Read Kalanga Zwipo 20 Bible Online

Zwipo 20 - Kalanga bible

Zwipo 20

¹Yahwe bakadwa Mushe bakati,

²“Idwa bathu be Iziraela uti, ‘Mmwe ne mmwe nthu we bathu be Iziraela kene ntaya ugele mu Iziraela, unowodusila Moleki mwana uwe kube tjibhayilo, akatshiwe nge mabgwe nge gubungano lose le Iziraela kudzina efa.

³Ndowolingisana ne nthu iwoyo anthubula mu bathu bakanyi kwabo, ngobe ayisa mmwe we bana babe tjibhayilo kuna Moleki ndzimu we Baamoni, etemapadza bugalo gwangu gwakayengemala kakale etjinya zina langu lakayengemala.

⁴Ngono ha bathu be Iziraela bezwibiga lidandi mu mesho ngekwe nthu iwoyo, ha edusila mmwe we bana babe tjibhayilo kuna Moleki, benletja basingambulaye,

⁵ndowolingisana ne nthu iwoyo nenge nsha uwe ndibuya ndibathubula mu bathu bakanyi kwabo, na bose banontobela mu kunamata Moleki.

⁶“ ‘Ha nthu epambukila kuna banodana badzimu ne ku baloyi, ebatobela mu kuthama bufukula, ndowolingisana ne nthu iwoyo, ngono ndowonthubula mu bathu bakanyi kwabo.

⁷Ndizo muzwiyengemadze, mube bakayengemala, ngobe ndimi Yahwe Ndzimu wenyu.

⁸Mulondolodze milayo yangu, kakale muithame, ndimi Yahwe unomuyengemadza.

⁹“ ‘Mmwe ne mmwe unolonga tate babe kene mmeyabe bhiso unowobulawa, ngoti walonga tate babe kene mmeyabe bhiso, ngono malopa awe anowobe pezhugwi kwe nsholo uwe.

¹⁰“ ‘Ha nlume angabhakhwa bupongwe ne nkadzi we mbakidzani uwe, bose nlume ne nkadzi babhakhwa bupongwe babulawe.

¹¹Nlume ha angawalilana ne nkadzi wa tate babe, unowobe alengudza tate babe, bose nlume iwoyo ne nkadzi wa tate babe babulawe, ngono malopa abo anowobe mu misholo yabo.

¹²Ha nlume angawalilana ne nlongo uwe, bose babulawe ngobe bathama butjapa, ngono malopa abo anowobe mu misholo yabo.

¹³Ha nlume angalala ne mmwe nlume enthama nkadzi, bose bathama kunoshimisa, bakafanila bulawa, ngono malopa abo anobe mu misholo yabo.

¹⁴Ha nlume angalobola nkadzi na mme yabe, kobe kuli mbipo, ngabapisiwe mu moto, kudusa mbipo pakati kwenyu.

¹⁵Ha nlume angalala ne phuka abulawe kose ne phuka ibulawe.

¹⁶Ha nkadzi angayenda ku phuka kalala nayo, abulawe kose ne phuka ibulawebo, ngono malopa awe ne e phuka amunli ne phuka iyeyo.

¹⁷“ ‘Ha nlume angatola hazwadzi iye, ali mwana wa tate babe kene wa mmeyabe enlobola, ewalilana naye, mabhatisa shoni, bathubugwe mbeli kwe bakanyi kwabo, ngobe wabonela hazwadzi iye, ngono unowosenga nlandu uwe.

¹⁸Ha nlume angawalilana ne nkadzi ali mu mazhuba awe e kungula, efumula mmbili uwe wafumula nsenya we malopa awe ne nkadzi wafumula nsenya we malopa awe, bose bathubugwe muna bakanyi kwabo.

¹⁹“ ‘Usitongowalilana na manini kene maahadzi babo, ngobe unowobe walengudza gamu lilo, ngono banowosenga nlandu wabo.

²⁰Ha nlume angawalilana ne nkadzi wa batatenini babe, banowosenga tjibi tjabo nge mathudzi, bakafa basina mwana.

²¹Ha nlume angalobola nkadzi we nkulu uwe, watemapala, unowobe alengudza nkulu uwe, banowofa basina mwana.

²²“ ‘Ndizo mulondolodze milayo yangu yose ne ndaulo dzangu dzose, mudzithame kuti shango yandinomuyisa kunogala muili isitongomuthwila kuzhe.

²³Ngono musitongotjila kuyendidzana nge mipanga ye tjaba yandinotatila kuzhe mbeli kwenyu, ngobe banothama zwithu izwezwi zose, ngono ndizo ndakababenga.

²⁴Koga ndakamudwa ati, “Mowotola shango yabo, ndowomupa iyo mukaithuwa, shango inowunga nkaka ne butji.” Ndimi Yahwe Ndzimu wenyu, wakamuthubukanya ne dzimwe tjaba.

²⁵Ndizo muthame n'gathu pakati kwe phuka dzakatjenapala ne dzakatemapala, na pakati kwe nyuni dzakatemapala ne dzakatjenapala, musibe bathu banoshimisa ngekwe phuka kene ngekwe nyuni kene ngekwe tjimwe tjinosoba na pasi, tjandakamubigila ntome kutjitola tjili tjakatemapala.

²⁶Ibeni bathu bakayengemala kundili, ngobe imi Yahwe ndakayengemala, ndakamuthubukanya ne dzimwe tjaba, kuti mube bangu.

²⁷“ ‘Nlume kene nkadzi unolebeleka ne badzimu kene nloyi abulawe, bakatshiwe nge mabgwe kudzina befa, ngono malopa abo anowobe pezhugwi kwe misholo yabo.’ ”