Read Kalanga Zwipo 3 Bible Online

Zwipo 3 - Kalanga bible

Zwipo 3

¹“Ha kuna unobe edusa tjipo tjili tjibhayilo tje mbakisano, ha edusa ithuwo mu danga, tjili tjilume kene tjikadzi, atjiduse tjisina bulema mbeli kwa Yahwe.

²Ngono abige luboko gugwe pezhugwi kwe nsholo we tjipo tjitje, abe etjibhayila pa nkoba we nshasha we bushanganilo, ngono bakololo ba Aroni bapirisiti banyase tjibeso tjinopisigwa zwibhayilo nge malopa betjipoteleka.

³Ngono mu tjibhayilo tje mbakisano, tjili tjipo tjinopisiwa mu moto kupisigwa Yahwe, ayise lizwizwi ne mafuta wose e zwimukati,

⁴ne so mbili ne mafuta adzo ne lutembe gwe moyo, azwidusilanye ne so.

⁵Ndizo bakololo ba Aroni banowozwipisila mu tjibeso tjinopisigwa zwibhayilo pezhugwi kwe tjibhayilo tjinopisiwa, itjetji tjipezhugwi kwe hwuni dzimu moto, tjili tjipo tjinopisiwa mu moto, tjili nnuhwo unonuhwa zwinozipa kupiwa Yahwe.

⁶“Ha tjipo tjitje tje tjibhayilo tje mbakisano tjinopiwa Yahwe tjili tjinodwa mu ngubi, tjili tjilume kene tjikadzi, atjiyise tjisina bulema.

⁷Ha eyisa pkhwizana kube tjipo tjitje, ndizo aiyise mbeli kwa Yahwe,

⁸abige luboko gugwe pezhugwi kwe nsholo we tjipo tjitje, ngono atjibhaye mbeli kwe nshasha we bushanganilo, ngono bakololo ba Aroni banyase tjibeso tjinopisigwa zwibhayilo nge malopa betjipoteleka.

⁹Ndizo mu tjibhayilo tje mbakisano, tjili tjipo tjinopisiwa mu moto kupisigwa Yahwe, aduse mafuta atjo, mafuta wose e bhesu, ali lungunule kudwa pa thunji ne lizwizwi ne mafuta wose e zwimukati,

¹⁰ne so mbili ne mafuta adzo ne lutembe gwe moyo azwidusilanye ne so.

¹¹Ngono mpirisiti unowopisila tjibhayilo mu tjibeso tjinopisigwa zwibhayilo zwili zojiwa zwe zwipo zwinopisiwa mu moto zwipisigwa Yahwe.

¹²“Ha tjipo tjitje ili mbudzi, ndizo unoiyisa kuna Yahwe,

¹³abige luboko gugwe pezhugwi kwe nsholo wayo, abe eibhayila mbeli kwe nshasha we bushanganilo, ngono bakololo ba Aroni banyase tjibeso tjinopisigwa zwibhayilo nge malopa kutjipoteleka.

¹⁴Ndizo ayise zwimu ili, kube tjipo tjinopisiwa mu moto tjitje, tjinopisigwa Yahwe, lizwizwi ne mafuta wose e zwimukati,

¹⁵ne so mbili ne mafuta adzo kudwa ku thunji ne lutembe gwe moyo azwidusilanye ne so.

¹⁶Ngono mpirisiti unowozwipisila mu tjibeso tjinopisigwa zwibhayilo kube zojiwa zwe zwipo zwinopisiwa mu moto zwipisigwa Yahwe, zwili nnuhwo unonuhwa zwinozipa. Mafuta wose nge a Yahwe.

¹⁷Ibe ndaulo isingapele kuyenda nge zwizekugwana zwenyu mu magalo enyu wose, musitongoja mafuta kene malopa.”