Read Kalanga Zwipo 26 Bible Online

Zwipo 26 - Kalanga bible

Zwipo 26

¹“Musitongo zwithamila midzimu yakabezhiwa kene zwifano zwakabezhiwa kene mabgwe akabigwa akashongoloka, kene mbumbiko ye bgwe, kuzwinamata, ngobe ndimi Yahwe Ndzimu wenyu.

²Mulondolodze bo Sabata bangu kakale mutje bugalo gwangu gwakayengemala, ndimi Yahwe.

³“Ha mutobela ndaulo dzangu mubuya mulondolodza milayo yangu,

⁴ndowomunisila vula nge tjibaka tjayo, kuti ndizo minda ibe ne zojiwa ne miti izwale mitjelo.

⁵Mowovuna mu minda kudzina kunobe tjibaka tje kutjela zhambi, mukatjela zhambi kudzina kunobe tjibaka tjolima minda. Mowoja mukaguta mukagala mu shango yenyu yakatjengeteka.

⁶“Ndowozhisa mbakiso mu shango yenyu, ngono moyizela ngono akuna unowomutjisa. Ndowodusa zwibandana zwakabipa mu shango yenyu ne thumo alitowopalama shango yenyu.

⁷Mowotatamila zwita zwenyu, mukazwiligila mbeli kwenyu nge thumo.

⁸Bali bashanu benyu banowotatana ne bali zana (100), bali zana benyu banowotatana ne bali zwiwulu zwili gumi (10 000), ngono mowoligila zwita zwenyu mbeli kwenyu nge thumo.

⁹Ndomukombolela amupa mbeleko abuya amuwatsha, kakale ndowolondolodza tjidumano tjangu namwi.

¹⁰Mowoja zwikulukugwi zwetjinga zwakalaluka mu matula, mukadusa zwikulukugwi mu matula munotebula zwisedzela zwitshwa.

¹¹Ndowogadza bugalo gwangu pakati kwenyu, ngono andinga munyunde.

¹²Ndowoyenda pakati kwenyu, ndowobe Ndzimu wenyu, ngono mowobe bana bangu.

¹³Ndimi Yahwe Ndzimu wenyu wakamudusa ku shango ye Egipiti, kuti musibe balanda babo, ndakavuna jokwi ye bulanda kuti muyende makatambunuka.”

¹⁴“Koga ha musingandihwe, kakale musingatobele milayo iyeyi,

¹⁵ha mulamba milayo yangu, mufupatila ndaulo dzangu, kuti ndizo musilondolodze milayo yangu yose, koga mutjinya tjidumano tjangu,

¹⁶nami ndomuthamila yetji, ndomuzhisila lutjo ne njigwele dzinowomukukuna ne luzhazhamo gunowomutjinya mesho kowothama kuti mukorotele. Ngono mowodzwalila mbewu yenyu suli, ngobe zwita zwenyu zowoija.

¹⁷Ndowomushandukila, ngono zwita zwenyu zowomukunda, banomubenga banowomubusa, ngono mowotizha nenguba kusina wakamutatamila.

¹⁸“Ngono pezhugwi kwa ikoku ha mungadwilila musingandihwe, ndowopaphidzila shamu katendeka ngekwe zwibi zwenyu.

¹⁹Ndowopedza mazwikudzo enyu, athama zhuzhugwi kwenyu kukanga tshipi ne shango yenyu ikawoma se tshipi ye tshipi ye phangula.

²⁰Mowoshingila masimba malashe, ngobe minda yenyu aitodwa tjimwe ne miti ye mitjelo aitozwala.

²¹“Ndizo ha muyenda mulambana nami, musingandihwe, ndowotathikanya magwadzi pezhugwi kwenyu katendeka se kunoshakika nge zwibi zwenyu.

²²Ndowotumila zwibandana pakati kwenyu, zwinomujila bana, zwibe zwimupedzela zwithuwo, zwimusiya muli bashomanana, ndizo zila dzenyu dzifubale.

²³“Ngono ha musingashandukile ku ndili pezhugwi kwa ikoku, koga muyenda mulambana nami,

²⁴ipapo nami ndowolambana namwi, ngono imi ndowomuloba shamu katendeka ndimulobela zwibi zwenyu.

²⁵Ngono ndowozhisa thumo mu muli, linowoshingikadza mbuzuludzo ye tjidumano, ngono ha mungakubungana mu mizi yenyu, ndowotumila bugwele pakati kwenyu amulashila mu maboko e zwita zwenyu.

²⁶Ndowokwamula tjiyelo tje zojiwa zwenyu, kunowoti bakadzi bali gumi bakabhika pa tjibeso tjing'ompela, ngono banowomuzhisila zojiwa nge tjilizanyo, mukaja musingagute.

²⁷“Ngono ha kungati pezhugwi kwa ikoko mukasindihwe, mukalambana nami,

²⁸ndizo ndowolambana namwi nge bushongola, ngono amutjemela nge kumuloba shamu katendeka ndimulobela zwibi zwenyu.

²⁹Mowobhakhwa nge zhala isishoma kwamunowodza mukaja bana benyu.

³⁰Ngono ndowokolomola magalo enyu anonamatigwa midzimu, ndibe ndiligila zwibeso zwenyu zwe motsha pasi, ndibe ndilashila zwitumbu zwenyu pezhugwi kwe zwitumbu zwe midzimu yenyu, ngono ndowomunyunda.

³¹Ndowoshandula mizi yenyu matongo, ndibe ndikolomola ng'umba dzenyu dze kunamata, ngono Anditoamutjila minuhwo ye zwibhayilo zwenyu inonuhwa zwinozipa.

³²Ndowothukudza shango yenyu, kuti zwita zwenyu zwinogala muili zwiitjenamile.

³³Ndowomupaladza nge zwitjaba, amutatamila nge thumo, shango yenyu ikasala ili tjilambanyika ne mizi yenyu ikasala ili matongo.

³⁴Ndipo shango painowozipigwa nge makole ayo e Sabata ipapa imwi mutji mu shango ye zwita zwenyu, ndizo shango inowonyaluluka ikabe mu nsi wayo we Sabata.

³⁵Inowoti itjakathukudzika ikanyatutuka, kunyatutuka kwaisakatongobe mu kuli muli mu Sabata pamakabe muligele muili.

³⁶“Ngono muna ibabo banowobe batjila, kowoti bali mu shango ye zwita zwenyu azhisa lutjo mu mimoyo yabo, kowoti behwa zhani lizunguziwa nge phepo bakatizha se nthu etizha thumo, kwabanowa kusina wakabatatamila.

³⁷Banotimbana se bathu betizha thumo nenguba kusina unobatatamila, ngono mowopelegwa nge simba mbeli kwe zwita zwenyu.

³⁸Ngono mowofila pakati kwe zwitjaba, mujiwa nge shango ye zwita zwenyu.

³⁹Malimbelimbe anowobe asala mu shango ye zwita zwenyu banowokorotela ngekwe matjinyo abo nenge matjinyo a bobatategulu babo.

⁴⁰“Koga abezwileba zwibi zwabo ne zwibi zwa bobatategulu babo, zwabakandithamila nge kusagalikabgwe kwabo ne kudwilila bendifupatila,

⁴¹ikoku kwakayita kuti ndibashandukile ndibe ndibazhisa mu shango ye zwita zwabo, ha mimoyo yabo isakathumbigwa ingatebamisiwa, bebe beshandukila matjinyo abo,

⁴²ndizo ndowokumbula tjidumano tjangu na Jakubo ndibe ndikumbula tjidumano tjangu na Isaki ne tjidumano tjangu na Abhurahama, ngono ndowokumbula shango.

⁴³Koga shango yabanowosiya, ishathile nsi wayo we Sabata itjakathukudzika basipo muili. Banowolipila matjinyo abo, ngobe bakalamba ndaulo dzangu, bakabuya bakafupatila milayo yangu.

⁴⁴Nenguba kwakajalo, kowoti bali mu shango ye zwita zwabo, anditowobalamba nenguba kuli kubanyunda, kene kubalobesa tjoselele ne kumisa tjidumano tjangu nabo, ndimi Yahwe Ndzimu wabo.

⁴⁵Koga nge kubada ndowokumbula tjidumano tjandakathama na bobatategulu babo, bandakadusa ku shango ye Egipiti mu mesho e zwitjaba, kuti ndibe Ndzimu wabo, ndimi Yahwe.”

⁴⁶Eyi ndiyo milayo ne ndaulo dzakapiwa Mushe ndi Yahwe ali pezhugwi kwe Dombo le Sinai, kuti ilondolodziwe ne bathu be Iziraela.