Read Kalanga Zwipo 6 Bible Online

Zwipo 6 - Kalanga bible

Zwipo 6

¹Yahwe bakadwa Mushe bakati,

²“Ha nthu angathama jinyo ngotjuluka nlayo wa Yahwe, nge kutjebela ikamu tjitje mu tjimwe tjakabigilidziwa kene tjaatjengetesiwa kene atjebela kene atshambilidza ikamu tjitje,

³kene anunga tjakabe tjamila ebe etuna enyepa nge kwatjo mu zwithu zose bathu zwabangathama bebe babe ne jinyo ndizo,

⁴ha mmwe athama jinyo ebe ebe ne nlandu, unowobgwiliza tjaakatola nge bubava, kene tjaakawana ngotshambilidza kene tjaakabigisiwa ebe ezwitolegwa, kene tjithu tjakamila tjaakanunga.

⁵Tjimwe ne tjimwe nthu tjaakatuna enyepa unowotjibgwiliza nge buzhalo, ebuya epapha pezhugwi nge themba ye kung'ompela mu bushanu gwatjo, etjibgwilizila mweni watjo mu zhuba le tjibhayilo tjitje tje nlandu.

⁶Ngono azhise tjibhayilo tje nlandu ku mpirisiti tjinopiwa Yahwe ili nyundo isina bulema idwa mu ngubi, nyundo yaungabigila themba ye tjibhayilo tje nlandu.

⁷Ngono mpirisiti unowonthamila gadzano na Yahwe, kanzwiibhatigwa mu tjimwe ne tjimwe tjingati nthu atjithama kabe nlandu.”

⁸Yahwe bakadwa Mushe bakati,

⁹“Idwa Aroni ne bakololo babe uti, ‘Oyu ndiwo nlayo we tjibhayilo tjinopisiwa. Tjibhayilo tjinopisiwa tjibe mu moto pezhugwi kwe tjibeso tjinopisigwa zwibhayilo busiku gose kuswikila mangwanana, ngono moto we tjibeso tjinopisigwa zwibhayilo ugale uthuta.

¹⁰Ngono mpirisiti aambale zwiambalo zwizwe zwe jila lakalukwa ne zwiambalo zwinoambagwa kusi, abe ewola nlota we tjibhayilo tjinopisiwa mu tjibeso tjinopisigwa zwibhayilo, aubige pa hwunde ye tjibeso tjinopisigwa zwibhayilo.

¹¹Ndizo aambule zwiambalo zwizwe zwe bupirisiti abe eambala zwipoga, abe ewola nlota enoutebulila kuzhe kwe bukotokelo ku bugalo bubuyanana.

¹²Moto we tjibeso tjinopisigwa zwibhayilo ugale uthuta mutjili, usitongodzima, mpirisiti alonge hwuni muuli mangwanana mamwe ne mamwe, ngono abige tjibhayilo tjinopisiwa nge ndongoloso pezhugwi kwatjo ngono apise mafuta e tjibhayilo tje mbakisano.

¹³Moto ugale uthuta mu tjibeso tjinopisigwa zwibhayilo misi yose, usitongodzima.

¹⁴“ ‘Oyu ndiwo nlayo we tjipo tje mathunde. Bakololo ba Aroni banowotjiyisa mbeli kwa Yahwe mbeli kwe tjibeso tjinopisigwa zwibhayilo.

¹⁵Ngono mmwe anokole luboko guli zhele bgwisa gwakanathiwa gwe tjipo tje mathunde ne mafuta atjo ne motsha wose umu tjipo tje mathunde, ebe etjipisa mu tjibeso tjinopisigwa zwibhayilo tjili gobe le ikumbuludzo, kube nnuhwo unonuhwa zwinozipa kuna Yahwe.

¹⁶Bgwisa gwasala gowojiwa ndi Aroni ne bakololo babe, gowojiwa gusina mbidzo mu bugalo gwakayengemala, begujila mu bhakasa le nshasha we bushanganilo.

¹⁷Gusitongo bhikwa guna mbidzo, ndabapa igo guli gobe labo kudwa mu tjipo tjangu tjinopisiwa mu moto, kuthu kwakayengemala kwazo koga se tjibhayilo tje tjibi ne tjibhayilo tje nlandu.

¹⁸Nkololo mmwe ne mmwe we bakololo ba Aroni ungatjija se kuli ndaulo inowodwilila kunoti ku zwizekugwana zose, lili gobe le zwipo zwinopisiwa mu moto zwipisigwa Yahwe, tjinowozwikutha tjowoyengemala.’ ”

¹⁹Yahwe bakadwa Mushe bakati,

²⁰“Etji nditjo tjipo tjinowodusigwa Yahwe ndi Aroni ne bakololo babe mu zhuba laanobe ezhodziwa, aduse seme ing'ompela ye bgwisa gwakanathiwa sekwa gala kuthamiwa tjipo tje mathunde, gaswa lago kuli mangwanana ne gaswa madekwana.

²¹Gushanganyiwe ne mafuta gubhikwe nge pani, guzhisiwe gwakashanganyiwa zubuyanana gwakabhikika, gutjakanyugwe se tjipo tje mathunde, gube nnuhwo unonuhwa zwinozipa kuna Yahwe.

²²Mpirisiti wakazhodziwa edwa mu bakololo ba Aroni ali iye unotola mamo awe, atjiyise kuna Yahwe ube nlayo nge kusingapele, ngono tjipisiwe tjose.

²³Tjipo tjimwe ne tjimwe tje mathunde tjinoyisiwa nge mpirisiti tjipisiwe tjose, tjisitongojiwa.”

²⁴Yahwe bakadwa Mushe bakati;

²⁵“Idwa Aroni ne bakololo babe uti, Oyu ndiwo nlayo we tjibhayilo tje tjibi. Ipapa panobhayigwa tjibhayilo tjinopisiwa, ndipo panobhayigwa tjibhayilo tje tjibi mbeli kwa Yahwe. Itjetji tjibhayilo tjakayengemala kwazo.

²⁶Mpirisiti unowopisa tjibhayilo, episila tjibi atjije, tjijigwe mu bugalo gwakayengemala mu bhakasa le nshasha we bushanganilo.

²⁷Tjimwe kene ini tjakutha nyama yatjo tjowoyengemala, ngono ha malopa atjo angathapukila mu tjiambalo, tjiambalo itjetjo utjisukile mu bugalo gwakayengemala.

²⁸Hali ye ntapkhwi yabhikigwa nyama ipkhwanyiwe, koga ha nyama yabhikwa nge hali ye phangula ikukugwe ibe idzungudzwa nge vula.

²⁹Nlume mmwe ne mmwe we nsha we bapirisiti ungaja tjibhayilo itjetji, tjakayengemala kwazo.

³⁰Koga kusitongobe ne tjibhayilo tje tjibi tjinojiwa, tjingabe malopa atjo azhisiwa mu nshasha we bushanganilo kuthama kugadzana na Yahwe mu bugalo gwakayengemala, tjipisiwe nge moto.”