Read Kalanga Zwipo 7 Bible Online

Zwipo 7 - Kalanga bible

Zwipo 7

¹“Oyu ndiwo nlayo we tjibhayilo tje nlandu, tjakayengemala kwazo.

²Mu bugalo gwabagala bebhayila tjibhayilo tjinopisiwa, babhayilepo tjibhayilo tje nlandu, ngono malopa atjo anyasiwe kupoteleka tjibesotjinopisigwa zwibhayilo.

³Mafuta wose adusiwe apisigwe mu tjibeso, mafuta e mwise ne lizwizwi,

⁴ne so mbili ne mafuta adzo kudwila ku thunji ne lutembe gwe tjilopa gudusigwanyiwe ne so.

⁵Mpirisiti azwipisile mu tjibeso tjinopisigwa zwibhayilo tjili tjipo tjinopisiwa mu moto tjipisigwa Yahwe. Etji nditjo tjibhayilo tje nlandu.

⁶Mmwe ne mmwe we tjilume mu misha ye bapirisiti ungatjija, tjijigwe mu bugalo gwakayengemala, ngekuti tjakayengemala kwazo.

⁷“Tjibhayilo tje nlandu tjonga tjibhayilo tje tjibi, nlayo wazo nng'ompela, mpirisiti unothama gadzano na Yahwe, unowotola nyama yatjo.

⁸Mpirisiti unowothamila mmwe ne mmwe tjibhayilo tjinopisiwa azwitolele ganda le tjibhayilo tjinopisiwa.

⁹Tjimwe ne tjimwe tjipo tje mathunde tjakagotjegwa mu oveni na kose kwakagotjiwa nge pani kene nge thiwa, zowobe zwe mpirisiti wayisa tjipo.

¹⁰Tjipo tjimwe ne tjimwe tje mathunde, tjakashanganyiwa ne mafuta kene tjakawoma, zose zowobe zwe bakololo ba Aroni, banowozwikobana.

¹¹“Oyu ndiwo nlayo we tjibhayilo tje mbakisano tjingazhisiwa kuna Yahwe nge nthu.

¹²Ha nthu etjidusa tjili tjibhayilo tje mboko, unodusa tjibhayilo tje mboko tjina tjiwunga tjisina mbidzo ne makokisi akabhong'wa mafuta ne makhekhe e bgwisa gwakanathiwa gwakashanganyiwa zubuyanana ne mafuta.

¹³Pezhugwi kwe tjibhayilo tjitje tje mbakisano tje mboko, azhisilanye ne tjipo tje zwiwunga zwakavangwa nge mbidzo.

¹⁴Mu tjimwe ne tjimwe tjipo ayise tjiwunga tjing'ompela tjili tjipo tjinopiwa Yahwe, tjowobe tje mpirisiti watola malopa e tjibhayilo tje mbakisano kaanyasa mu tjibeso.

¹⁵Nyama ye tjibhayilo tje mbakisano tjili tje mboko, ijiwe mu zhuba latjazhisiwa, kushete yasala kunoti tjimuka mangwanana.

¹⁶“Koga ha tjibhayilo tjitje tjili tje kutuna kene tjili tje tjipo tje moyo ntjena, tjijiwe mu zhuba layisiwa tjibhayilo, ngono tjasala, mangwana tjijiwe,

¹⁷koga tjasala mu zhuba le butatu tjipisiwe nge moto.

¹⁸Ha kuna nyama yajiwa mu zhuba le butatu, iye wayisa tjibhayilo tje mbakisano aatowoamutjigwa nenguba kuli kutogwa sewathama tjimwe, ngoti ya temapala, ngono unowoija unozwidanila nlandu.

¹⁹Ha nyama ingakuthana ne tjimwe tjakatemapala isijiwe, ipisiwe nge moto. “Bose bakatjenapala bangaja nyama ye tjibhayilo.

²⁰Koga nthu unoja nyama ye tjibhayilo tjapiwa Yahwe tjili tjibhayilo tje mbakisano akatemapala, nthu wakajalo unowothubugwa mu gubungano le Ndzimu.

²¹Ngono ha kuna ungakutha tjimwe tjakatemapala, kene kuli mu nthu, kene phuka yakatemapala kene ili tjimwe koga tjingabe tjishimisa mbeli kwe Ndzimu, ngono ebe eja nyama ye tjibhayilo tjapiwa Yahwe tjili tjibhayilo tje mbakisano, nthu wakajalo athubugwe mu bathu be Ndzimu.”

²²Yahwe bakadwa Mushe bakati,

²³“Idwa bathu be Iziraela uti, Musitongoja mafuta e ng'ombe kene e pkhwizi kene e mbudzi.

²⁴Mafuta e phuka yazwifila ne mafuta e phuka yabhakhwa nge tjibandana, angashingisiwa tjimwe tjipoga, koga asitongojiwa nenguba kwakatini.

²⁵Nthu unowoja mafuta e phuka yathamiwa tjipo tjinopisiwa mu moto tjipisigwa Yahwe, athubugwe mu bathu be Ndzimu.

²⁶Musitongoja malopa e nyuni kene e phuka mu magalo enyu.

²⁷Ha kuna nthu unoja malopa, nthu wakajalo athubugwe mu bathu be Ndzimu.”

²⁸Yahwe bakadwa Mushe bakati,

²⁹“Lebeleka ne bana be Iziraela uti iye unodusa tjibhayilo ili tjibhayilo tjitje tje mbakisano etjiyisa kuna Yahwe azhise mmwe ntezho uli tjipo kuna Yahwe, kudwa mu tjibhayilo tjitje tje mbakisano.

³⁰Atjizhise nge maboko awe tjili tjipo tjinopisiwa mu moto tjipiwa Yahwe, azhise mafuta e tjibhayilo ne ifuba, kuti ifuba tjizunguziwe tjili tjipo tjinozunguziwa mbeli kwa Yahwe.

³¹Mpirisiti unowopisa mafuta mu tjibeso tjinopisigwa zwibhayilo, koga ifuba ngetja Aroni ne bakololo babe.

³²Tjidzwa tje luji tjipiwe mpirisiti tjili tjipo tjinodwa mu tjibhayilo tje mbakisano.

³³Mpirisiti unowodwa mu bakololo ba Aroni unoyisa malopa ne mafuta e tjibhayilo tje mbakisano wakafanila kupiwa gobe le tjidzwa tje luji.

³⁴Ngobe ifuba tjakazunguziwa ne tjidzwa tjadusiwa ndazwitola mu bana be Iziraela, zwidwa mu tjibhayilo tjabo tje mbakisano, ndibe ndizwipa Aroni mpirisiti ne bakololo babe, kuli gobe lakabalingisana nge kusingapele mu bana be Iziraela.

³⁵Oyu ndiwo ntezho wa Aroni ne bakololo babe unodwa mu zwipo zwinopisiwa mu moto zwipisigwa Yahwe, wabakashaluligwa mu zhuba labakazhodzegwa kushingila Yahwe bali bapirisiti.”

³⁶Yahwe bakalaula kuti bapirisiti bapiwe ntezho uwoyu nge bana be Iziraela, mu zhuba labakazhodziwa, ili ndingisano yakabalingisana kunoti ku zwizekugwana zwabo zose.

³⁷Iwoyu ndiwo nlayo we tjibhayilo tjinopisiwa, tjipo tje mathunde ne tjibhayilo tje tjibi ne tjibhayilo tje nlandu ne tjibhayilo tje kuzhodziwa ne tjibhayilo tje mbakisano,

³⁸tjakalauligwa Mushe ndi Yahwe ali pezhugwi kwe Dombo le Sinai, mu zhuba Yahwe labakalaulila bana be Iziraela kuti bazhise zwipo zwabo kuna Yahwe, bali mu tjilambanyika tje Sinai.