Read Kalanga Zwipo 18 Bible Online

Zwipo 18 - Kalanga bible

Zwipo 18

¹Yahwe bakadwa Mushe bakati,

²“Idwa bathu be Iziraela uti, ‘Ndimi Yahwe Ndzimu wenyu.

³Musitongothama sekwa banothama mu shango ye Egipiti, ikweno kwamakabe muligele, kakale musitongothama sekwa banothama mu shango ye Kanana, ikweno kwandinomuyisako. Musitongotobela milayo yabo.

⁴Mulondolodze milayo yangu, muitobele, ndimi Yahwe Ndzimu wenyu.

⁵Ndizo mulondolodze milayo yangu ne ndaulo dzangu, kuti mutjile, ndimi Yahwe.

⁶“ ‘Kusitongowanika mmwe wenyu ungashaka gamu lile kuwalilana nalo. Ndimi Yahwe.

⁷Usitongolengudza tate babo ngowalilana na mme yabo, mme yabo ndi mme yabo, usitongowalilana nabo.

⁸Usitongolengudza tate babo ngowalilana ne nkadzi wa tate babo ngoti mbili uwe nge wa tate babo.

⁹Usitongowalilana ne hazwadzi iyo, ungabe ali nkololokadzi wa tate babo na mme yabo, kene wa tate babo wakazwagwa mu nzi kene wakazwagwa kuzhe.

¹⁰Auzofanila shanganyila ngubo ne mwana we mwana uwo, unobe uzwilengudza.

¹¹Usitongowalilana ne hazwadzi iyo muli bana be nlume, i hazwadzi iyo.

¹²Usitongowalilana na maahadzi babo, ngobe i hazwadzi ya tate babo.

¹³Usitongowalilana na mannini babo, ngobe nnung'una wa mme yabo.

¹⁴Usitongowalilana ne nkadzi wa batatenini babo, ngobe ndi mannini babo.

¹⁵Usitongowalilana ne nkadzi we nkololo uwo, ngobe nlongo uwo.

¹⁶Usitongowalilana ne nkadzi we nkulu uwo, ngoti mbili we nkulu uwo.

¹⁷Usitongowalilana ne nkadzi nenge nkololokadzi uwe, kene ne nkololokadzi we nkololo uwe kene we nkololokadzi uwe, ngoti abe makamu awo ngoti bubi.

¹⁸Usitongolobola nkadzana uwo nkadzi uwo atjatjila unowobagwisanya.

¹⁹“ ‘Usitongowalilana ne nkadzi ali mu mazhuba awe, ngobe akatemapala.

²⁰Usitongowalilana ne nkadzi we ikamu tjitjo, ngobe unowobe uzwitemapadza.

²¹Usitongodusila mmwe we bana babo kupisiwa etjila ali tjibhayilo kuna Moleki, ndzimu we Baamoni, ngoti mowobe mulengudza zina le Ndzimu wenyu. Ndimi Yahwe.

²²Usitongolala ne nlume unthama nkadzi, kuthu kunoshimisa.

²³Kusibe ne nlume kene nkadzi unolala ne phuka, mbipo yakajalo inotemapadza.

²⁴“ ‘Musitongozwitemapadza ne tjimwe tje zwithu izwezwi, ngobe tjaba dzose dzandakatata mbeli kwenyu dzozwitemapadza nge zwithu izwezwi,

²⁵ne shango ikatemapala, ndizo ailoba shamu ngekwe tjibi tjayo ngono ikathwila kuzhe bathu bagele muili.

²⁶Koga imwi mulondolodze milayo ne ndaulo dzangu, musitongothama tjimwe tje zwithu izwezwi zwinoshimisa nenguba ali ntebe kene ntaya wakawolubila pakati kwenyu.

²⁷Ngobe bathu be shango bakabe bali mbeli kwenyu, bakathama zwithu zose izwezwi zwinoshimisa, ndizo shango ikatemapala.

²⁸Shango inomuthwila kuzhe, ha mungaitemapadza, sekwayakathwila kuzhe tjaba dzakabe dzili mbeli kwenyu.

²⁹Ngobe iye unowothama tjimwe tje zwithu izwezwi zwinoshimisa, nthu iwoyo wazwithama unowothubugwa mu bathu bakanyi kwabo.

³⁰“ ‘Ndizo mulondolodze ndaulo yangu, kuti musithame tjimwe tje mipanga iyeyi inoshimisa, yakabe ithamiwa mbeli kwenyu, kakale musitongo zwitemapadza ndiyo, ndimi Yahwe Ndzimu wenyu.’ ”