Read Kalanga Zwipo 21 Bible Online

Zwipo 21 - Kalanga bible

Zwipo 21

¹Yahwe bakadwa Mushe bakati, “Lebeleka ne bapirisiti, ibo bakololo ba Aroni ubadwe uti, ‘Kusibe ne mpirisiti unowozwitemapadza nge nthu wafa mu bathu bakanyi kwabo,

²kuzhe kwebe ng'umba iye, mmeyabe, tate babe, nkololo uwe, nkololo kadzi uwe

³kene hazwadzi iye isathu ikalobogwa igala mu ng'umba iye unga zwitemapadzila iye.

⁴Asitongo zwitemapadza nge baanozwalana nabo nge ndobolo.

⁵“ ‘Kusibe ne mpirisiti unozwitesela ethama bhalo mu nsholo uwe kene kutesela midzibo ye ndedu dzidze, kene kuzwitema nyola mu mbili.

⁶Bakafanila kuyengemalila Ndzimu wabo, basitongo temapadza zina le Ndzimu wabo, ngobe banoyisa zwipo zwinopisiwa mu moto kuna Yahwe, zojiwa zwe Ndzimu wabo, ndizo bakafanila kube bakayengemala.

⁷Mpirisiti asilobole fukula kene nkadzi wakatemapadziwa, kene nkadzi wakathubukana ne nlume uwe, ngobe mpirisiti wakayengemala ku Ndzimu.

⁸Mpirisiti atogwe akayengemala, ngobe eyisa tjiwunga tje Ndzimu wenyu. Atogwe akayengemala kumuli, ngobe imi Yahwe ndakayengemala; imi ndinomuyengemadza.

⁹Ha nkololokadzi we mpirisiti ebe fukula, unolengudza tate babe, ngaapisiwe mu moto kudzina efa.

¹⁰“ ‘Mpirisiti nkulu, iwoyo wakazhodziwa ngodigwa mafuta mu nsholo, ebuya embadziwa zwiambalo zwe bupirisiti, azofanila letjedza nsholo uwe usakakamiwa, kene kuzwipalulila zwiambalo kulakidza kuti umu tjililo.

¹¹Asitongo zwitemapadza ngongina muna itumbu nenguba tjili tja tate babe kene tja mmeyabe.

¹²Asitongo bhudila kuzhe kwe bugalo gwakayengemala, kene kulengudza bugalo gwakayengemala gwe Ndzimu uwe, ngobe wakapiwa Ndzimu ngozhodziwa mafuta mu nsholo, ndimi Yahwe.

¹³Alobole mwanadi usathu kawalilana ne nlume.

¹⁴Tjilikadzi kene nkadzi wakathubukana ne nlume kene wakatemapala kene fukula, bose ibaba asibalobole, alobole mwanadi usakatongo walilana ne nlume, ali we ludzi gwabo,

¹⁵kuyitila kuti asitongo lengudza bana babe mu bathu bakanyi kwabo, ndimi Yahwe bakan'yengemadza.’ ”

¹⁶Ngono Yahwe bakadwa Mushe bakati,

¹⁷“Idwa Aroni uti, ‘Nenguba ali ani mu ludzi gugo, kuyenda nge zwizekugwana zwabo zose, ana bulema, asitongosedzela kayisa tjiwunga tje Ndzimu uwe.

¹⁸Ngobe kene ali ani una bulema asitongosedzela pejo, bhofu kene unoshudza, kene ana bulema mu buso kene bulema gwe makumbo kene maboko anopindana,

¹⁹kene ali wakavunika gumbo kene luboko,

²⁰kene ana hwumbu, kene mabhange, kene ana itoyi mu zhisho, kene ana bugwele gwe ganda, kene ana mang'alang'azha mu mbili, kene ali ngong'wa,

²¹kusibe ne tjizekugwana tja Aroni mpirisiti tjingasedzela kuyisa kuna Yahwe tjipo tjinopisiwa mu moto, ana bulema, azofanila kusedzela eyisa tjiwunga tje Ndzimu uwe.

²²Ungaja tjiwunga tje Ndzimu uwe, zose zwipo zwakayengemala kupinda kuyengemala ne zwipo zwakayengemala,

²³koga asitongosedzela pa tjisitilo tjakayengemala kene kuyenda pa tjibeso tjinopisigwa zwibhayilo, ngobe ana bulema, asitongo temapadza bugalo gwangu gwakayengemala nenge zwija zwago, ngobe ndimi Yahwe unobayengemadza.’ ”

²⁴Ndizo Mushe kalebeleka na Aroni ne bakololo babe ne bathu bose be Iziraela.