Read Kalanga Zwipo 27 Bible Online

Zwipo 27 - Kalanga bible

Zwipo 27

¹Yahwe bakadwa Mushe bakati,

²“Lebeleka ne bathu be Iziraela uti, ‘Ha nthu etuna kuti unowodusa bathu ebapa Yahwe nge kudusa mari kuyendidzana ne themba ye nthu,

³themba ye we tjilume kudwa mu makole ali makumi mabili kunoti ku makole ali makumi ali matathatu, shekele dze siliva dzili makumi mashanu, kuyendidzana ne shekele dze bugalo gwakayengemala.

⁴Ha nthu ali we tjikadzi, themba inowobe maloso e siliva ali makumi matatu.

⁵Ha we tjilume we makole ali mashanu kuyenda ku makole ali makumi mabili, themba inowobe shekele dze siliva dzili makumi mabili, ngono ha ali we tjikadzi shekele dze siliva dzili gumi.

⁶Ha ali we tjilume ana mwedzi kunoti kuna we makole mashanu, themba inowobe shekele dze siliva dzili mashanu, ha ali we tjikadzi themba inowobe shekele dze siliva dzili thatu.

⁷Ngono ha nthu ali makole ali makumi ali matathatu kene kupinda, themba muna we tjilume inowobe shekele dze siliva dzili gumi lina mashanu, ha ali we tjikadzi themba inowobe shekele dze siliva dzili gumi.

⁸“ ‘Ngono ha nthu ali nshayi usingatubule lipa themba inoshakika, unozhisa nthu unopiwa Yahwe ku mpirisiti, ngono mpirisiti unowombigila themba, kuyendidzana ngotubula kwe watuna, mpirisiti unowombigila themba yaangalipa.

⁹“ ‘Tjinopiwa Yahwe ha tjili ithuwo, tjili tjipo tjinoamutjilika tjowoyengemala, phuka imwe ne imwe yapiwa Yahwe yakayengemala.

¹⁰Tjisitongo tenganyiwa kene kuli ku misiwa nge tjipoga, etenganya tjibuya ne tjakabipa, kene tjakabipa ne tjibuya, ngono ha emisa ithuwo nge ithuwo, bubili gwazo zwakayengemala.

¹¹Ngono ha tjili tjimwe tje zwithuwo zwakatemapala, tjili tjisingatongodusiwa tjili tjipo tjinopiwa Yahwe, ithuwo itjetjo tjizhisiwe pa mpirisiti.

¹²Ngono mpirisiti unotjibigila themba, kene tjili tjibuya kene tjakabipa, themba yabigwa nge mpirisiti ndiyo themba.

¹³Koga ha mweni we ithuwo eshaka kutjidzutunula, apaphidze themba nge ikwamu tjing'ompela muna zwili zwishanu zwe themba.

¹⁴“ ‘Ha nthu epa Yahwe ng'umba iye kube yakayengemala, mpirisiti unowoibigila themba, kene ili mbuya kene yakabipa, themba inowobe iyeyo.

¹⁵Ngono ha nthu wabe apa Yahwe ng'umba eshaka dzutunula ng'umba iye, apaphidze themba yayo nge ikwamu tjing'ompela mu zwikamu zwili zwishanu zwe themba yayo, ngono ng'umba inowobe iye.

¹⁶“ ‘Ha nthu edusa gwamu le nnda uwe we thaka epa Yahwe, themba inowobigwa kuyendidzana ne tjilizanyo tje mbewu ingadzwagwa mulili, kube makumi mashanu e shekele dze siliva mu tjilizanyo tjimwe ne tjimwe tje seme dzili makumi mabili e mathunde e bhali.

¹⁷Ha angadusa nnda epa Yahwe mu gole le kushatha, themba ye tjinga yakabigwa ndiyo zwayo.

¹⁸Koga ha angapa Yahwe nnda uwe shule kwe gole le kushatha, ipapo mpirisiti unowobala themba ye nnda kuyendidzana ne makole asala kunoti ku gole le kushatha linozha, ngono unobiga themba ipasi.

¹⁹Ngono ha ihwoyo wakapa Yahwe nnda eshaka kuudzutunula, unowopaphidza themba nge ikwamu tjing'ompela mu zwikwamu zwili zwishanu zwe themba ye nnda, ngono nnda unowombuyila.

²⁰Koga ha usadzutunugwa, kene watengesegwa mmwe nthu upoga, awungatjadzutunugwe kakale.

²¹Koga gwamu le nnda, ha lingasunungugwa mu gole le kushatha, loyengemala se uli nnda wapiwa Yahwe, lowobe labe lukata gwe bapirisiti.

²²“ ‘Ha nthu epa Yahwe nnda waakatenga usi gobe le lukata gugwe,

²³mpirisiti unowokumbulila themba yawo kuyenda nge makole kudzina kunoti ku gole le kushatha, ngono nlume iwoyo unowolipa sekwa kwabigwa themba mu zhuba ilelo ili yakayengemala eyipa Yahwe.

²⁴Mu gole le kushatha nnda iwoyo unobgwilila kuna wa wakatengwa munli, iye wakabe ali mweni wawo.

²⁵“ ‘Themba imwe ne imwe inowobigwa kuyendidzana ne shekele dze bugalo gwakayengemala, ingathubukanyiwa zwikwamu zwili makumi mabili.

²⁶“ ‘Koga ithuwo tjimwe ne tjimwe tja zwagwa kutanga ndetja Yahwe, kuli ng'ombe kene pkhwizi kene mbudzi ngobe nge zwa Yahwe kale.

²⁷Ngono ha ili mbano ye ithuwo tjakatemapala, inowodzutunugwa nge themba inowobe yabigiwa, ebe epapha nge ikwamu tjing'ompela mu zwikwamu zwili zwishanu zwe themba yatjo, ha tjisadzutunugwa, tjitengesiwe nge themba inowobe yabigiwa.

²⁸“ ‘Akuna tjimwe tjingati tjabe tjili tje nthu, ebe etjipa Yahwe tjatjose tjingadwa tjitengesiwa kene tjidzutunugwa, kungabe nthu, kene ng'ombe kene nnda, tjimwe ne tjimwe tjakapiwa Yahwe, tjakayengemala, ngetja Yahwe.

²⁹Akuna bathu bangapiwa Yahwe kubulawa, bangadzutunugwa, bakafanila kubulawa.

³⁰“ ‘Zwebugumi zose zwe shango ngezwa Yahwe, kungabe mathunde anodwa mu nnda kene mitjelo inodwa mu nti, zwakayengemala ngezwa Yahwe.

³¹Ha nthu eyemula kudzutunula tjebugumi tjitje, atjipaphe nge ikwamu tjing'ompela tje zwikwamu zwili zwishanu zwe tjebugumi tjitje.

³²Ngono zose zwebugumi zwe ng'ombe kene ngubi, tjimwe ne tjimwe tjebugumi tjinopinda tjisena swimbo ye nlisi tjakayengemala ngetja Yahwe.

³³Ngono Nthu asitongo lingisisa ng'ombe kene tjadwa mu ngubi kubona kuti yakalulwama kene aizolulwama, asitongo imisa nge imwe, ha anga imisa nge imwe, bubili gwadzo, dzowobe dzakayengemala, adzingadzutunugwe.’ ”

³⁴Eyi ndiyo milayo Yahwe yabakapa Mushe ali pezhugwi kwe Dombo le Sinai kushingisiwa nge bathu be Iziraela.