Read Kalanga Zwipo 5 Bible Online

Zwipo 5 - Kalanga bible

Zwipo 5

¹“Ha kuna nthu watjinya ngoti ati adanigwa butendeki gwaanoziba ku lubazhe, ebe asingalebe tjaakabona kene tjaakahwa, unozwidanila nlandu.

²“Kene akutha tjakatemapala ngosaziba, kungabe ntumbu we phuka yakatemapala kene ili ng'ombe yakatemapala kene zwikonyana zwinonyewula zwakatemapala, watemapala, ngono unlandu.

³“Kene akutha tjakatemapala tje nthu, kene kuli kwakatini kungatemapadza nthu, ngono kasizibe, paanowoziba ngekwako unowobe abe nlandu.

⁴“Kene ha nthu angapomoka katuna nge nlomo uwe kuti unowothama mbipo kene ndulamo, kene kungabe kuli tuna kwakatini nthu kwaangathama ngosaziba, ngono paanowoziba ngekwako unowobe nlandu.

⁵“Ha nthu angabe nlandu mu tjimwe tje zwithu izwezwi, azwilebe tjibi tjaakathama,

⁶ngono azhise ndipo ye nlandu uwe kuna Yahwe, ngekwe tjibi tjaakathama, ingabe pkhwizana kene mbudzana hadzi kudwa mu ngubi, kube tjibhayilo tje tjibi, ngono mpirisiti unowonthamila kugadzana na Yahwe ngekwe tjibi tjitje.

⁷“Ha asingatubule pkhwizana kene mbudzana kudusila tjibhayilo tje nlandu kuna Yahwe, azhise njibana mbili kene ngurukukwana mbili, imwe ili ye tjibhayilo tje tjibi, imwe ili ye tjibhayilo tjinopisiwa.

⁸Adzizhise ku mpirisiti, mpirisiti kutanga unoyisa ing'ompela ye tjibhayilo tje tjibi, unowomona njibana ntshibha asingaithubule nsholo.

⁹Ebe enyasa mamwe e malopa e njibana mu lubizho gumwe gwe tjibeso tjinopisigwa zwibhayilo. Malopa asala aabhizhisile pa bhato le tjibeso tjinopisigwa zwibhayilo. Etji nditjo tjibhayilo tje tjibi.

¹⁰Ndizo unowoyisa ye bubili kube tjibhayilo tjinopisiwa kuyendidzana ne ndaulo, ngono mpirisiti unowonthamila kugadzana na Yahwe ngekwe tjibi tjitje tjaakabe athama, unowobe azwiibhatigwa.

¹¹“Koga ha asingatubule wana njiba mbili kene ngurukukwana mbili, adusile tjibi tjitje tjaakathama bgwisa gwe tjilizanyo tje seme ing'ompela kube tjipo tje tjibi, asitongodila mafuta mu guli kene kuli longa motsha mu guli, ngobe tjili tjibhayilo tje tjibi.

¹²Aguzhise ku mpirisiti, ngono mpirisiti unowonokola bgwisa guli zhele luboko guli gobe le tjikumbudzo, ebe egupisila mu tjibeso tjinopisigwa zwibhayilo pezhugwi kwe zwipo zwinopisiwa mu moto zwipisigwa Yahwe. Etji nditjo tjibhayilo tje tjibi.

¹³Sa ikoko, mpirisiti unowothamila nthu iwoyo kugadzana na Yahwe ngekwe tjibi tjaakathama nge tjimwe tje zwithu izwezwi, ngono Yahwe banowonzwiibhatigwa. Bgwisa gwasala gowobe gwe mpirisiti, sekwa kunothamwa nge tjipo tje mathunde.”

¹⁴Yahwe bakadwa Mushe bakati,

¹⁵“Ha nthu angatjuluka nlayo ngotjinya asaziba mu zwimwe zwithu zwakayengemala zwa Yahwe, azhise tjibhayilo tjitje tje nlandu kuna Yahwe, ili nyundo isina bulema idwa mu ngubi iye. Ili yaungabigila themba ye shekele dze siliva, kuyendidzana ne shekele dze bugalo gwakayengemala. Etji nditjo tjibhayilo tje nlandu.

¹⁶“Kakale athame ndipo muna tjaanowobe akombamisa muna tjakayengemala, apaphe nge kung'ompela mukushanu kwe themba yatjo pezhugwi akupe mpirisiti, ngono mpirisiti unowonthamila kugadzana na Yahwe nge nyundo ye tjibhayilo tje nlandu, ngono Yahwe banowonzwiibhatigwa.

¹⁷“Ha nthu atjinya, ngothama tjimwe tje zwithu Yahwe tjabakalaula kuti tjisithamiwe nenguba angabe asingazibe, koga kabe nlandu, unowosenga nlandu uwe nge mathudzi.

¹⁸Azhise nyundo ku mpirisiti ili isina bulema idwa mu ngubi iye, ili yaungabigila themba iwe, ingalizana tjibhayilo tje nlandu, ngono mpirisiti unowonthamila kugadzana na Yahwe ngekwe nlandu waakathama asingazibe, ngono Yahwe banowonzwiibhatigwa.

¹⁹Etji nditjo tjibhayilo tje nlandu, ngoti unobe uli nlandu mbeli kwa Yahwe.”