Read Kalanga Zwipo 19 Bible Online

Zwipo 19 - Kalanga bible

Zwipo 19

¹Yahwe bakadwa Mushe bakati,

²“Idwa gubungano le Baiziraela uti, ‘Yengemalani, ngoti imi Yahwe Ndzimu wenyu ndakayengemala.

³Nthu mmwe ne mmwe atete mmeyabe na tate babe, kakale mulondolodze mazhuba angu e kunyaluluka e Sabata, ndimi Yahwe Ndzimu wenyu.

⁴“ ‘Musipambukile ku midzimu ye zwifano kene kuzwithamigwa midzimu ye zwifano, Ndimi Yahwe Ndzimu wenyu.

⁵“ ‘Ha mubhayila Yahwe tjibhayilo tje mbakisano, mutjiyise nge zila inowothama kuti muamutjigwe.

⁶Nyama ye tjibhayilo ijiwe mu zhuba latjayisiwa ndilo kene tjimuka, ngono tjingabe tjasala kuswikila zhuba le butatu tjipisiwe nge moto.

⁷Ha kuna tjingajiwa mu zhuba le butatu, tjowobe tjatemapala kakale atjitowoamutjigwa.

⁸Nthu ungatjija unozwidanila nlandu, ngobe atemapadza kuthu kwakayengemala kwa Yahwe, ngono iwoyo nthu unowothubugwa mu bathu bakanyi kwabo.

⁹“ ‘Muti mu vuna mathunde e minda yenyu, musitongothusa ndima nenguba kuli kubgwililila zwiyako zwasala pamavuna.

¹⁰Kakale musitongoti matjela minda yenyu ye mizhambi mukadwapo mukabgwilulula mukanonungidzila zwasala ne zwawa, musiyile bashayi ne bataya, ndimi Yahwe Ndzimu wenyu.

¹¹“ ‘Musitongokwiba, kene thama zwe kutjebela, kene nyepelana.

¹²Musitongotuna nge zina langu munyepa, kowobe kuli lengudza zina le Ndzimu wenyu, ndimi Yahwe.

¹³“ ‘Usitongotjebela ikamu tjitjo kene kutjitolela. Usitongoshingisa nlanda ukalala usanlipa kuswikila tjimuka.

¹⁴Usitongolonga bhubuzebe bhiso kene kubigila bhofu ikuthi mbeli kwalo, koga utje Ndzimu uwo, ndimi Yahwe.

¹⁵“ ‘Musumikilise nge ndulamo, musitongoshalaula bashayi kene kuli thamila hanya bafumi, koga musumikilise ikamu tjenyu nge ndulamo.

¹⁶Usitongoyenda yenda uleba bungwa muna bakanyi kwenyu, kakale usitongothama tjimwe tjinolonga butjilo gwe ikamu tjitjo mu mbatsha. Ndimi Yahwe.

¹⁷“ ‘Usitongobhata mwana wa tate babo nge moyo, koga ungakumbuludzana ne ikamu tjitjo, kuti usidwe ushanganyila tjibi naye.

¹⁸Usitongobgwilizila kene kuli kubhata mmwe we bakanyi kwenyu nge moyo, koga ude ikamu tjitjo sekwa unozwida, ndimi Yahwe.

¹⁹“ ‘Mulondolodze milayo yangu. Usitongoletja zwithuwo zwizo zwakasiyana zwikakwiilana, kakale usitongodzwala zhila le zhowu mu nnda uwo, kene kuli kuambala tjiambalo tjakathumwa nge matyila mabili asingafanane.

²⁰“ ‘Ha nlume angawalilana ne nkadzi ali nlanda ngono ali nkadzi wakabigilidziwa nge mmwe nlume koga asathu kadzutunugwa kene kasunungugwa mu bulanda, basumikilisiwe, ngono basi bulawe, ngobe nkadzi wakabe asathu kasunungugwa mu bulanda,

²¹koga nlume aduse nyundo ezwiyisila tjibhayilo tje nlandu kuna Yahwe ku nkoba we nshasha we bushanganilo.

²²Mpirisiti unowon'gadzanya na Yahwe nge nyundo ye tjibhayilo tje nlandu ngekwe tjibi tjaathama, ngono banowonzwiibhatigwa.

²³“ ‘Mowoti musinoswika mu shango ye Kanana, miti yose yamunowodzwala ye mitjelo, mutole mitjelo yayo ili yakatemapala kwe makole matatu, kube kuyila mu muli kuja mitjelo yayo.

²⁴Ngono mu gole le bunna, mitjelo yayo yose inowobe yakayengemala, kube ingadusigwa tjipo tje mboko kuna Yahwe.

²⁵Koga mu gole le bushanu mungaja mitjelo yayo, ndizo inomuwatshila mitjelo, ndimi Yahwe Ndzimu wenyu.

²⁶“ ‘Musitongoja nyama ina malopa ayo. Musitongoshingisa buloyi.

²⁷Musitongozwitesela mutendenyedza misholo, kene kuli kuthubula ndedu dzenyu midzibo.

²⁸Musitongotemwa nyola mu mibili yenyu ngekwe bafi kene kuli kunyemba mibili yenyu, ndimi Yahwe.

²⁹“ ‘Usitongotemapadza nkololokadzi uwo nge kunthama fukula, ngobe shango ingawila mu bufukula, ikazhala mbipo.

³⁰Mulondolodze mazhuba angu e kunyaluluka e Sabata, mutje bugalo gwangu gwakayengemala, ndimi Yahwe.

³¹“ ‘Musitongopambukila kuna banolebeleka ne badzimu kene ku baloyi, musitongobashaka, ha mungabashaka banowomutemapadza, ndimi Yahwe Ndzimu wenyu.

³²“ ‘Umilike uthigame mbeli kwe sholotjena, utete buso gwe nthu wakakwegula, ngono utje Ndzimu uwo, ndimi Yahwe.

³³“ ‘Usitongoti ntaya elubila mu shango yenyu, ukanthamila tjimwe tjakabipa.

³⁴Ntaya unolubila abhakhwe se ntebe upakati kwenyu, un'de sekwa unozwida, ngobe makabe bataya ku shango ye Egipiti, ndimi Yahwe Ndzimu wenyu.

³⁵“ ‘Musitongo kombamisa kusumikilisa, kene nge tjilizanyo tje bulefu kene nge tjilizanyo tje bulemo, kene tjili tje bunji.

³⁶Mushingise tjiyelo tje lebeswa ne bulemo gwe lebeswa ne bulefu gwe lebeswa. Ndimi Yahwe Ndzimu wenyu wakamudusa mu shango ye Egipiti.

³⁷Mulondolodze milayo yangu ne ndaulo dzangu, mudzithame, ndimi Yahwe.’ ”