pezhugwi kwe tjigalo tje ngoni.

³Koga Aroni wakafanila ngina mu bugalo gwakayengemala ana nkong'wana we tjibhayilo tje tjibi ne nyundo ye tjibhayilo tjinopisiwa.

⁴“Wakafanila mbala hazu yakayengemala ye jila ne burukhwi gwe jila kuzwizwimba mbili, akazwisunga nge mwandabula we jila mu thunji, ambale hwutshe ye jila, ndizo zwiambalo zwakayengemala, angule mbili abe e zwiambala.

⁵“Atole mbudzi mbili mu gubungano le Baiziraela dze phoko dze tjibhayilo tje tjibi ne nyundo ing'ompela ye tjibhayilo tjinopisiwa.

⁶Aroni ayise nkono uli tjibhayilo tje tjibi tjitje, abe ezwigadzanya na Yahwe, iye ne be nsha uwe.

⁷Ndizo abe etola phoko mbili adziyise mbeli kwa Yahwe pa nkoba we nshasha we bushanganilo.

⁸Ngono Aroni akandile kushalula pakati kwe phoko mbili, imwe ishaluligwa Yahwe imwe ishaluligwa Azazele.

⁹Ngono Aroni ayise phoko yaati ekandila ikashaluligwa Yahwe, aiyise ili tjibhayilo tje tjibi.

¹⁰Koga phoko yaati ekandila ikashaluligwa Azazele aiyise itjila mbeli kwa Yahwe, kuthama kugadzana na Yahwe ndiyo, iyeyo ibe itatigwa ku tjilambanyika kuna Azazele.

¹¹“Aroni unowoyisa nkong'wana uli tjibhayilo tje tjibi tjitje, unowozwigadzanya na Yahwe ezwithamila iye ne be nsha uwe, unozwibhayila nkono uli tjibhayilo tje tjibi.

¹²Ngono unowotola lukambana gwe moto guli zhele masimbe anothuta mu tjibeso tjinopisigwa zwibhayilo mbeli kwa Yahwe ne motsha unozipa uli zhele luboko kabili, ebe euzhisa mukati kwe tjisitilo.

¹³Alonge motsha mu moto mbeli kwa Yahwe, busi gwe motsha gufukidze tjigalo tje ngoni tjipezhugwi kwe Bhokisi le Tjidumano, kuti asife.

¹⁴Ngono atole mamwe e malopa e nkono, aanyase nge tjinyala tjitje tjinotendeka mbeli kwe tjigalo tje ngoni, anyase kakale mbeli kwe Bhokisi le Tjidumano tje Ndzimu katendeka.

¹⁵“Ipapo abhaye mbudzi ye tjibhayilo tje tjibi tje bathu be Iziraela, ayise malopa ayo mukati kwe tjisitilo, athame nge malopa ayo sekwa athama nge malopa e nkono, aanyase pezhugwi kwe tjigalo tje ngoni na mbeli kwe Bhokisi le Tjidumano tje Ndzimu.

¹⁶Ndizo athamile bugalo gwakayengemala gadzano na Yahwe ngekwe kutemapala kwe bathu be Iziraela nenge matjinyo abo, zwibi zwabo zose, kakale ethamila ne nshasha we bushanganilo wakabe uli mu bali pakati kwe kutemapala kwabo.

¹⁷Kube kusina nthu mu nshasha we bushanganilo ha engina enothama gadzano mu bugalo gwakayengemala kudzina ebhudila kuzhe athama gadzano na Yahwe ezwithamila iye ne be nsha uwe ne gubungano lose le Iziraela.

¹⁸Shule abe ebhudila kuzhe ku tjibeso tjinopisigwa zwibhayilo tjimbeli kwa Yahwe, abe etjithamila gadzano, atole mamwe e malopa e nkono ne e mbudzi, abe ebhoma mu nyanga dze tjibeso tjinopisigwa zwibhayilo kutjipoteleka.

¹⁹Ngono anyase mamwe e malopa pezhugwi kwatjo nge tjinyala tjitje tjinotendeka katendeka, abe etjitjenapadza abuye atjiyengemadze kudwa mu kutemapala kwe bana be Iziraela.

²⁰“Ngono ha awidza kuthama gadzano ye bugalo gwakayengemala neye nshasha we bushanganilo neye tjibeso tjinopisigwa zwibhayilo unowoyisa mbudzi yakashaluligwa Azazele kuna Yahwe.

²¹Ngono Aroni unowobiga maboko awe wose pezhugwi kwe nsholo we mbudzi inotjila, ebe elebela pezhugwi kwayo matjinyo wose e bathu be Iziraela ne milandu yabo yose ne zwibi zwabo zose, ebe ezwipitshila mu nsholo we mbudzi, ebe eitatila ku tjilambanyika yakakwebiwa nge nlume wabe agala aishaluligwa.

²²Mbudzi inowosengela matjinyo abo wose ku shango isingagagwe, ngono iwoyo nlume unowoletja mbudzi ikayenda nge tjilambanyika.

²³“Ndizo Aroni unowongina mu nshasha we bushanganilo, ebe embula zwiambalo zwe bupirisiti zwaabe ambala engina mu bugalo gwakayengemala, ebe ezwisiya ipapo.

²⁴Unowobe engula mbili mu bugalo gwakayengemala, ebe eambala zwiambalo zwizwe, ebe ezha kakale eyisa tjibhayilo tjinopisiwa tjitje ne tje bathu, ebe ethama gadzano na Yahwe, iye ne ye bathu.

²⁵Ebe episa mafuta e tjibhayilo tje tjibi mu tjibeso tjinopisigwa zwibhayilo.

²⁶Iwoyo wakwebela mbudzi ku tjilambanyika kuna Azazele asuke zwiambalo zwizwe abuye angule mbili asathu kabgwilila mu bukotokelo.

²⁷Nkono ne mbudzi zwe tjibhayilo tje tjibi zwe malopa akazhisiwa kuthama gadzano mu bugalo gwakayengemala, zowosengegwa kuzhe kwe bukotokelo, makanda ne nyama yadzo ne miswane zowopisiwa nge moto.

²⁸Iwoyo wazwipisa asuke zwiambalo zwizwe abuye angule mbili, shule kwa ikoku abe ebgwilila mu bukotokelo.

²⁹“Kube nlayo nge kusingapele mu Iziraela kuti, kuti nge mwedzi we butendeka, mu zhuba le bugumi le mwedzi, muzwinyime zojiwa, kakale kusibhakhwe nshingo, kuli ntebe kene ntaya ungabe amukumba;

³⁰ngobe mu zhuba ileli makagadzanyiwa na Yahwe, kuti mutjenapale, mowotjenapala mu zwibi zwenyu mbeli kwa Yahwe.

³¹I zhuba le Sabata lakayengemadzigwa kuti munyaluluke, kakale muzwinyime zojiwa, nlayo nge kusingapele.

³²Kakale mpirisiti wakazhodziwa kakale akashaluligwa bupirisiti mu bumo gwa tate babe, athame kugadzana akaambala zwiambalo zwakayengemala zwe bupirisiti.

³³Athamile Bugalo gwakayengemala kupindisa kugadzana, athamile nshasha we bushanganilo kugadzana kose ne tjibeso tjinopisigwa zwibhayilo atjithamile bo, abuye athamile bapirisiti ne bathu bose be gubungano.

³⁴Oyu ube nlayo mu muli nge kusingapele kose, kuti kugadzana na Yahwe kuthamigwe bathu be Iziraela kang'ompela nge gole ngekwe zwibi zwabo.” Ngono Mushe kathama sekwa adwiwa ndi Yahwe.