Read Kalanga Zwipo 24 Bible Online

Zwipo 24 - Kalanga bible

Zwipo 24

¹Yahwe bakadwa Mushe bakati,

²“Idwa bana be Iziraela bakuzhisile mafuta e mitjelo ye nti we ntoba akakuniwa zubuyanana e mavone, kuti kugale kuli tjedza kuthuta.

³Kuzhe kwe tjisitilo tje butendeki, mu nshasha we bushanganilo, Aroni unodwilila eagadza nge magalo kudwa zhuba lingina kunoti mangwanana mbeli kwa Yahwe, kowobe nlayo nge kusingapele kunoti ku zwizekugwana zwenyu.

⁴Unowogala egadza mavone nge magalo mu tjigadziko tjakatjena[2]mbeli kwa Yahwe.

⁵Utole bgwisa gwakanathiwa seme dzili makumi mabili uthame zwiwunga zwili gumi lina mbili.

⁶Ngono uzwibige nge milongolongo mibili, zwili zwitathatu mu nlongolongo, uzwibige pezhugwi kwe tafuli yakatjena[3]mbeli kwa Yahwe.

⁷Ngono ubige motsha mbuyanana mu nlongolongo mmwe ne mmwe, kuti tjibe tjiwunga tje ikumbuludzo, tjili tjipo tjinopisiwa mu moto tjipisigwa Yahwe.

⁸Mu zhuba limwe ne limwe le Sabata Aroni agale ebiga tjiwunga nge ndongoloso mbeli kwa Yahwe, mu bumo gwe bana be Iziraela se kuli tjidumano nge kusingapele.

⁹Tjiwunga tja Aroni ne bakololo babe, ngono batjijile mu bugalo gwakayengemala, se lili gobe lile lakayengemala kwazo ladwa mu zwipo zwinopisiwa mu moto zwipisigwa Yahwe, kuthamwe kuyiyago nge kusingapele.”

¹⁰Kube kuna nkololo we nkadzi we N'iziraela tate babe bali N'egipiti, kabhudila ku bana be Iziraela, ngono nkololo we nkadzi we N'iziraela ne nlume we N'iziraela bakagwa bali mu kampa,

¹¹ngono nkololo we nkadzi we N'iziraela katuka kakale kalonga bhiso zina le Ndzimu. Ngono bathu bakan'yisa kuna Mushe. Zina la mmeyabe lakabe liyi Shelomiti, ali nkololokadzi wa Dibiri, we ludzi gwe Dani.

¹²Ngono kanlonga mu maboko e batjengeti, kudzina Yahwe beleba kuti aying'wi.

¹³Ngono Yahwe bakadwa Mushe bakati,

¹⁴“Uwoyu wandilonga bhiso mun'dusile kuzhe kwe bukotokelo, ngono bose banhwa babige maboko abo pezhugwi kwe nsholo uwe, ngono gubungano lose limphobole nge mabgwe.

¹⁵Ngono ubudze bathu be Iziraela uti, ‘Ani kene ani unolonga Ndzimu uwe bhiso, asenge tjibi tjitje.

¹⁶Iye unotuka zina la Yahwe abulawe, gubungano lose limphobole nge mabgwe, ntaya kene ntebe, ha atuka zina le Ndzimu, abulawe.’

¹⁷“Nthu wabulaya nthu wakafanila bulawa.

¹⁸Wabulaya ithuwo tje mmwe atjilipe nge tjipenyu tjinonga itjo. Butjilo gomisigwa nge butjilo.

¹⁹“Ha nthu alemadza ikamu tjitje, ngaathamwebo itjetji tjaanthama.

²⁰Ha an'vuna fupa na iyebo ngaavung'we fupa, zhisho nge zhisho, zhino nge zhino, sekwa alemadza nthu, ngaalemadziwebo sa ikoko.

²¹Wabulaya ithuwo atjimise tjitjila, ngono wabulaya nthu abulawe.

²²Nlayo uwoyu unomusunga mose, ntaya ne ntebe, ngobe ndimi Yahwe Ndzimu wenyu.”

²³Ndizo Mushe kalebeleka ne bana be Iziraela, ngono bakadusila uwoyu wakatuka Ndzimu kuzhe kwe bukotokelo, bebe bemphobola nge mabgwe. Ndizo bana be Iziraela bakathama sekwa Yahwe bakadwa Mushe.